ABŞ hakimiyyəti Kaliforniyada səhiyyə saxtakarlığı ilə məşğul olan "erməni dəstələri" barədə məlumat verib. Məlumatın məğzində açıq şəkildə görünən əsas xətt ondan ibarətdir ki, ABŞ administrasiyası Kaliforniyada sosial və səhiyyə proqramlarının talanmasını artıq lokal fırıldaqçılıq kimi deyil, transmilli və etnik əsasda formalaşmış cinayət şəbəkələrinin işi kimi təqdim edir. Bu kontekstdə “erməni mafiyası” anlayışının birbaşa rəsmi şəxslərin dilindən səslənməsi təsadüfi deyil və illərdir yığılıb qalan faktların siyasi səviyyədə etirafı kimi qiymətləndirilir.
Xüsusilə Los-Anceles bölgəsi uzun müddətdir ki, erməni mənşəli mütəşəkkil cinayət qruplaşmalarının fəaliyyəti ilə bağlı ABŞ hüquq-mühafizə orqanlarının hesabatlarında yer alır. Söhbət xırda cinayətlərdən yox, dövlət proqramlarına sistemli şəkildə sızmaq, saxta hospis və evdə tibbi xidmət şirkətləri yaratmaq, Medicare və Medicaid hesabına milyardlarla dolları dövriyyədən çıxarmaq kimi yüksək səviyyəli maliyyə fırıldaqlarından gedir. Dr. Mehmet Ozun “erməni bandaları”nın adını rus və digər mafioz strukturlarla eyni sırada çəkməsi, bu qrupların artıq lokal icma problemi yox, milli təhlükəsizlik və büdcə təhlükəsi səviyyəsində qəbul edildiyini göstərir.
Burada diqqətçəkən məqam ondan ibarətdir ki, bu sxemlər tək-tük cinayətkarların işi deyil. Bu, hüquqşünaslar, saxta həkimlər, kağız üzərində mövcud olan pasiyentlər və korrupsiyalaşmış vasitəçilərdən ibarət yaxşı təşkil olunmuş şəbəkədir. Erməni mafiyası illərlə sistemin boşluqlarından istifadə edərək nəzarət mexanizmlərini neytrallaşdırıb və Kaliforniyanı faktiki olaraq sosial yardım fırıldaqlarının mərkəzinə çevirib. Ölkə üzrə evdə tibbi xidmət hesablarının 18 faizinin təkcə Los-Ancelesdən gəlməsi bu miqyasın nə qədər anormal olduğunu açıq şəkildə göstərir.
Administrasiyanın ritorikasında erməni mafiyasının xüsusi qabardılması həm də ona görə baş verir ki, bu qruplar uzun müddət siyasi toxunulmazlıqdan və “icma həssaslıq” pərdəsindən istifadə edərək real nəzarətdən yayına biliblər. Kaliforniya rəhbərliyinin illərlə bu problemlərə göz yumması, istər-istəməz bu cinayət şəbəkələrinin daha da kök atmasına şərait yaradıb. Federal prokurorun məsuliyyəti birbaşa ştat rəhbərliyinin üzərinə qoyması da məhz bu susqunluğa və passivliyə işarədir.
Nəticə olaraq, təqdim olunan faktlar və rəsmi açıqlamalar göstərir ki, söhbət sadəcə korrupsiyadan yox, erməni mafiyası da daxil olmaqla etnik əsasda formalaşmış mütəşəkkil cinayət strukturlarının ABŞ-ın sosial və səhiyyə sistemlərini məqsədli şəkildə istismar etməsindən gedir. Bu problem yumşaq ifadələrlə və siyasi korrektliklə ört-basdır ediləcək mərhələni çoxdan keçib. Əgər iddialar sübuta yetirilərsə, bu, təkcə maliyyə fırıldağı deyil, dövlət institutlarına qarşı uzunmüddətli və planlı bir cinayət fəaliyyətinin ifşası kimi tarixə düşəcək.
Akif NƏSİRLİ
