Venesuela ordusu Rusiyadan aldığı hava hücumundan müdafiə sistemlərini konfiqurasiya edə bilməyib və bu da Prezident Nikolas Maduro və həyat yoldaşının oğurlanması ilə nəticələnən ABŞ hərbi əməliyyatı zamanı ölkənin hava məkanını həssas vəziyyətə salıb. Bu barədə The New York Times (NYT) ABŞ rəsmilərinə və ekspertlərinə, eləcə də foto, video və peyk görüntülərinin təhlilinə istinadən xəbər verir.
Qəzet qeyd edir ki, ölkə hakimiyyəti Rusiyadan S-300 zenit-raket sistemləri və Buk hava hücumundan müdafiə sistemi alıb. Lakin, iki mənbə qəzetə bildirib ki, mümkün işğal barədə aylarla xəbərdarlıqlara baxmayaraq, onları radarlara qoşa bilməyiblər. Çünki zenit sistemləri bir-biri ilə əlaqəli deyildi.
Mərkəzi Kəşfiyyat İdarəsinin Venesuela missiyasının rəhbəri Riçard de la Torre qeyd edib ki, illərlə davam edən korrupsiya da bu vəziyyətə qismən təsir göstərib.
Bundan əlavə, sanksiyalar ölkə hakimiyyətinin Rusiya sistemlərini saxlamasını və onlar üçün ehtiyat hissələri əldə etməsini çətinləşdirib. Qəzetin mənbələri Kremlin Vaşinqtonla münasibətlərə xələl gətirməmək üçün bu silahların qəsdən pisləşməsinə imkan vermiş ola biləcəyini də istisna etməyib. Onların fikrincə, Venesuela ordusu Amerika təyyarəsini vursaydı, Rusiya ciddi nəticələrlə üzləşə bilərdi (əməliyyat zamanı yeddi Amerika əsgəri yaralanıb və bir Amerika helikopteri zədələnib).
NYT qeyd edir ki, Karakas əvvəllər Amerika hərbi texnikasına çox güvənirdi, lakin iki ölkə arasında münasibətlərin pisləşməsi fonunda Vaşinqton 2006-cı ildə bu cür təchizata embarqo qoyub. 2009-cu ildə o vaxtkı prezident Hugo Chavez Rusiyadan hava hücumundan müdafiə sistemləri aldığını elan edərək, "Bu raketlərlə xarici təyyarələrin gəlib bizi bombalaması çox çətin olacaq", - deyə bildirib.
Xüsusilə, Venesuela Rusiyadan Su-30 qırıcı təyyarələri, T-72 tankları, S-125 Neva və Buk-M2E hava hücumundan müdafiə sistemləri, eləcə də S-300 hava hücumundan müdafiə sistemləri alıb.
Xatırladaq ki, 3 yanvarda ABŞ "Mütləq Qətiyyət" əməliyyatına başlayaraq, Venesuelaya zərbələr endirib və narkoterrorizmdə ittiham olunan prezident Nikolas Maduronu əsir götürüb. Venesuela Daxili İşlər Nazirliyi 100 itki barədə məlumat verib. ABŞ prezidenti Donald Tramp Vaşinqtonun Venesuelaya nəzarəti ələ keçirəcəyini və ölkənin ABŞ-a təxminən 2 milyard dollar neft göndərəcəyini açıqlayıb. Vitse-prezident Delsi Rodriges respublikanın müvəqqəti rəhbəri olub.
Rusiya hakimiyyəti ABŞ əməliyyatını pisləsə də, Karakasa heç bir konkret yardım göstərməyib.
SAMİRƏ
