Müvəqqəti Dəməşq hökuməti kürdlərin rəhbərlik etdiyi Suriya Demokratik Qüvvələrinə Hələbdən geri çəkilmək və şimal-şərqə doğru hərəkət etmək üçün altı saat vaxt verib. Qeyd edək ki, Dəməşqdəki müvəqqəti hökumət kürd qüvvələri ilə günlərlə davam edən və çoxsaylı itkilərlə nəticələnən döyüşlərdən sonra Hələbin bəzi məhəllələrində atəşkəs elan edib. Bununla bağlı bəyanatda kürdlərin rəhbərlik etdiyi Suriya Demokratik Qüvvələrinin səhər saat 9:00-a qədər ərazini tərk etməli olduğu bildirilib.
Müdafiə Nazirliyi bildirib ki, "Yaşayış məntəqələrində yeni hərbi eskalasiyanın qarşısını almaq üçün Müdafiə Nazirliyi Hələbin Şeyx Məqsud, Əşrəfiyyə və Bəni Zeid məhəllələri yaxınlığında saat 03:00-dan etibarən atəşkəs elan edir". Amma Suriya Demokratik Qüvvələri verilən vaxta əməl etmədiklərindən hərbi əməliyyatlar yenidən başlayıb. Xatırladaq ki, artıq bir neçə gündür Suriya hökumət qüvvələri Hələbdə kürdlərin rəhbərlik etdiyi Suriya Demokratik Qüvvələri ilə toqquşur. Son bir neçə gündür davam edən döyüşlərdə ən azı 21 nəfərin öldüyü bildirilir. Tərəflər bir-birini qəsdən mülki əraziləri və infrastrukturu, o cümlədən təcili yardım briqadalarını və xəstəxanaları hədəf almaqda ittiham edirlər. Toqquşmalar mərkəzi hökumətlə Suriya Demokratik Qüvvələri arasında siyasi danışıqların dayandığı bir vaxtda başlayıb. Dəməşq rəhbərliyi, keçid prezidenti Əhməd əl-Şaranın rəhbərliyi altında, mart ayında Suriya Demokratik Qüvvələri ilə 2025-ci ilin sonuna qədər Suriya ordusuna inteqrasiya etmək barədə müqavilə imzalayıb. Lakin bu birləşmə üsulu ilə bağlı fikir ayrılıqları davam edir. 2024-cü ilin dekabr ayında keçmiş prezident Bəşər Əsədin devrilməsindən sonra yaradılan yeni Suriya ordusunu təşkil edən bəzi qruplar əvvəllər Türkiyənin dəstəklədiyi silahlı qruplar idi və kürd qüvvələri ilə uzun müddətdir münaqişə tarixinə malikdir. Türkiyə, Suriyanın şimalındakı Suriya Demokratik Qüvvələrinin çətiri altındakı ən aktiv və dominant silahlı təşkilat olan Xalq Müdafiə Bölmələrini (YPG) Kürdüstan İşçi Partiyasının (PKK) Suriya qolu kimi tanıyır. Türkiyə Silahlı Qüvvələri YPG/SDG ünsürlərinə qarşı "Fərat Qalxanı", "Zeytun Budağı" və "Sülh Çeşməsi" əməliyyatları keçirib.
Hazırda Suriya müvəqqəti hökumətinə sadiq qüvvələrin şimali Hələbdəki kürd məhəllələri olan Şeyx Məqsud və Əşrəfiyyəyə hücumları davam edir. Türkiyə sosialist hərəkatının və feministlərin bəzi təşkilatları əməliyyatın dərhal dayandırılmasını tələb edərək, mülki şəxslərin ölümünə diqqət çəkərək hücumların sülh prosesinə zərər verdiyini bildiriblər. Xarici işlər naziri Hakan Fidan isə bildirib ki, indi Suriyada milli birliyin vaxtıdır: “Suriya Demokratik Qüvvələri bu məsələdə öz töhfəsini verməlidir. Amma bunun əvəzinə, fəaliyyətini İsraillə koordinasiya edir”. Fidan, Omanın xarici işlər naziri Bədr bin Həməd əl-Busaidi ilə keçirilən birgə mətbuat konfransında Suriyanın Hələb şəhərində baş verən hadisələrin Türkiyənin son bir ildir xəbərdarlıq etdiyinin təzahürü olduğunu bildirib və əlavə edib ki, Suriyada Suriya Demokratik Qüvvələri adından istifadə edən PKK/YPG terror təşkilatı vaxt qazanmaq əvəzinə Suriyada inteqrasiya prosesinə başlasaydı, bu hadisələr baş verməzdi. Fidan PKK/YPG-nin harada olursa olsun güzəştə getmədən qalmaq və maraqlarını irəli sürmək yanaşmasının heç kimə fayda vermədiyini qeyd edərək, Suriya hökumətinin hazırda öz yaralarını sağaltdığını, terrorla mübarizə qabiliyyətini inkişaf etdirdiyini və müəyyən bölgələrdə xalqına xidmət göstərdiyini qeyd edib. Davam edən toqquşmalar fonunda Hələb Şəhər Mərkəzi Komitəsi Hələbdə təhlükəsiz bölgələrə təxliyə edilən insanların sayının 142 min olduğunu açıqlayıb.
Nahid SALAYEV
