Sosial mediada paylaşılan video və məlumatlara görə, Şiraz bazarında sahibkarlar İranda davam edən ümumxalq tətillərinə qoşularaq mağazalarını bağlayıblar.
Şiraz bazarı və ətraf küçələrdə çəkildiyi bildirilən görüntülərdə etirazçıların “Xameneiyə ölüm olsun” şüarı səsləndirdiyi eşidilir.
Yerli mənbələr etirazların dağıdılması zamanı təhlükəsizlik qüvvələrinin gözyaşardıcı qazdan istifadə etdiyini bildirir. Məlumatı “Independent Persian” yayıb.
Qeyd edilir ki, dünən Tehranın Böyük Bazarında və xüsusilə Xəyyam Bazarında vəziyyət kəskin gərginləşib. Paylaşılan görüntülər və yerli mənbələrin məlumatlarına görə, bazar ərazisi od və tüstü içində qalıb, hadisələr isə birbaşa qarşıdurma mərhələsinə keçib.
Məlumata əsasən, Xəyyam Bazarında sahibkalar repressiv qüvvələrin bazara daxil olmasının qarşısını almaq üçün keçidlərin qapılarını bağlayıblar. Buna cavab olaraq təhlükəsizlik qüvvələri qapalı məkana gözyaşardıcı qaz atıb. Şahidlər bildirir ki, bu addım bazar daxilində boğulma təhlükəsi yaradıb və insanların həyatı üçün ciddi risk formalaşdırıb.
Eyni zamanda, Tehranın Böyük Bazarında etiraz aksiyaları və genişmiqyaslı tətilindən sonra silahlı təhlükəsizlik qüvvələrinin bazar ərazisinə yerləşdirildiyi bildirilir.
Əli TURABOV
