ABŞ gecə saatlarında Venesuelaya qarşı hava hücumları təşkil edib. Bundan saatlar sonra Prezident Donald Tramp Venesuela Prezidenti Nikolas Maduro və həyat yoldaşının yaxalanaraq ölkədən çıxarıldığını bəyan edib.
Venesuela hökuməti isə prezident Maduronun harada olduğu barədə dəqiq məlumat olmadığını açıqlayıb. ABŞ-dan onun sağ olduğuna dair konkret sübutlar tələb olunub.
ABŞ Dövlət Katibi Marko Rubio da Maduronun ABŞ-da cinayət ittihamları ilə mühakiməsi üçün həbs olunmasını əmr edib. ABŞ dövlət katibinin köməkçi müavini isə Maduronun "törətdiyi cinayətlərə görə ədalət qarşısında cavab verəcəyini" bildirib.
Venesuela vitse-prezidenti Delsi Rodrigez bildirib: "Prezident Maduro və birinci xanım Siliya Floresin harada olduğunu bilmirik. Tramp administrasiyasından Maduro və birinci xanımın sağ olduğuna dair dərhal sübut tələb edirik. Xalqımıza qarşı bu təcavüzü qınayırıq, hücumlar rəsmilərin, əsgərlərin, günahsız insanların və mülki şəxslərin həyatına başa gəlib".
ABŞ-ın Venesuelaya hava hücumları başlamazdan təxminən 10 saat əvvəl Çinin xüsusi nümayəndəsi Karakasda Maduro ilə təxminən 3 saat davam edən görüş keçirib. Çin hələlik ABŞ-ın hücumu ilə bağlı şərh verməyib.
Rusiya Xarici İşlər Nazirliyi isə Birləşmiş Millətlər Təşkilatının Təhlükəsizlik Şurasının Venesuela ilə bağlı iclasını dəstəklədiyini açıqlayıb. Şuranın çağırılması üçün üzv dövlətlərdən rəsmi tələb prosesi tələb olunur. Ancaq iclasın tarixi və vaxtı hələ dəqiqləşdirilməyib.
İran Xarici İşlər Nazirliyi ABŞ-ın Venesuelanın "ərazi bütövlüyü və suverenliyinə" qarşı hərbi hücumunu pisləyən yazılı bəyanat yayıb. Bəyanatda ABŞ-ın Venesuelaya silahlı hücumunun Birləşmiş Millətlər Təşkilatının Nizamnaməsinin məqsəd və prinsiplərini pozduğu vurğulanıb və BMT hücumu pisləməyə çağırılıb.
Venesuela konstitusiyasına görə, hakimiyyət vitse-prezident Delsi Rodrigezə keçməlidir. Lakin ölkədəki qeyri-müəyyənlik səbəbindən vəziyyətə kimin nəzarət edəcəyi bəlli deyil.
Maduronun tutulmasından sonra müxalifətin aparıcı fiquru Mariya Korina Maçadonun ölkənin yeni lideri olma ehtimalı da müzakirə olunur.
Maçado 2024-cü il seçkilərində iştirakına icazə verilməyən müxalifət namizədi Edmundo Qonsalezi dəstəkləyir. Qonsalesin adı da Venesuelanın potensial yeni liderləri arasındadır.
Bu arada, ABŞ Konqresinin bəzi üzvləri prezident Trampı, Venesuelaya qarşı əməliyyatdan əvvəl Konqresə məlumat vermədiyinə görə tənqid ediblər.
TAHİR
