Rövşən Məhərrəmov: "Hətta açıqlamanı verib bunu etiraf etsə belə, heç nə dəyişməyəcək"
"Netanyahuya səslənirəm: səndə atom bombası var, ya yoxdur? Gücün çatırsa, açıqla bunu, amma açıqlaya bilməz". Bu barədə Türkiyə Prezidenti Rəcəb Tayyib Ərdoğan partiyasının qrup iclasında çıxışı zamanı bildirib.
O, İsrailin atom bombası ilə təhdid etdiyini vurğulayıb və İsraili "terror dövləti" adlandırıb.
İsrail nüvə silahlının olduğunu etiraf etsə nə baş verə bilər?
Hərbi - siyasi şərhçi, ehtiyatda olan polkovnik Rövşən Məhərrəmov " Bakı-Xəbər"ə bildirdi ki, Ərdoğanla Netanyahu arasında gərginlik davam edir: "Çünki Ərdoğan bəyan etdi ki, söz atışmaları gedir. Ərdoğan bildirib ki, əgər onun cəsarəti varsa, atom bombası olduğunu açıqlasın. Həqiqətən də, İsrailin nüvə başlıqlı silahları var. Hətta açıqlamanı verib bunu etiraf etsə belə heç nə dəyişməyəcək. Bilirsiz ki, Ərdoğan, Türkiyə "HƏMAS"ı dəstəkləyir və onu bir qurum kimi tanıyır. O, Netahyahuna mesaj verdi ki, İsrail yaşayış mossivlərini bombalamağı dayandırmalıdır. Hətta Netanyahunu qatil adlandırdı. Bunun cavabı gecikmədi. Netanyahu bildirdi ki, Türkiyədə demokratiyadan söz gedə bilməz. Bu söz atışmaları ilə gərginlik daha da artdı. Əgər belə davam edərsə, Türkiyə həqiqətən hərəkətə keçə bilər. Necə keçə bilər? "HƏMAS"ı dəstəklədiyi kimi, Türkiyə artıq onun silahlandıra bilər. Müsəlman ölkələrinin rəhbərlərinin toplantısı dövründə də Ərdoğandan və başqa dövlətlərdən belə bir çağırış gəldi ki, "HƏMAS"a yardım etmək, onu silahlandırmaq lazımdır. İsrail əleyhinə bütün müsəlman dövlətləri bir cəbhədən çıxış edirlər. Baxmayaraq ki, Türkiyə ilə İran arasında qədimi ziddiyyətlər var, tarixi gərginlik olub, İsrail və "HƏMAS" məsələsində İranla Türkiyə arasında fikir ayrılığı yoxdur. Səudiyyə Ərabistanı və başqa ərəb dövlətləri ilə İsrail arasında bəzi razılaşmalar əldə olunmuşdu. Ancaq müharibə başladığı gündən bütün layihələr ləğv olundu. Ən əsası isə, müsəlman dövlətləri arasında Türkiyənin güclü bir dövlət olması, İsraili isə Amerikanın dəstəkləməsi, İsrailin, yəhudilərin dünyada lobbiçiliyinin güclü olması ziddiyyətləri daha da dərinləşdirir. İsrailin təmin edilməsi, Amerikanın İsrailə 15 milyard maliyyə ayırması böyük bir narazılıqla qarşılanıb. Düşünürəm ki, bu gərginlik uzanacaq və "HƏMAS"la İsrail arasında müharibə dayanmasa, başda Türkiyə, İran və digər müsəlman dövlətləri olmaqla əhatə dairəsi genişlənəcək. Yəni Yaxın Şərqdə birbaşa toqquşma ola bilər. Amma Türkiyənin qarşı tərəfi silahılandırması İsrail üçün bir təhlükədir. Bu danılmazdır. Hazırda da Türkiyə prezidenti və İsrail baş naziri arasında bu gərgin atışmaların sonu müharibənin uzanmasına gətirib çıxarır. Müharibə daha böyük miqyas ala bilər".
Şərhçinin sözlərinə görə, İsrailin nüvə silahı gücü geniş maraq mövzusuna çevrilib: "İsrailin əlində 90-a yaxın nüvə silahı olduğu, bəzi mənbələrə görə bu sayın 400-ə qədər olduğu bildirilir.
Fələstin-İsrail müharibəsi başlayandan sonra ən çox maraq doğuran mövzulardan biri də "İsrail nüvə silahına malikdirmi" sualı olub. İsrail dünyada nüvə silahı yaradan altıncı ölkə və Nüvə Silahlarının Yayılmaması Müqaviləsini imzalamamış nüvə silahına malik dörd ölkədən biri hesab olunur.
Mövzu ilə bağlı açıq mənbələrdən aparılan araşdırmalar göstərir ki, İsrail 1948-ci ildə qurulduqdan dərhal sonra nüvə sahəsində fəaliyyətə başlayıb. 1950-ci illərin sonlarında Fransanın dəstəyi ilə gizli nüvə reaktoru yaratmağa başlayan İsrail 1960-cı illərdə nüvə gücünə malik ölkə sayılırdı. Bildirilir ki, İsrailin hazırda 75-400 nüvə başlığı və bu döyüş başlıqlarını daşıya bilən raket, təyyarə və sualtı buraxılış sistemləri var.
Stokholm Sülh Araşdırmaları İnstitutu beynəlxalq ictimaiyyətə sahib olduğu nüvə silahları barədə məlumat verməyən İsrailin 80 ilə 90 arasında nüvə başlığına sahib olduğunu bildirir".
Məhəmmədəli QƏRİBLİ
