İsrail ordusu Qəzza zolağında HƏMAS-a qarşı həyata keçirdiyi əməliyyatın miqyasını tədricən genişləndirməkdə davam edir. Bunu İsrail Müdafiə Qüvvələrinin rəsmi nümayəndəsi Daniel Haqari deyib. Onun sözlərinə görə, bu, plana uyğun və risqlər nəzərə alınmaqla həyata keçirilir.
Qeyd edək ki, İsrail və HƏMAS hərəkatı arasında müharibə oktyabrın 7-dən davam edir. İsraildə 1,4 min, Qəzza zolağında isə 7 mindən çox fələstinlinin həlak olduğu bildirilir.
Göründüyü kimi, dünya əks olsa da, İsrail Qəzzada quru əməliyyatına başladı. Bundan sonra nə olacaq?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, bölgədə vəziyyət daha da kəskinləşir və son illərdə bu cür gərgin vəziyyət olmayıb: “Ümumiyyətlə, 67 - ci il müharibəsindən sonra ən gərgin hal yaşanır. Əvvəllər də gərgin vəziyyət olurdu, ancaq bu qədər adam həlak olduğu müşahidə ediıməyib. Qəzzada keçirilən son əməliyyatlarda hər iki tərəf xeyli itki verib, minlərlə şəxs dünyasını dəyişib. İndi quru əməliyyatda da yenə itkilərin sayı artacaq, Misir qaçqınları qəbul etmək istəmir və çox gərgin vəziyyət yaranıb. Prosesi proqnozlaşdırmaq çətindir. Nə üçün çətindir? Çünki İsraillə Ərəbistanın, Qətərin, Türkiyənin münasibətləri çox yaxşılaşmışdı, danışıqlar gedirdi, hər kəs gözləyirdi ki, bölgədə sülh olacaq, məsələlər yaxşı bir istiqamətə yönələcək. Amma, əksi baş verdi və belə halın baş verməsi, buna İranın, Çinin reaksiyası, digər tərəfdən ABŞ - ın bölgəyə iri təyyarədaşıyan gəmiləri gətirməsi ondan xəbər verir ki, bu gəmilər güc göstərmə anlamına gəlmir. İsrail Qəzza ilə müharibə aparacaqsa, bu qədər dəstəyə nə ehtiyac var? Ancaq ABŞ dəfələrlə qeyd edib ki, digər dövlətlər qoşulsa o da qoşulacaq. Son illərin ən iri müharibəsi başlaya bilər, hətta bu müharibə Rusiya-Ukrayna müharibəsini keçə bilər. Müharibə hazırda elə bir həddə gəlib ki, Rusiya-Ukrayna müharibəsi gündəmdən çıxıb, əsas gündəmdə İsrailin Qəzada keçirdiyi əməliyyat, İsraillə Fələstin, İsraillə Həmas münasibətləridir. Yaxın günlərdə biz vəziyyətin hansı istiqamətdə gedəcəyini görəcəyik. Ağıl, məntiq müharibənin olmayacağını deyir. Ancaq xatırlayırsızsa, son müharibələrlə bağlı hərbi ekspertlər, jurnalistlər belə fikirlər səsləndirirdilər ki, heç bir ağıl, məntiq Rusiya ilə Ukrayna arasında müharibə olacağını demirdi. Rusiya orada təlimlər keçirirdi, Ukraynanı NATO üzvü olmaqdan çəkindirmək istəyirdi. Ancaq nəticədə müharibə oldu. Ona görə də, proqnozlaşdırmaq çox çətindir, proseslər sürətlə dəyişir”.
Qeyd olunur ki, İsrailin hərbi və siyasi rəhbərliyi Qəzzada quru əməliyyatı planlaşdırarkən "Hizbullah" hərəkatının və İranın cavab addımlarından ehtiyat edirdi. Belə ki, İsrail ordusu Qəzzada əməliyyatlara başlayanda "Hizbullah"ı müdaxilədən çəkindirmək üçün ABŞ-dan daha çox raketdən müdafiə sistemlərinin çatdırılmasını gözləyib.
Digər mənbələr qeyd edir ki, əməliyyat başlamazdan əvvəl İsrail rəhbərliyi HƏMAS silahlılarının partizan müharibəsinin qarşısını almaq üçün Qəzza zolağına bütün silah qaçaqmalçılığı kanallarını maksimum dərəcədə kəsmək istəyib.
Adının açıqlanmasını istəməyən İsrailin yüksək rütbəli generalları ordunun mümkün qədər çox girovu xilas etmək üçün əməliyyat zamanı risqə getməyə hazır olduğunu, əməliyyatın mürəkkəbliyinin yüksək olduğunu bildirir.
Məhəmmədəli QƏRİBLİ
