Dağıstanda İsrailin Qəzza zolağında əməliyyatlarına qarşı çıxan yüzlərlə insan Təl-Əvivdən Mahaçqala hava limanına enən təyyarə ilə əlaqədar aeroporta basqın edib.
Əllərində Fələstin bayraqları olan nümayişçilər təyyarənin geri göndərilməsini tələb ediblər. Təhlükəsizlik maneələrini aşaraq uçuş-enmə zolağına çıxan nümayişçilər təyyarədən düşən sərnişinləri axtarıblar. Hava limanına çoxlu sayda polis və xüsusi təyinatlılar göndərilib, qarşıdurmalar zamanı hava limanının bəzi pəncərə və qapıları sındırılıb.
Dağıstan prezidenti Sergey Melikov açıqlamasında baş verənləri təxribat kimi qiymətləndirib.
Mahaçqala hava limanı perrona naməlum şəxslərin icazəsiz girişi ilə əlaqədar müvəqqəti bağlanıb. Bu barədə Rusiya Federal Hava Nəqliyyatı Agentliyinin Teleqram kanalı məlumat verib.
"Tədbirlər vəziyyət normallaşana qədər qüvvədədir. Hüquq-mühafizə orqanları yerində işləyir", - məlumatda bildirilir.
Agentlikdən bildirilir ki, Mahaçqalaya eniş etməli olan təyyarələr ehtiyat aerodromlara yönləndirilib.
Rusiya DİN-in Şimali Qafqaz Federal Dairəsi üzrə Baş İdarəsinin mətbuat xidməti Mahaçqala hava limanı ərazisində icazəsiz aksiyaların keçirilməsinə çağırışlardan sonra kütləvi iğtişaşların təşkili ilə bağlı cinayət işi açıldığı barədə məlumat yayıb.
Qeyd olunur ki, iğtişaşlarda iştirak edən bütün şəxslər saxlanılaraq məsuliyyətə cəlb ediləcək. Həmçinin, iğtişaşlara və millətlərarası ədavətin alovlanmasına təhrik edən şəxslər də cinayət məsuliyyətinə cəlb ediləcək.
Müstəntiqlər tərəfindən Rusiya Federasiyası Cinayət Məcəlləsinin 222-ci maddəsi ilə cinayət işi açılıb.
«İğtişaşlarda iştirak edən hər kəsin şəxsiyyəti müəyyənləşdiriləcək, çünki hava limanında və ona yaxın ərazilərdə video nəzarət sistemi fəaliyyət göstərir», - məlumatda deyilir.
Dağıstan hakimiyyəti hava limanında vəziyyəti nəzarət altında saxlayır, eyni zamanda, vətəndaşlardan Mahaçqala-Kaspiysk magistral yoluna çıxmamağı xahiş edib. Bu barədə Dağıstan Respublikası hökumətinin mətbuat xidmətindən məlumat verilib.
«Mahaçqala şəhərinin hava limanında baş verən insident ilə əlaqədar olaraq respublika əhalisindən Mahaçqala-Kaspiysk magistral yolunda hərəkəti müvəqqəti məhdudlaşdırmağı xahiş edirik», - məlumatda deyilir.
Həmçinin, qeyd olunur ki, hava limanında vəziyyət nəzarət altındadır, güc strukturları yerində işləyir.
«Eyni zamanda, respublika əhalisini destruktiv qrupların təxribatlarına boyun əyməməyə və cəmiyyətdə panika əhval-ruhiyyəsi yaratmamağa çağırırıq», - məlumatda deyilir.
TAHİR
