İran növbəti dəfə Qəzzada baş verənlərlə bağlı hədələyici mövqe sərgiləyib. İranın xarici işlər naziri Hüseyn Əmir Abdullahian bununla bağlı deyib ki, müharibə dayanmasa, onlar cəbhəni genişləndirəcək:
“Qəzzada müharibə dayanmasa, İran müharibə cəbhələrini genişləndirəcək”. Nazir Hizbullahın İsrail hədəflərinə artan hücumlarına istinad edərək bildirib ki, hər saat yeni bir müharibə cəbhəsinin açılma ehtimalı artır: “İran sakit dayanıb bu vəziyyətin gedişatını seyr edə bilməz. Qurudan hücum olarsa, Qəzza işğalçılar üçün məzarlığa çevriləcək”.
O da məlumdur ki, Birləşmiş Ştatlar İsrailin əsas müttəfiqidir və məlum toqquşmalardan sonra dəstəyini həm siyasi, həm də hərbi müstəvidə artırır. Belə bir şəraitdə doğrudanmı İran müharibəyə qoşulmağa cəsarət edəcək?
“İranın genişmiqyaslı hərbi toqquşmalara getməsi bu ölkə üçün fəlakətlə nəticələnə bilər”
Sözügedən məsələ ilə bağlı “Bakı-Xəbər”ə açıqlama verən hərbi ekspert İbrahim Rüstəmli İranın müharibəyə qoşulacağını istisna etdi: “Əvvəla, bölgədə vəziyyət gərginləşir. Bununla əlaqədar olaraq ABŞ İsrail sahillərinə yüksək döyüş qabiliyyətinə malik olan iki tankerini göndərib. Ümumən bu, eskalasiyanın genişlənmə risqlərini artırır, amma o demək deyil ki, qarşıdurmalar genişlənəcək. ABŞ rəsmiləri qeyd etdilər ki, onların İrana qarşı hər hansı hücum planları yoxdur. ABŞ sadəcə bir jest olaraq İsrail dövlətinin yanında olduğunu bəyan edib. Bu o deməkdir ki, ABŞ müharibəyə qatılmaq fikrində deyil. Ancaq öz gücünü göstərir ki, biz burdayıq. Üçüncü tərəf müdaxilə etsə, qarşısında Birləşmiş Ştatları görəcək. Yəni eskalasiya genişlənərsə, tərəflər arasında münasibətlər gərginləşərsə, o zaman ABŞ İrana hava zərbələri endirə bilər. Digər tərəfdən, indiki dövrdə hansısa birbaşa müdaxilə İran üçün yaxşı nəticələnməyəcək. Çünki İranın özündə də bu dəqiqə vəziyyət yaxşı deyil. Bu ölkənin daxilində həm siyasi, həm də sosial-iqtisadi vəziyyət çox gərgindir. Ölkədə onsuz da daxili gərginlik çox yüksəkdir. Belə bir situasiyada İranın genişmiqyaslı hərbi toqquşmalara getməsi bu ölkə üçün fəlakətlə nəticələnə bilər. İranın xarici işlər naziri Hüseyn Əmir Abdullahian belə danışmaqla ölkəsinin guya müsəlmanların təəssübünü çəkdiyini göstərir. İranın hərbi-texniki imkanları ABŞ və İsraillə üz-üzə gəlmək qüdrətində deyil. Digər tərəfdən, dövlət katibi Blinken bəyan etdi ki, HƏMAS-ın İsrailə hücumunda İranın birbaşa iştirakına dair onlarda məlumat yoxdur. Bu, dolayısı ilə İranı kənarda saxlamaq məqsədi daşıyırdı. Ritorikaya gəldikdə isə, bunlar bir-birinə mesaj verirlər. İran müdaxiilə edərsə, o zaman ABŞ buna kəskin reaksiya verəcək. Tehran rejimi də analoji tərzdə reaksiya verir. Bir sözlə, bütün bunlar müharibə ritorikasıdır. İnanmıram ki, belə şəraitdə ABŞ İrana cəbhə açsın. Ona görə ki, Bayden administrasiyasının əsas diqqəti Rusiya-Ukrayna müharibəsinə yönəlib. Ona görə də yeni cəbhənin açılması Birləşmiş Ştatlara sərf etmir”.
Vidadi ORDAHALLI
