Gündəlik həyatımızın ayrılmaz hissəsinə çevrilən sosial şəbəkələr, xüsusən də “Facebook”, “İnstagram” və “WhatsApp” ən çox istifadə etdiyimiz resursdur. Bir sıra hallarda bu platformaların istifadəçiləri xoşagəlməz hallarla, arzuedilməz mesajlarla qarşılaşırlar.
Son zamanlar “Facebook” və “WhatsApp” istifadəçiləri tanımadıqları hesablardan həyəcan doğuran, vahimə yaradan mesajlar alırlar. Maraqlıdır ki, bu mesajlar həm Azərbaycan, həm də rus dillərində göndərilir. Göndərilən mətnlərdə qeyd edilir ki, bu mesajı 10 nəfərə gondərməsən başına faciə gələcək, bəla ilə üzləşəcəksən, yaxud bu mesajı dostlarına göndərsən varlanacaqsan, pul tapacaqsan, hətta burada belə bir fikir də qeyd edilir ki, mesajı alan şəxs onu silərsə, paylaşmazsa, bu onun üçün pisliklərlə nəticələnəcək və s. Onu da qeyd edək ki, bu platformalarda hesabı olanların bir çoxu həmin mesajlardan təsirlənərək onları “kopyalayıb” dostluq siyahılarında olan şəxslərə göndərirlər. Deyərdik ki, həm “Facebook”, həm də “WhatsApp” istifadəçiləri gün ərzində müxtəlif insanlardan bu səpkili mesajlar alırlar.
Ekspertlər hesab edirlər ki, bu cür mesajların yayılması konkret qruplarla bağlıdır. Əksər mütəxəssislərə görə, bu səpkili mesaj mətnlərini göndərənlər hansısa sektaların, cərəyanların da təmsilçiləri ola bilərlər. Yəni onlar bu mətnləri bir neçə nəfərə göndərirlər və paylaşmayacaqları təqdirdə onları “gözləyən təhlükə” ilə bağlı bu istifadəçiləri xəbərdar edirlər. Bəzi istifadəçilər isə əndişəyə düşdükləri üçün o mesajları paylaşır, başqlarına göndərirlər.
Fatimə Hacıbəyli: “Gün ərzində yüzlərlə istifadəçi bu məzmunda mesajlar, səs yazıları alır və bəzi insanlar bundan təşvişə düşürlər”
“Vəfa” Sosial İctimai Birliyinin sədri Fatimə Hacıbəyli bizimlə söhbətində bildirdi ki, “Facebook” və “WhatsApp” istifadəçiləri bu cür mesajlara əhəmiyyət verməməlidirlər. O hesab edir ki, bəzi dini sektalar insanları təşvişə salmaq və öz çürük ideyalarını təbliğ etmək üçün bu vasitələrdən istifadə edirlər. Qondarma dini sektaların keçən əsrin 90-cı illərindən bu günə kimi zərərverici fəaliyyətlə məşğul olduqlarını deyən F.Hacıbəylinin sözlərinə görə, hələ keçən əsrin sonlarında dini sekta təmsilçiləri tərəfindən müxtəlif məzmunlu məktublar yayılırdı. “Sosial şəbəkələrin açıq platforma olması, burada istənilən paylaşma ilə bağlı heç bir qadağanın olmaması sektaçıların da fəaliyyinin aktivləşməsinə səbəb olub. Vaxtilə qeyri-ənənəvi cərəyanların üzvləri rayon-rayon, kənd-kənd gəzib müxtəlif məzmunlu məktublar paylayırdılar. Həmin məktublarda dünyanın axırının çatdığı, insanları böyük təhlükələrin gözlədiyi haqqında məlumat verilirdi və qeyd edilirdi ki, bu məktubu yazıb 7 adama göndərməsəniz övladınız, ata-ananız, yaxınlarınız öləcək və s. Onlar bununla öz çürük ideyalarını camaat içində yayıb vahimə yaratmaq istəyirdilər. O zamanlar nəinki sadə insalar, hətta həkimlər, müəllimlər, mühəndislər də o məktubların üzünü köçürüb yayırdılar. Keçən əsrin 90-cı illərinin əvvəllərində həmin sektalar belə məktublardan istifadə edərək insanları özlərinə cəlb etmək istəyirdilər. Sonrakı dönəmlərdə bu kimi hallarla bağlı maarifçilik tədbirlərinin həyata keçirilməsi nəticəsində bu məktublar yığışdırıldı. İndi isə həmin sektalar sosial şəbəkələrdə öz fəaliyyətlərini davam etdirirlər. Onlar sosial şəbəkə istifadəçilərinə dostluq sorğusu göndərir, əgər dostluqları qəbul edilərsə, bu kimi mesajlar yazmağa başlayırlar. Deməzdim hamı, ancaq psixoloji vəziyyəti həssas olan insanlar onların çağırışlarına özləri də bilmədən cavab verirlər. “WhatsApp” və “Facebook”dan aldığımız bu cür mesajların hazlanmasında və dövriyyəyə buraxılmasında bəzi sektaların əlinin olması şübhə doğurmur. Gün ərzində yüzlərlə istifadəçi bu məzmunda mesajlar, səs yazıları alır və bəzi insanlar bundan təşvişə düşürlər”.
F.Hacıbəyli hesab edir ki, istifadəçilər belə mesajlara əhəmiyyət verməməlidirlər. Onun sözlərinə görə, bu mesajlar birbaşa xurafatın, cəhalətin yayılmasına xidmət edir. Bəzi qeyri-ənənəvi dini sektaların üzvlərinin apardığı “maarifçilik” işlərinin insanlara zərər vurduğunu deyən F.Hacıbəylinin fikrincə, onların sosial şəbəkələrdəki mənfi fəaliyyəti məhdudlaşdırılmalıdır.
Leyla QARAXANLI
