Son illər Azərbaycan orta ümumtəhsil məktəblərində müəllim kadrların və məktəb direktorlarının gəncləşdirilməsi prosesinə başlanıb. Bu gün bir sıra orta məktəblərə gənc direktorlar rəhbərlik edir. Ekspertlər hesab edirlər ki, gənc məktəb direktorlarının xeyli hissəsi məktəbin idarəedilməsində bacarıq göstərə bilir.
Təhsil Nazirliyinin İnsan resursları şöbəsinin müdiri Eşqi Bağırov mətbuata açıqlamasında bildirib ki, əvvəlki illərlə müqayisədə gənc müəllim və direktorların sayı artıb.
E.Bağırovun sözlərinə görə, ümumilikdə götürülsə, direktor olmaq istəyənlər arasında orta yaşlı namizədlər daha çoxluq təşkil edir.
E.Bağırov qeyd edib ki, mövcud qanunvericiliyə əsasən, direktor olmaq üçün namizədin 5 il pedaqoji stajı olmalıdır. O deyib ki, müəllim və məktəb direktorları üçün keçirilən müsabiqələrə qatılan şəxslər artıq stajlı, təcrübəli namizədlərdir.
Bu amil təhsilin idarə olunmasında, eləcə də tədrisin keyfiyyətinin artırılmasında nə kimi müsbət rol oynayacaq?
Kamran Əsədov: “Bu, orta məktəblərə yeni nəfəs gətirəcək, rəqabət mühitini artıracaq və təhsilin keyfiyyətinin artmasına səbəb olacaq”
Tanınmış təhsil eksperti Kamran Əsədov bizimlə söhbətində bildirdi ki, orta təhsil müəssisələrində pedoqoji kadrların cavanlaşdırılması siyasətinin effekti böyük olacaq.
“İlk növbədə qeyd edim ki, hazırda ölkə üzrə müəllimlərin sayı 144 414 nəfər təşkil edir. Onların da 39 179 nəfəri, yəni 27 faizi 35 yaşa qədər olan gənc müəllimlərdir. Həmin müəllimlərin 6099 nəfəri Bakı şəhərinin payına düşür. Təhsil Nazirliyi tərəfindən son illər müəllimlərin stimullaşdırılması, peşəkarlığının artırılması və müəllim nüfuzunun yüksəldilməsi istiqamətində məqsədyönlü tədbirlər həyata keçirilir. Ötən il işə qəbul olunan 4100 nəfərə yaxın müəllimin 2724 nəfərinə həvəsləndirmə tədbirləri tətbiq edilib. Ümumilikdə isə müəllimlərin işə qəbulu üzrə müsabiqənin şəffaf keçirilməsi nəticəsində son beş ildə 18 136 müəllim işə qəbul olunub. Onların kənd məktəblərində fəaliyyətə başlamış 11 600 nəfərinə (64 faiz) həvəsləndirmə tədbirləri tətbiq edilib. Son illərdə istər müəllimlərin işə qəbulu, istərsədə direktorların işə qəbulundakı şəffaflıq nəticəsində ötən illərlə müqayisədə müəllim və direktor işləmək arzusunda olanların sayında üç dəfə artım müşahidə edilib. Bu vəzifədə işləmək üçün sənəd verənlərin sayında kəskin artım bunu göstərir. Təkcə 2019-cu ildə 58 mindən çox iddiaçı orta ümumtəhsil məktəblərində işləmək üçün elektron ərizə təqqdim etmişdi . Orta məktəblərə maraq təkcə ali təhsillilər arasında artmayıb”-deyə bildirən K.Əsədovun sözlərinə görə, eyni zamanda abituriyentlərdə bu sistemdə şəffalığı görüb gələcək uğurlu kariyeralarını burada görürlər. O, vurğuladı ki, 2014-cü ildə 500 və daha artıq bal toplayan 922 nəfər müəllimlik ixtisasını seçmişdisə, 2017-ci ildə bu rəqəm 1370 nəfər olub. Ötən il keçirilən qəbul imtahanlarında 500 və daha artıq bal toplayan məzunlar arasında müəllimlik ixtisasını 2090 nəfər seçib. Bu göstəricinin 2014-2015-ci tədris ilinə nisbətən 2,3 dəfə və ya 126,7 faiz, ötən ilə nisbətən isə 1,5 dəfə və ya 53,6 faiz artım demək olduğunu qeyd edək K.Əsədov bildirdi ki, son 3 ildə Azərbaycanda buraxılış və qəbul imtahanlarının nəticələrinin ildən-ilə daha da yüksəlməsi, tədrisin keyfiyyətinin artması müşahidə edilir:”Son illər Təhsil Nazirliyi orta ümumtəhsil məktəblərinə şəffaf seçim yolu ilə dinamik, işini bilən, ixtisaslı və savadlı müəllimləri, direktorları qəbul edir. Cari tədris ilində 3500-ə yaxın yeni gənc müəllim ölkənin müxtəlif məktəblərində fəaliyyətə başlayacaq. Bu orta məktəblərə yeni nəfəs gətirəcək, rəqabət mühitini artıracaq və təhsilin keyfyyətinin artmasına səbəb olacaq. Eyni zamanda, bu il regionlardakı 600-dən artıq məktəbə yeni direktorlar təyin edilib. Bundan başqa, Bakıda da onlarla məktəbə yeni direktor təyin olunub. Yeni təyinatlar müasir təhsil standarlarının orta məktəblərdə tətbiqini sürətləndirəcək. Məhz onların sayəsində ölkə təhsilində dinamik inkişaf baş verəcək”-deyə K.Əsədov bildirdi.
İradə SARIYEVA
