Məişət zorakılığı bütün hallarda arzuedilən deyil. Ondan nəinki qadınlar, hətta uşaqlar da böyük əziyyət çəkir. Məişət zorakılığının qarşısının alınması üçün zaman-zaman müvafiq qurumlar, qeyri-hökumət təşkilatları müxtəlif istiqamətlərdə işlər görüblər. Lakin görülən işlərlə problemin tam aradan qaldırılmasına nail olunmayıb. Məişət zorakılığı probleminin həll edilməsi, bu kimi halların kökünün cəmiyyətimizdən kəsilməsi üçün dövlət tərəfindən addımlar atılır.
Prezident İlham Əliyevin 1 iyun 2019-cu il tarixli “Xüsusi qayğıya ehtiyacı olan uşaqlara və digər şəxslərə göstərilən sosial xidmətlərin genişləndirilməsi üçün əlavə tədbirlər haqqında” sərəncamı məişət zorakılığından zərər çəkmiş şəxslər üçün də sosial xidmətlərin dairəsinin genişləndirilməsinə imkan verib.
Sərəncama əsasən məişət zorakılığından zərər çəkmiş şəxslər üçün yeni yardım mərkəzləri yaradılır.
Sərəncamın icrası işləri çərçivəsində Əmək və Əhalinin Sosial Müdafiəsi Nazirliyinin sosial sifarişləri ilə hazırda Ağcabədi, Şəki və Şəmkir rayonlarında məişət zorakılığından zərər çəkmiş şəxslər üçün yardım mərkəzlərinin yaradılması işləri aparılır.
Məlumat üçün bildirək ki, ixtisaslaşmış qeyri-hökumət təşkilatları tərəfindən yaradılacaq bu mərkəzlərdə məişət zorakılığından zərər çəkmiş şəxslər reabilitasiya yönümlü sosial xidmətlərlə təmin ediləcəklər. Onlara hüquqi, sosial və psixoloji yardımlar göstəriləcək, normal həyata davam etmələri üçün zəruri işlər aparılacaq. Həmçinin məişət zorakılığından zərər çəkmiş uşaqlara digər həmyaşıdları kimi təhsillərini davam etdirmələrinə, bacarıqlarının inkişafına dəstək göstəriləcək.
Mehriban Zeynalova: “Məişət zorakılığından zərər çəkmiş şəxslər üçün yaradılacaq yeni yardım mərkəzləri də həm profilaktik, həm də pulsuz xidmət göstərmək baxımından məişət zorakılığına məruz qalan insanlar üçün əhəmiyyətli olacaq”
“Təmiz Dünya” İctimai Birliyinin rəhbəri Mehriban Zeynalova “Bakı-Xəbər”ə bildirdi ki, ölkə başçısının imzaladığı sərəncamın icrası istiqamətində həyata keçirilən işlər cəmiyyətin həssas təbəqələrinin problemlərinin həllində mühüm əhəmiyyət daşıyır. M.Zeynalovanın sözlərinə görə, məişət zorakılığından zərər çəkən şəxslərin böyük əksəriyyətinin bölgələrdə yaşadığı məhz belə yardım mərkəzlərinin regionlarda yaradılması müsbət qiymətləndirilməlidir. Məişət zorakılığından zərər çəkmiş şəxslər üçün yeni yardım mərkəzləri yaradılılmasının əhəmiyyətli cəhətlərindən danışan M.Zeynalova bildirdi ki, bu mərkəzlərdə məişət zorakılığı ilə üzləşən insanlara hər cür yardımlar göstəriləcək, onlarla və ailə üzvləri ilə bağlı tədbirlər həyata keçiriləcək. “Məişət zorakılığından zərər çəkmiş şəxslər üçün bölgələrdə yardım mərkəzlərinin yaradılması çox yaxşı haldır. Çünki əksər vaxtlarda görürsüz ki, zorakılığa mərzu qalan şəxsin problemi yerindəcə həll ediləcəyi halda daha da dərinləşir və belə insanlar Bakıya üz tuturlar. Yerlərdə belə yardım mərkəzlərinin yaradılmasının əhəmiyyəti ondan ibarətdir ki, problem dərinləşmədən onu həll etmək mümkün olur. Məişət zorakılığından zərər çəkmiş şəxslər üçün yaradılacaq yeni yardım mərkəzləri də həm profilaktik, həm də pulsuz xidmət göstərmək baxımından məişət zorakılığına məruz qalan insanlar üçün əhəmiyyətli olacaq. Biz hamımız deyirik ki, boşanmalar çoxdur. Boşanma, eləcə də məişət zorakılığı kimi hadisələrin qarşısının alınması üçün bu cür yardım mərkəzlərinin olması vacibdir. Təbii ki, həmin mərkəzlərdə işləyən kadr potensialının güclü olması da mühümdür. Amma bu mərkzələrin əhəmiyyəti məhz məişət zorakılığında qətl hadisələrinin baş verməməsi, uşaqların küçələrə düşməməsi, bütün zorakılıq qurbanlarının axışıb Bakıya gəlməməsi ilə bağlıdır”.
M.Zeynalova qeyd etdi ki, bu mərkəzlər məişət zorakılığına məruz qalan insanların həyatı üçün təhlükə gördükdə o zaman onları müvəqqəti sığınacaqlara istiqamətləndirməsi daha effektiv nəticə verəcək. O, hesab edir ki, bu mərkəzlər həm də zorakılıq qurbanları üçün yaradılan sığınacaqların işini yüngülləşdirəcək. “Bu mərkəzlər fəaliyyətə başladıqdan sonra biz artıq ikiqat iş görməyəcəyik. Biz o təhlükənin aradan qaldırılması, o insanların cəmiyyətə inteqrasiyası üçün çalışacağıq. Yəni o müddət ərzində baş verən məişət zorakılığında cinayət tərkibi varsa həmin məsələni də hüquq-mühafizə orqanları həyata keçirəcək.Yaxud ola bilsin ki, kiminsə ailəsində problemlər var, müdaxilələr çoxdur. Bəli, elə insanlar düşünmə dövrü üçün 15 gün, 1 ay müddətinə sığınacağa göndərilə bilərlər. Həmin müddətdə də mütəxəssislər həmin şəxsin ailəsini qoruyub saxlamaq üçün hər iki tərəflə işləyəcək. Amma indiyə qədər rayonlarda belə mərkəzlər olmadığı üçün hamı televizyadan eşidib ehtiyac oldu olmadı sığınacağa gəlməyə çalışırlar. Sığınacaq yaşayış yeri, yataqxana deyil, müvəqqəti yerdir. Bəzi adamların isə cəmiyyətə inteqrasiyası çətin olur. Onlar yaşadıqları mühitə öyrəniblər və onların reablitasiyası, inteqrasiyası öz rayonlarında həyata keçirilməlidir. Onları böyük şəhərdə problemlərlə, təhlükələrlə qarşılaşması halları daha çox oal bilər. Bu baxımdan, belə mərkəzlərin, yaradılmasının əhəmiyyəti çox böyükdür”-deyə M.Zeynalova bildirdi.
İradə SARIYEVA
