Son vaxtlar restoranlarda və rayonlarda keçirilən toy mərasimlərində, banketlərdə, ad günü məclislərində kütləvi zəhərlənmələrin sayı çoxalıb. Son olaraq Ismayıllı və Şəkidə keçirilən toy məclisində ümumilikdə 50-dən çox şəxsin zəhərlənməsi hadisəni misal göstərmək olar. Lakin bu, ilk hadisə deyil. Bundan əvvəl də bölgələrdə fəaliyyət göstərən şadlıq evlərində keçirilən toy məclisi zamanı zəhərlənmə hadisəsi qeydə alınıb.
Məlumat üçün bildirək ki, bir neçə gün əvvəl Şəkinin Çeşməli kəndində eyni toyda iştirak edən 21 nəfər qidadan zəhərlənib.
Bu günlərdə İsmayıllı rayonunda da toyda kütləvi zəhərlənmə olub. Səhiyyə Nazirliyinin yaydığı məlumatda qeyd olunur ki, zəhərlənmə ilə bağlı ümumilikdə 33 nəfər xəstəxanaya müraciət edib: “Səhər saat 9.30 üçün xəstəxanada ikisi uşaq olmaqla 4 nəfər qalıb. Onların yaxın zamanda evə buraxılacaqları gözlənilir. Qidadan zəhərlənmə ehtimalı ilə İsmayıllı Mərkəzi Rayon Xəstəxanasına müraciət edənlər həkimlərə bildiriblər ki, özlərini İsmayıllının Qəzli kənd sakini Müşfiq Sabəli oğlu Hüseynovun oğlu üçün keçirdiyi kiçik toy məclisində iştirak etdikdən sonra pis hiss ediblər".
Analoji hadisə avqustun ayının əvvəlində Qəbələnin Zərgərli kəndində keçirilən məclisdə də baş verib. Hadisə nəticəsində 26 nəfər Qəbələ Mərkəzi Rayon Xəstəxanasına çatdırılıb.
Avqust ayının 24-də Ağdaşın Cardam kəndində təşkil olunmuş sünnət toyunda zəhərlənmə faktı qeyd alınıb. Məclisdə iştirak edənlərdən təxminən 10 nəfəri zəhərlənmə diaqnozu ilə rayon xəstəxanasına çatdırılıb.
Qeyd edək ki, toylarda qidadan zəhərlənmə hadisəsi artıq tez-tez müşahidə olunur. Son bir ay ərzində ölkədə baş tutan xeyir məclislərində qeydə alınan zəhərlənmə hadisələri şadlıq evlərində süfrəyə təqdim olunan təamlara xüsusi nəzarət olunması məsələsini yenidən gündəmə gətirdi.
Adil Qeybulla: “Bəzən isə xarab olmuş qidalar hansısa formada emal edilib yenidən istifadə olunur”
Tibb elmləri doktoru, həkim Adil Qeybulla bildirdi ki, qida maddələrinin saxlanma qaydaları və hazırlanmasında xeyli problemlər mövcuddur: “Əslində, kütləvi zəhərlənmələrin əsasında dayanan faktor ilk növbədə qida maddələrinin dövriyyəsi ilə bağlıdır. Yəni bu, onların saxlanma qaydaları və hazırlanmasında baş verən pozuntularla əlaqəlidir. Təəssüflər olsun ki, yoxlamalara, çoxsaylı müxtəlif nəzarətlərə rəğmən qida maddələrinin keyfiyyət parametrləri aşağı düşməkdə davam edir. Bu gün ölkəmizin daxili məhsul ehtiyatını nəzərə alsaq, Azərbaycanın qida bazarı bərbad vəziyyətdir. Ona görə də bu cür hallar baş verir. Şadlıq evlərində, ictimai iaşə obyektlərində qidaların saxlanma qaydaları çox vaxt pozulur. Bayat qidalardan istifadə edirlər. Bəzən isə xarab olmuş qidalar hansısa formada emal edilib yenidən istifadə olunur. Bu haqda faktlar və məlumatlar da var. Bu zəhərlənmələrin hər biri fərdi olaraq araşdırılmalıdır. Zəhərlənmənin əsasında dayan fakt bilinməlidir. Məsələnin həlli hüquqi olmalıdır”.
Həmsöhbətimiz onu da əlavə etdi ki, hazırda şadlıq saraylarında və restoranlarda verilən qidaların 70 faizinin keyfiyyəti aşağıdır: “Toylarda şablon qidalar verilir. Ən çox da istidadə olunan məhsullardan biri toyuq ətidir. Demək olar ki, hər şeydə istifadə olunur. Kabablar köhnə ətlərdən çəkilmiş ola bilər. Yaxud da bu qidalar öncədən hazırlanır, lakin isti havalarda xarab olur. Şadlıq evlərində verilən qidaların 70 faizinin keyfiyyəti inanılmaz dərəcədə aşağıdır. Bunu açıq şəkildə etiraf eləmək lazımdır. Hesab edirəm ki, restoranlar ucuz məhsullar və qidalarla toyları yola vermək istəyir. Təbii ki, son anda əziyyəti əhali çəkir”.
Eyyub Hüseynov: “Şadlıq evlərinin bir çoxunda dünəndən qalmış salatlar masaya təqdim olunur”
Azad İstehlakçılar Birliyinin sədri Eyyub Hüseynov qeyd etdi: “Bu cür olayların baş verməməsi üçün cəld reaksiya mexanizmi yaradılmalıdır. Bu gün şadlıq evlərində olan qidaların əksəriyyəti sağlamlıq üçün təhlükə saçır. Əsasən salatlarla bağlı təhlükə olur. Əslində salatlar 3-4 saat ərzində qalmalıdır. Lakin şahidi oluruq ki, şadlıq evlərinin bir çoxunda dünəndən qalmış salatlar verilir. Ümumiyyətlə, şadlıq evlərində sifariş verənin hüququ yoxdur. Araşdırmalar aparmışıq ki, nəinki regionlarda, hətta Bakıda olan şadlıq evləri vətəndaşlarla heç bir müqavilə bağlamır. Ortada heç bir şərt, müqavilə, məsuliyyət olmadığından zəhərlənmə hadisələri baş verir”.
Günel CƏLİLOVA
