Ölkədəki radikal mövqeli siyasi təşkilat və partiyalar, demək olar ki, bütün fəaliyyətlərini virtual aləm üzərinə köçürüblər. Əksəriyyətinin normal ofisi belə olmayan həmin təsisatlar orada yazırlar, orada oxuyurlar, oradan da dağılışıb gedirlər. Bir növ, virtual siyasi partiya modelini qurublar. Ancaq bəllidir ki, belə siyasi mübarizə metodu olmur.
Canlı təmaslar, mütəmadi görüşlərin baş tutmadığı hansısa təsisatın tez bir zamanda sıradan çıxa biləcəyi kimdəsə şübhə doğurmur. Sözügedən qəbildən olan partiyalar üzvlərinin sayını süni şəkildə şişirtməyi də bu üsulla həyata keçirirlər. Məsələn, görürük ki, partiya funksionerləri onların siyasi təşkilatına üzv olmaqla bağlı çağırış edirlər. Elə həmin çağırışın altında elektron ərizə formasının linkini paylaşırlar. Yəni istənilən şəxs ora girib anketi doldura bilər. Anketdə ad, soyad və təşkilata niyə üzv olmasının səbəbindən başqa nəsə soruşulmur. Həmin blankı dolduran və ya adından doldurulan şəxs partiyanın üzvü sayılır. Çox maraqlıdır ki, partiyalar bununla bağlı tez-tez hesabatlar da verirlər. Həmin virtual anketlərin sayına əsasən üzvlərinin sayının durmadan “artdığını” qeyd edirlər. Məntiqlə həmin prosesdə şəffaf olmayan məqamlar var. Yəni istənilən şəxs başqasının yerinə həmin anketi doldura bilər. Bunun təsdiqi üçün hansısa sənəd tələb edilmir. Partiyalarla üzvlüklə bağlı tətbiq edilən bu metodu nə dərəcədə obyektiv və şəffaf saymaq olar?
Əhməd Şahidov: “Virtual anketlərə əsasən üzvlərinin sayının kəskin artdığını deyirlərsə, biz niyə bunu real mənzərədə görə bilmirik?”
İnformasiya texnologiyaları üzrə mütəxəssis Əhməd Şahidov “Bakı-Xəbər”ə açıqlamasında bildirdi ki, əslində, bu olduqca aktual məsələdir: “Dünyanın qloballaşan, innovativ texnologiyalarla ayaqlaşan zəmanəsində Azərbaycanın bəzi siyasi partiyaları guya həmin yeniliklərlə ayaqlaşdıqlarına dair rəy formalaşdırmağa çalışırlar. Əslində isə çox primitiv üsulla həm xalqı, həm də özlərini aldatmaqdan başqa nəsə etmirlər. Belə üsullarla üzvlərin sayını “artırmaq” sabun köpüyündən başqa nəsə deyil. Çünki istənilən şəxs başqa adlar yazmaqla anketi doldura bilər. Hətta məndə olan məlumata görə, bəzi partiyalarda xüsusi olaraq anket dolduran adamlar var. Fikir verirsinizsə, həmin məlumatlar heç bir üsulla yoxlanılmır. Ürəyin nə istəyir yaz, olursan partiyanın üzvü. Partiyanın üzvləri və tərəfdarlarının real sayı harada bilinə bilər? Seçkilərdə, onların keçirdiyi etiraz aksiyalarında. Biz son illər ərzində meydanda kütləvi izdihamın olduğunu görmürük. Onlayn anket isə saxtakarlıqdır. Bunu şəffaf etməyin yolu da var. Hər bir Azərbaycan vətəndaşının şəxsiyyətini təsdiq edən sənədin üstündə “fin kod” deyilən fərdi identifikasiya mövcuddur. Bu, hər bir vətəndaşa ayrıca verilir və 7 rəqəmdən ibarətdir. Anketlərə həmin “fin kod”u daxil etmək mümkün olsa, sonra vətəndaşın öz adına olan mobil nömrəsinə təsdiq mesajı göndərilsə, həmin kod vasitəsilə üzvlük təsdiqlənsə, bəlkə də buna ciddi yanaşmaq olardı. Bunların heç biri yoxdursa, deməli, ciddi göstərici deyil. Bir daha deyirəm, əgər həqiqətən onlar virtual anketlərə əsasən üzvlərinin sayının kəskin artdığını deyirlərsə, biz niyə bunu real mənzərədə görə bilmirik? Bunun həm də hüquqi bir əsası yoxdur. Bilirsiniz ki, partiya təkrar qeydiyyata alınanda onun üzvlərinin siyahısı və məlumatlar yazılı şəkildə blanklarda Ədliyyə Naziriliyinə göndərilir, orda yoxlanılır. Üzvlük belə olmalıdır. İnsan öz iradəsi ilə partiyaya gəlməlidir. Orada partiya funksionerləri onunla söhbət etməlidirlər. Bundan sonra ərizəsini təqdim etməlidir. Yalnız bundan sonra şəxs partiyaya üzv ola bilər”.
Məhəmmədəli QƏRİBLİ
