Aslan Əsədov: “Yol hərəkətinin təhlükəsizliyi baxımından hər kəs məsuliyyətini dərk etməli, qaydalara riayət etməlidir”
“Bu il yol-nəqliyyat hadisələrinin sayı 126 fakt, qəzalarda ölənlərin sayı 13 nəfər, xəsarət alanların sayı isə 157 nəfər azalıb”. Bu barədə Daxili İşlər Nazirliyində cari ilin 9 ayının yekunlarına və qarşıda duran vəzifələrə həsr olunmuş Kollegiya iclasında məlumat verilib.
Qeyd edək ki, ötən illərdə bu sahədə vəziyyət elə də xoş deyildi. Ancaq son zamanlar bu istiqamətdə aparılan işlər sayəsində yol-nəqliyyat hadisələrinin sayı əhəmiyyətli dərəcədə azalıb.
“Sükan arxasında əyləşənlər və piyadalar yol hərəkəti qaydalarına əməl etməyə başlayıb, bu da özünü statistik rəqəmlərdə göstərir”
Nəqliyyat eksperti Aslan Əsədov baki-xeber.com-a şərhində bildirdi ki, “Yol Hərəkəti” haqqında qanunda qeyd edilir ki, sürücü, piyada, hər bir yol hərəkət iştirakçısı təhlükəsizlik qaydalarına əməl etməlidir: “Yol hərəkətinin təhlükəsizliyi baxımından hər kəs məsuliyyətini dərk etməli, qaydalara riayət etməlidir. Təhlükəsizlik dedikdə sürət, ara məsafənin gözlənilməsi, nəqliyyat vasitəsinin nasaz olmaması və digər amillər nəzərdə tutulur. Piyadalar da yol hərəkəti qaydalarını özlərinə düşən hissəsini bilməli və o qaydalara əməl etməlidir. Yol qəza hadisələri əsasən surət həddinin sürücülər tərəfindən aşılmasına görə baş verir. Diqqətsizlik və o cümlədən yol infrasturukturunun düzgün qurulmaması da qəzaya şərait yaradan amillərdəndir. Sürət həddinin aşılması, manevr qaydalarının pozulması halları insanları ölümə aparan faktorlardır. Bununla yanaşı, qəzaların baş vermə səbəblərindən ən başlıcası məsuliyyətsizlikdir. Hər birimiz yollarda diqqətli, məsuliyyətli olmalıyıq. Maksimum dərəcədə səhhətimizdə narahatlıq baş verdiyi zaman yollara çıxmamalıyıq. Ümumiyyətlə, sürücülər və piyadalar bu vəziyyətlərdə qəza şəraitinin qurbanı olurdular. Çox sevindirici haldır ki, sükan arxasında əyləşənlər və piyadalar bu qaydalara əməl etməyə başlayıb. Bu da özünü statistik rəqəmlərdə göstərir. Ölümlə nəticələnən yol nəqliyyat hadisələrinin sayının azalması sevindirici haldır”.
Günel CƏLİLOVA
