İlqar Orucov: “Onun dövlətimizə qarşı gördüyü ziyanlı işlərdən biri də ona xidmət edən “alimləri” ən yüksək elmi adlara və titullara layiq görməsi olub”
Barəsində cinayət işi başlanılan, Səbail Rayon Məhkəməsinin qərarı ilə 4 aylıq ev dustaqlığı qətimkan tədbiri seçilən Prezident Administrasiyasının sabiq rəhbəri, Azərbaycan Milli Elmlər Akademiyasının (AMEA) keçmiş prezidenti, akademik Ramiz Mehdiyev 30 ildən artıq bir müddətdə Azərbaycan elmini kurasiya edib.
AMEA-da kimin müxbir üzvü, kimin akademik seçilməsinə onun qərar verdiyi gizlin deyil. Bunu elm adamları da deyib, ictimaiyyət də yaxşı bilir. Uzun illər AMEA-da seçkilər birbaşa onun tapşırıqı əsasında keçirilib, kimin hansı elmi titul almasını, kimin hansı vəzifələrə təyin edilməsini R.Mehdiyev müəyyən edib. AMEA-da keçirilən seçkilər zamanı yaranan ajiotaj, səs-küy, narazılıqlar, bəzən həqiqi alimlərin kənarda qalması, seçkidə iştirakına şərait yaradılsa da “səs ala bilməməsi” kimi məsələlər daim müzakirə mövzusu olub. Neçə-neçə layiqli alim müxbir üzvü, akademik elmi adlarına həsrət qalıb. Konkret ad çəkmək istəmirik, amma bilənlər bilir ki, kimlər nəzərdə tutulur. R.Mehdiyevin elmə “xidməti” elmimizi "kitayski alimlərlə" doldurmaq oldu. Onun himayəsi ilə neçə-neçə saxta akademik, neçə-neçə saxta müxbir üzvü, professor meydana çıxdı. Bu gün onun müxbir üzvü, akademik etdiyi şəxslər AMEA institutlarında, eləcə də AMEA-dan ayrılıb Elm və Təhsil Nazirliyinin balansına verilən elmi-tədqiqat müəssisələrində kifayət qədərdir.
“Həm Ramiz Mehdiyevin özündən, həm də saxtakarlıqla yüksək elmi titul və rütbələr verdiyi şəxslərdən bu adlar, titullar alınmalıdır”
Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə bildirdi ki, R.Mehdiyev uzun illər yüksək dövlət vəzifəsində çalışarkən öz əqidəsinə uyğun insanları məharətlə seçərək onları yerli və mərkəzi icra hakimiyyəti orqanlarında vəzifələrə təyin edib: “Ulu öndər Heydər Əliyevə sadiq insanlara qarşı fiziki və mənəvi terror həyata keçirib. Eyni zamanda onun dövlətimizə qarşı gördüyü ziyanlı işlərdən biri də ona xidmət edən “alimləri” ən yüksək elmi adlara və titullara layiq görməsi olub. Yaxşı xatırlayıram, bir dəfə də sizinlə bu barədə danışmışıq. Ramiz Mehdiyevin və onun yaxın adamlarının ulu öndər Heydər Əliyevi hakimiyyətə dəvət etməsi ilə bağlı heç bir çağırışda adlarını görmürük. Eyni zamanda 2003-cü ildə dövlət çevrilişinə cəhd zamanı iğtişaşlarla etiraz edən böyük elmi ictimaiyyətin Azərbaycan Elmlər Akademiyasının qarşısında dövləti dəstəkləmək məqsədilə keçirdiyi mitinqdə Ramiz Mehdiyevin himayə etdiyi və yüksək elmi adlar və titullar verdiyi adamların bir nəfərini görmədik. Onların bir dəfə də olsun dövlətçilik mövqeyindən çıxış etdiyini müşahidə etmədim. Onlar yalnız və yalnız Ramiz Mehdiyevə biət etmək yolunu tutmuşdular. Bu gün də həmin adamlar vəzifələrdədir. O, AMEA-nın prezidenti vəzifəsinə gələndə düşünürdüm ki, ahıl yaşında dövlətimizin ona olan etimadını doğruldacaq, eyni zamanda cənab Prezidentin onu Azərbaycanın ən yüksək mükafatı ilə təltif etdiyini nəzərə alacaq, burda başını aşağı salıb konkret olaraq işi ilə məşğul olacaq. Ancaq gəlib nə etdi? Akademiyada intriqa yuvası yaratdı, Akademiyanın dövlət resurslarını öz şəxsi ailə resursları kimi istifadə etməyə başladı və o zaman da etiraz edirdim, bildirdirdim ki, necə ola bilər, bu adamın qanunsuz əməllərinə Rəyasət Heyətinin bir üzvü belə səsini çıxarmır. Halbuki, AMEA kollegial sistemlə fəaliyyət göstərən bir qurumdur. Onların heç biri onun qanunsuz əməllərinə etirazlarını bildirmədi. Məntiqlə belə çıxırdı ki, həmin dövrdə AMEA-nın Rəyasət Heyətində məhz onun irəli çəkdiyi adamlar mövqe tuturdular. Təbii ki, onlar “rəhbərlərinin” əleyhinə danışmağa cürət etməzdilər. Ramiz Mehdiyevin “Suverenlik və Konstitusiya İli”ndə nəhayət ki, layiqli cəza alacağına əminəm. Ümid edirəm ki, suverenliyimiz, dövlətçiliyimiz üçün təhdid yaradan, müxtəlif dövlətlərin tapşırıqlarını Azərbaycanda çirkin şəkildə həyata keçirməyə çalışan, dövlətçiliyə zərbə vuran bu adam nəhayət ki, öz layiqli cəzasını alacaq, onun uzun illər elm sahəsində himayə etdiyi adamların da elmi adlardan və rütbələrdən məhrum ediləcəklərinə ümid edirəm. Çox istərdim ki, AMEA təcili olaraq bu məsələyə münasibət bildirsin, Cinayət Məcəlləsinin kifayət qədər ağır maddələri ilə ittiham olunan bu şəxsin akademik adından, elmi titul və rütbələrdən məhrum edilməsi ilə bağlı müvafiq qərar qəbul etsin. Yəni həm Ramiz Mehdiyevin özündən, həm də saxtakarlıqla yüksək elmi titul və rütbələr verdiyi şəxslərdən bu adlar, titullar alınmalıdır”.
İ.Orucov hesab edir ki, AMEA bu istiqamətdə öz sözünü deməlidir. O, ümid edir ki, AMEA-nın hazırkı rəhbərliyi bu mövqeyi nəhayət ki, nümayiş etdirəcək. “Ümid edirəm ki, AMEA rəhbərliyi təkcə Ramiz Mehdiyevə yox, onun elm sahəsində yaratdığı şəbəkəyə qarşı da öz mövqeyini ortaya qoyacaq”.
R.Mehdiyevin nə qədər əqidəli, dövlətçiliyə sadiq insanlara qarşı zərərli mövqedə olduğunu deyən İ.Orucov bildirdi ki, həmin insanların hüquqları gec də olsa bərpa olunacaq. “Hesab edirəm ki, illər uzunu saxta dövlətçilik sevgisi şineli altında fəaliyyət göstərənlərə qarşı da hüquq-mühafizə orqanları tədbir görəcək. Bu böyük bir şəbəkədir, onun başında duran şəxs kimi o şəbəkə də ifşa olunacaq, layiqli cəzalarını alacaqlar. Buna əminəm. İnanıram ki, gec də olsa haqq öz yerini tutacaq və onun elm sahəsində Azərbaycana vurmuş olduğu ziyanlar hüquqi müstəvidə öz qiymətini alacaq”-deyə İ.Orucov bildirdi.
İradə SARIYEVA
