Elyar İslamoğlu: “Təəssüf doğurucu və qınanılası haldır”
Jurnalist Sima Babayeva Feysbuk sosial şəbəkə hesabında əslən Naxçıvan Muxtar Respublikasının (MR) Şərur rayonundan olan 2006-cı il təvəllüdlü Tağıyeva Sədaqət İntiqam qızının orta məktəbdə təhsilini davam etdirməsində problemlə üzləşdiyini yazıb.
Sima Babayevanın yazdığına görə, S.Tağıyeva Türkiyənin İstanbul şəhərində fəaliyyət göstərən Hüseyn Cavid məktəbində 8 il təhsil alıb, sonra təhsilini Azərbaycanda - Bakı şəhəri Suraxanı rayonundakı 89 saylı tam orta məktəbdə davam etdirib, daha sonra isə 10-11-ci siniflərdə təhsilini Şərurda davam etdirmək məqsədilə attestatını götürüb ora gedib, Muxtar Respublikanın Təhsil Nazirliyinə müraciət edib, lakin müsbət cavab almayıb. Onun yazdığına görə, Naxçıvan MR təhsil naziri Elxan Nəcəfov Tağıyeva Sədaqət İntiqam qızı 18 yaşında olduğuna görə onun məktəbə qəbulunun mümkün olmadığını deyib, Bakıda verilən attestatın isə saxta olduğu bildirilib.
O, Sədaqətin valideyninin nazirliyə çağırıldığını və atasının sözügedən quruma getdiyini, lakin ona mənfi cavab verildiyini, nazirin gənc qızı məktəbə götürmədiyini, onlara qarşı kobud ifadə işlətdiyini yazır. Bundan sonra Sədaqətin atası İntiqam Tağıyev şikayət üçün Naxçıvan Ali Məclisinə gedib və problemin həlli üçün müraciət edib. “Orada hüquqşünas bildirib ki, nazir Elxan Nəcəfov Ali Məclisin sözünə, fikrinə məhəl qoymur”. Bu fikri də S.Babayeva yazıb.
Qeyd edək ki, S.Tağıyevanın üzləşdiyi problemlə bağlı sosial şəbəkə istifadəçiləri, ziyalılar mövqe bildirib və nazirliyin bu münasibətini tənqid edib, gənc qızın təhsilini davam etdirmək hüququnun təmin edilməli olduğunu yazıblar.
Məsələyə münasibət bildirən filologiya üzrə fəlsəfə doktoru, tanınmış ictimai fəal Elyar İslamoğlu “Bakı-Xəbər”ə bildirdi ki, Sədaqət oxumaq, təhsilini davam etdirmək istəyir, bunun üçün isə nazir ona dəstək verməli idi. E.İslamoğlu sosial şəbəkədə yayılan məlumata əsaslanaraq deyir ki, təhsil almaq istəyənə şərait yaradılmaması bu niyyətdə olanların hüquqlarının pozulması deməkdir. “Məlumatla sosial şəbəkələrdə tanış oldum və təəccübləndim ki, bir qız uşağının təhsilini davam etdirməsi, onun təhsil almaq hüququ necə əlindən alına bilər? Əslində, o qızın təhsilini davam etdirməsi üçün şərait yaradılmalıdır. Təəssüf ki, əksi baş verib. Bir qızın təhsilini davam etdirmək istəyinə qarşı çıxılması mənfi haldır. Qızların təhsilə cəlb edilməsi üçün dövlət qurumları da, ictimaiyyət də əlindən gələni etməlidir. Çünki elə bir həssas dövrdür ki, ataların bəziləri qızlarını erkən yaşda məktəbdən ayırıb ailə qurmağa məcbur edir. Biz bunun şahidiyik ki, indiyə qədər neçə qız nişanlandığına, toyu olduğuna görə valideynləri haqlı olaraq müfaviq qurumlar tərəfindən cərimələnib. Dövlət qurumları erkən nikahın qarşısını almaq üçün tədbirlər görür. Naxçıvanda yaşanan hadisədə isə məsələ fərqlidir, ata qızının təhsilini davam etdirməsini istəyir, amma onun qarşısı alınır. Bu təəssüf doğurucu və qınanılası haldır. Azərbaycan Respublikasının qanununda hər bir vətəndaşın təhsil almaq hüququ var, dövlət pulsuz, icbari ümumi orta təhsil almaq hüququnu təmin edir. Təhsil sisteminə dövlət tərəfindən nəzarət edilir. Amma təəssüflər olsun ki, bəzən bunu nəzərə almayanlar da olur. Vəzifəli şəxslərin etik davranış qaydaları deyilən bir qanun da var və bütün vəzifəli şəxslər istər vətəndaşla davranışına, istərsə də öz tabeliyində çalışanlarla rəftarına ciddi fikir verməli, davranış qaydalarına əməl etməlidir. Təəssüflər olsun ki, bəzən bəzi məmurlar, vəzifəli şəxslər etik davranış qaydalarına əməl etmir. Fikrimcə, etik qaydaları pozan məmurlar cəzalandırılmalıdır ki, bu başqalarına da dərs olsun”.
E.İslamoğlu qeyd etdi ki, ölkədə hər kəsin təhsil almaq hüququ təmin olunmalıdır, xüsusən də qızların təhsilinə xüsusi diqqət göstərməliyik: “Biz erkən nikahın, qızların 18 yaşları tamam olmadan ərə getmələrinin qarşısını almaq istəyiriksə onda hər kəs səfərbər olunmalıdır. Bizim ölkədə belə problemlər yaşanmamalıdır”.
E.İslamoğlu qeyd etdi ki, bütövlükdə bu məsələ ətraflı araşdırılmalıdır.
Leyla QARAXANLI
