İlqar Hüseynli: “Orda yerüstü qarajların, nəqliyyat vasitələrinin yerüstü parklamaların hazırlanması ilə bağlı məsələ…”
Prezident İlham Əliyevin imzaladığı Fərmanla “Azərbaycan Yerüstü Nəqliyyat Agentliyinin Nizamnaməsi”ndə edilən dəyişikliyə əsasən, Azərbaycan Yerüstü Nəqliyyat Agentliyinə (AYNA) Naxçıvanla bağlı yeni vəzifə həvalə edilib.
Dəyişikliyə görə, Bakı şəhərinin inzibati ərazisində və Naxçıvan Muxtar Respublikasında nəqliyyat qovşaqlarının (nəqliyyat mübadilə mərkəzlərinin), yeni avtomobil duracaqlarının (qarajlarının) yaradılması (layihələndirilməsi, tikilməsi) ilə bağlı tədbirlər görmək və onların cari vəziyyətinə nəzarəti həyata keçirmək Azərbaycan Yerüstü Nəqliyyat Agentliyinə həvalə edilib.
AYNA Bakı nəqliyyatında etdiyi və narazılıqla qarşılanan hansı qaydaları Naxçıvanda tətbiq etməməlidir?
“Hələlik Naxçıvanın ərazisində elə ciddi sıxlıq, elə bir katastrofik vəziyyət yoxdur ki…”
Sosial-iqtisadi sahə üzrə ekspert İlqar Hüseynli “Bakı-Xəbər”ə bildirdi ki, Fərmanın mətnində nizamnamənin dəyişikliyi ilə bağlı məsələ öz əksini tapıb. “Əslində, nizamnamə təməl sənəd olduğuna görə, o dəyişilərkən orda bütün detallar nəzərə alınır ki, yenidən həmin nizamnamənin təkmilləşdirilməsinə zərurət yaranmasın. Bu baxımdan, ölkə Prezidenti tərəfindən imzalanan AYNA-nın nizamnaməsindəki bu dəyişikliklə bağlı Fərmanda məhz Naxçıvana aid olan məsələ də öz əksini tapıb. Çünki AYNA-nın Naxçıvanda da fəaliyyəti var. Naxçıvan Azərbaycanın tərkib hissəsidir, Azərbaycanın subyekti olaraq həm də orda AYNA-nın qurumları fəaliyyət göstərir. Bu qurumlar, təbii ki, Azərbaycanın bütün ərazində olduğu kimi, istər nəqliyyat ötürücülərinin, istər dayanacaqların və istərsə də digər vacib dövlət əhəmiyyətli kommunikasiyaların qurulmasında iştirakçı ola bilər. Yəni burda hər hansı bir məhdudiyyət tətbiq edilmədən. Əgər fikir versəniz, Fərman təkcə Naxçıvana aid deyil, bütövlükdə nizamnamə dəyişikliklərində Bakıda da müəyyən işlərin görülməsi ilə əlaqədar məsələ var. Bu məntiqlə çıxış etsək və hansı qaydaların Naxçıvanda tətbiq edilməməsinə gəlsək, düşünürəm ki, bu hələ sadəcə nizamnamə dəyişikliyidir, burda dərhal hansısa fəaliyyətlərin icrasından söhbət getmir. Hesab edirəm ki, orda yerüstü qarajların, nəqliyyat vasitələrinin yerüstü parklamalarının hazırlanması ilə bağlı məsələ görünür uzun müddətli və gələcək strategiya üçün nəzərdə tutulub. Bilirsiz ki, Zəngəzur dəhlizinin (Tramp yolu) tam olaraq istifadəyə verilməsi, logistik mərkəzlərin genişlənməsi nəqliyyat axını, nəqliyyatın intensivliyini Naxçıvan istiqamətində artıracaq. Nəticə etibarı ilə orda dayanacaqların, strateji qorunan parklama məntəqlərinin yaradılmasına gələcək strategiyada ehtiyac olacaq. Amma hazırda hələlik Naxçıvanın ərazisində elə ciddi sıxlıq, elə bir katastrofik bir vəziyyət yoxdur ki, bu gün dərhal orda hansısa dayanacaqların və sairin inşaasına başlanılsın. Düşünürəm ki, bu, strateji məqsədlə verilmiş bir Fərmandır”.
İ.Hüseynlinin fikrincə, Fərmana əsasən, nizamnamə dəyişikliyinin əsas hədəfləri gələcəkdə Zəngəzur dəhlizi açıldıqdan sonra Naxçıvan istiqamətində nəqliyyat axınının artmasına hesablanmış bir məsələdir.
İradə SARIYEVA
