Kəmalə Ağazadə: "Ən əsası odur ki, "Uşaq hüquqları haqqında" Qanunda boşluqların aradan qaldırılması üçün..."
Azərbaycanda uşaq hüquqları ilə bağlı yeni norma və qaydaların müəyyənləşdirilməsi əsas məsələlərdən biri kimi daim müzakirə edilirdi. Əksər mütəxəsislər hesab edirdi ki, "Uşaq hüquqları haqqında" Qanunda dəyişiklik və əlavələrin edilməsi zərurətə çevrilib.
Məlum olduğu kimi, Prezident İlham Əliyev "Uşaq hüquqları haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının 2024-cü il 29 noyabr tarixli 78-VIIQD nömrəli Qanununun tətbiqi və "Uşaq hüquqları haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 1998-ci il 24 avqust tarixli 761 nömrəli Fərmanında dəyişiklik edilməsi haqqında Fərman imzalayıb.
Fərmana əsasən, müəyyən edilir ki, "Uşaq hüquqları haqqında" Azərbaycan Respublikası Qanununun 29-1-ci maddəsində və 43-cü maddəsinin ikinci hissəsində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Nazirlər Kabineti həyata keçirir.
Fərmanda qeyd edilir ki, Nazirlər Kabineti iki ay müddətində "Uşaq hüquqları haqqında" Azərbaycan Respublikası Qanununun 29-1-ci maddəsinə uyğun olaraq, dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələbləri müəyyən edib Azərbaycan Respublikasının Prezidentinə məlumat verməlidir.
Qanunda dəyişikliyin mahiyyəti nədən ibarətdi? Qanunda konkret olaraq nəyi dəyişdirəcəklər? Prezident tapşırıq verib ki, iki ay müddətində Nazirlər Kabineti təkliflərini versin. Uşaq hüquqlarının müdafiəsi sahəsində hüquqi müstəvidə nəyi necə dəyişəcəklər? Nəyin dəyişməyini istərdiz?
"Bu gün çətin tərbiyə olunan qızlar üçün ayrıca müəssisənin olması zərurəti var ki, bu, qanunda öz əksini tapmalıdır"
Azərbaycan Uşaqlar İctimai Birliyinin sədri Kəmalə Ağazadə "Bakı-Xəbər"ə bildirdi ki, "Mənim üçün edilən əlavələrin ən maraqlı tərəfi burda dövlət və qeyri-hökumət təşkilatlarının xidmətində olan müəssisələrə bir daha nəzər yetirmək, onların öz işlərini hansı keyfiyyətdə həyata keçirməsi barədə iki ay müddətində Prezidentə məlumatın verilməsidir. Ümid edirəm ki, araşdırma və monitorinqlər çox ədalətli keçiriləcək. Hər il Nazirlər Kabineti tərəfindən sosial xidməti həyata keçirən QHT-lərin xidmət sektoruna, deyək ki, sığınacaqlara monitorinq təşkil olunur. Səhv etmirəmsə, bu monitorinq qrupunda 6 dövlət təşkilatı - nazirlik və komitə təmsil olunur. O dövlət qurumlarının nümayəndələri gəlirlər, sığınacaqlara baxış keçirirlər. Bu monitorinqlər hər il Azərbaycan Uşaqlar İctimai Birliyinin uşaq sığınacağı reinteqrasiya mərkəzində həyata keçirilir. Bir dənə bizim binamızın olmaması, o standarta uyğun gəlməməsi məsələsi olur. Əlbəttə ki, mənim yerim yox idi. Amma ərazimiz var idi, bina tikə bilmirdik. Leyla Əliyevanın təşəbbüsü ilə artıq binamız inşa olunub və gələn ilin yanvar ayından biz fəaliyyətimizi bəlkə də Azərbaycanda analoqu olmayan o reabilitasiya mərkəzində həyata keçirəcəyik.
Hesab edirəm ki, bu Fərman çox vaxtında verilmiş bir fərmandır. Burada xidmətlərin keyfiyyətinin ölçülməsi və bu barədə iki ay müddətində cənab Prezidentə məruzə olunma məsələsini xüsusi təqdir etdim.
Deyim ki, "Uşaq hüquqları haqqında" Qanunda mexanizmlərin zəif olması sənəddə dəyişiklərin olmasına zəmin yaradıb. Bu gün çətin tərbiyə olunan qızlar üçün ayrıca müəssisənin olması zərurəti var ki, bu, qanunda öz əksini tapmalıdır". K.Ağazadə hesab edir ki, həmçinin çətin tərbiyə olunan oğlanlar üçün də belə bir müəssisənin yaradılmasına ehtiyac var. "Ümumiyyətlə, kiçik tipli xidmət müəssisələrinin olması daha çox önəmlidir, nəinki 150-200 uşağın bir arada olması. Düşünürəm ki, bu qanunda dəyişikliklərin edilməsi çox müsbətdir və İcra Hakimiyyətləri yanındakı komissiyalara müəyyən səlahiyyətlər verməklə eyni zamanda ştatın artırılmasını da yəqin, bu qanunla müəyyən qədər tənzimləmək olacaq.
Ən əsası isə odur ki, "Uşaq hüquqları haqqında" Qanunda boşluqların aradan qaldırılması üçün yenidən bu sənədə baxılması Nazirlər Kabinetinə tapşırılıb"-deyə K.Ağazadə vurğuladı.
K.Ağazadə ümid edir ki, bu qanunda olan boşluqlar əlavə dəyişikliklərlə aradan qaldırılacaq və ortaya mükəmməl hüquqi bir sənəd çıxacaq.
İradə SARIYEVA
