Son günlər yeni trend yaranıb, tələbələr müəllimlərinə şokolad və digər şirniyyatları sürpriz edirlər. Müəllimlər də gözləmədikləri bu situasiyaya olduqca xoş təəssüratla cavab verirlər, bəziləri isə narazılıq edir.
Bununla bağlı bir neçə video sosial şəbəkələrdə yayılıb.
Kamran Əsədov: "Məktəblər və təhsil qurumları TikTok kimi platformalarda akademik uğurların, innovativ layihələrin və şagirdlərin fərdi nailiyyətlərinin işıqlandırılmasını təşviq edə bilər"
Təhsil eksperti Kamran Əsədov "Bakı-Xəbər"ə şərhində bildirdi ki, son dövrlərdə TikTok-da şagirdlər arasında "şokolad trendi" kimi adlandırılan və şagirdlərin müəllimlərinə şokolad və şirniyyat təqdim etməsi ilə bağlı trendlərin yaranması, bir tərəfdən, müəllim-şagird münasibətlərindəki emosional bağın bir göstəricisi kimi görünə bilər. Şagirdlər bu yolla öz sevgilərini, minnətdarlıqlarını ifadə edirlər. Digər tərəfdən, bu trendin sosial mediada geniş yayılması təhsil sistemimizdə akademik dəyərlərin yerinə daha yüngül və əyləncəli mövzuların ön plana çıxdığını göstərir: "Bu hadisələrin trend halına gəlməsi və əsas mövzuya çevrilməsi təhsilin əsas məqsəd və mahiyyətindən yayınma risqini artırır. Şagirdlərin müəllimlərinə hörmət göstərməsi, onları sevməsi çox təqdirəlayiqdir. Amma bu hörmət və sevgi yalnız jestlərlə ifadə olunmamalı, əksinə, akademik nailiyyətlər və şagirdin öz inkişafı ilə daha mənalı hala gətirilməlidir. Akademik nailiyyətlər və təhsil problemləri ilə bağlı mövzular geniş auditoriyanın diqqətini cəlb etməkdə çətinlik çəkir, çünki bu tip mövzular sosial media üçün daha "ağır" hesab edilir. TikTok kimi platformalar isə daha çox vizual, dinamik və əyləncəli kontentə üstünlük verir. Nəticədə, bu cür yüngül mövzular viral olur, təhsilin əsas məqsədləri isə kölgədə qalır. Şagirdlərin və müəllimlərin daha çox təhsillə bağlı layihələrlə, akademik uğurlarla gündəmə gəlməməsi təhsil sistemində motivasiya mexanizmlərinin çatışmazlığını da göstərir. Akademik dəyərlərin şagirdlər arasında populyarlaşması üçün yeni metodikalar tətbiq olunmalı, texnologiya və sosial media vasitəsilə təhsil sahəsində yeniliklər təşviq edilməlidir. Məsələn, məktəblər və təhsil qurumları TikTok kimi platformalarda akademik uğurların, innovativ layihələrin və şagirdlərin fərdi nailiyyətlərinin işıqlandırılmasını təşviq edə bilər. Təhsil sistemi isə bu cür trendləri daha konstruktiv istiqamətə yönəltmək üçün tədbirlər görməlidir. Məsələn, akademik fəaliyyətlər, elmi layihələr, innovativ dərslər və texnologiya mərkəzli təşəbbüslər sosial media üçün maraqlı formatda təqdim edilə bilər. STEAM layihələri, robototexnika müsabiqələri və digər yaradıcı yanaşmalar şagirdləri həm sosial mediada aktiv, həm də təhsildə uğurlu edə bilər. Beləliklə, sosial medianın təsir gücü təhsilin inkişafına xidmət edə bilər".
Elşən Qafarov: "Məktəblərə uyğun olmayan elə vəziyyət yaranıb ki, bu videolara baxıb yenə də şükür edirəm"
Təhsil eksperti Elşən Qafarovun sözlərinə görə, müəllimlərə qarşı olan kobud rəftarlar, dərsin pozulması ilə bağlı videolardansa, bu kimi videolar daha yaxşıdır: "Ancaq 45 dəqiqə vaxt müəllimin əmək funksiyalarını yerinə yetirməsi üçün ayrılmış zamandır. Ümumitəhsil müəssisələrində 45 dəqiqənin 80 faizi tədris proqramlarının müəyyən edilməsinə, 20 faizi isə yorğunluğu aradan qaldırmaq üçün müəyyən hərəkətlərə sərf edilir. Eyni zamanda bu vaxt şagirdlərin mənəvi yetkinliyi üçün söhbətlərə ayrılmalıdır. Şəxsən bu trendi normal saymıram. Lakin bilməliyik ki, cəmiyyət sürətlə dəyişir. Ona görə də deyirəm ki, buna da şükür. Məktəblərə uyğun olmayan elə vəziyyət yaranıb ki, bu videolara baxıb yenə də şükür edirəm. Şəxsən mən müəllim olaraq bu anın videoya çəkilməsini istəməzdim. Bir sözlə, baş verənlər məni çox təəccübləndirmir".
Günel CƏLİLOVA
