Pərvanə Mustafayeva: "Bəzi işbazlar artıq pul qazanmaq üçün insanları şikəst edə bilərlər"
Gənclərin bir qismi idmançı kimi görünmək üçün ya bədənini şişirdir, ya da qulaqlarını sındırır. Gənc oğlanların bəzisi güləşçi kimi görünmək üçün bilərəkdən qulaqlarını sındırır. Bəllidir ki, güləşlə məşğul olanların adətən qulaqları əzik olur.
Məlumat üçün bildirək ki, Azərbaycanda bu işlə məşğul olanlar var. Belə ki, sosial şəbəkədə xüsusi səhifələr var ki, onlar "qulaqsındırma" xidməti təklif edir. Sözügedən şəxslər müxtəlif sosial platformalarda bununla bağlı səhifələr açaraq fəaliyyət göstərir. Məlumata görə, qulağın biri keyidici vasitə ilə 50 manata sındırılır. Qulaqda zədə, qırıq varsa qiymət dəyişir.
"Qulağı sındıranda içinə qan yığılır, qığırdaq qidalanmır və öz funksiyasını itirir, bu isə olduqca təhlükəlidir"
Həkim ekspert Pərvanə Mustafayeva "Bakı-Xəbər"ə açıqlamasında qeyd etdi ki, bu gün bir qisim gənclər özlərini fərqli göstərmək üçün müxtəlif üsullara əl atır: "Kimisi əzələ şişirdən dərmanlar qəbul edir, kimisi isə qulaqlarını sındırır. Bunu edənlər idmanla məşğul olmadıqları halda özlərini idmançı kimi göstərmək üçün bu xidmətdən istifadə edərək öz xarici görünüşlərində süni idmançı görünüşü yaratmağa çalışırlar. Bunun da əsas səbəbi həmin insanlarda natamamlıq kompleksinin olmasıdır. Özgüvən əskikliyi onları bu addına sövq edir. Onu da deyim ki, qulağı sındıranda içinə qan yığılır, qığırdaq qidalanmır və öz funksiyasını itirir. Bu olduqca təhlükəlidir. Bunu edənlər nəzərə almalıdır ki, qulaq sındırılanda mikrob keçə bilər, bu, hətta bəzən qulağın çürüməsilə belə nəticələnə bilər. Bu gün pulla bu xidməti təklif edənlər var. Psixoloji baxımdan zəif insanlar da özlərini sübut etmək üçün bu xidmətdən yararlanır. Hesab edirəm ki, aidiyyəti qurumlar bu məsələni diqqətə almalıdır. Qəsdən, bilərəkdən "qulaq sındıranlar" cəzalandırılmalıdır. Ola bilsin ki, bunu etdirən zərərlərindən xəbərsizdir, ancaq bəzi işbazlar artıq pul qazanmaq üçün insanları şikəst edə bilərlər".
Günel CƏLİLOVA
