Könül İsmayılova: "Uşaq toyda "oğru" dünyasından bəhs edən mahnıya oynayırsa, burda valideynin günahı var"
Sosial şəbəkələrdə toy məclislərinin birində uşaqların əlində "silah"la rəqs etməsini əks etdirən videogörüntü yayılıb. Həmin görüntü böyük müzakirəyə səbəb olub. Narahatlığa səbəb uşaqların Rövşən Lənkəranskiyə həsr olunan musiqili meyxanaya oynaması deyil, onların valideynlərinin uşaqlarının bu rəqsini gülə-gülə qarşılamasıdır.
Qeyd edək ki, məktəblilərin, gənclərin hər zaman "oğru" dünyasına marağı olub. Onlar özlərini məlum şəxslərə oxşadır, imitasiya edirlər. Cəmiyyətdə əsasən həmin şəxslərin həyat hekayələrinin və atdıqları addımların bir çox insanın psixologiyasına, fərd kimi formalaşmasına təsirsiz ötüşmədiyini müşahidə edirik.
"Oğru dünyası"na maraq həm də bizdə yayımlanan və Türkiyə istehsalı olan seriallardan qaynaqlanır"
Psixoloq Könül İsmayılova "Bakı-Xəbər"ə açıqlamasında qeyd etdi ki, son dövrdə uşaqların kriminal aləmə, bu tip yaşam tərzi keçirən insanlara marağı artıb: "Bəzən oğlan uşağı evində normal ata modeli görmür, onun gördüyü ata modeli anası ilə daim dava edən, evə normal qazanc gətirə bilməyən, boş işlər üzərində mübahisə yaradan biridir. Belə olan halda yeniyetmə müxtəlif seriallara baxır, seriallarda isə bu aləm təbliğ olunur, belə həyat tərzi sürənlər ucaldılır, yeniyetmədə də bu zaman ona bənzəmə istəyi yaranır. Onların həyat tərzi təbliğ olunur, mal varlığı, gücü-qüdrəti ağızdolusu təriflənir. İstər-istəməz azyaşlı uşaqlar kriminal avtoritetlərə bənzəməyə çalışır, onları təqlid edirlər. Ümumiyyətlə, gənclər yeniyetməlik dövrlərində bir seçim etməlidilər. Ya intellektual, ya da fiziki gücün daha üstün olduğu yolu özlərinə hədəf qoymalıdırlar. Kim intellektual səviyyəsinə güvənmir və bu sferada uğur qazanacağını düşünmürsə, avtomatik olaraq özünü doğrultmaq üçün "oğru aləmi" kimi hədəfi olur. "Oğru dünyası"na olan maraq həm də, bizdə yayımlanan və Türkiyə istehsalı olan seriallardan qaynaqlanır. Gənclər "Polat Alemdar", "Memati" kimi obrazlar yaratmağa çalışırlar. Özlərini onlara bənzədib, imitasiya edirlər. Burada insanın düşüncə bucağı çox önəmlidir. Fərd həmin serialdakı böyüklərə hörmət, vətənə-millətə sevgi kimi nüanslardan da özünə örnək götürə bilər. Yaxud da cibinə silah və ya bıçaq qoyub, aqressiv davranışlar da sərgiləyə bilər. Valideynlər evlərinə hansı filmlərin və qəhrəmanların buraxıldığına diqqət etməlidir. Bu gün dünyada elə filmlər təqdim etməyə başlayıblar ki, həmin mövzuda cəmiyyətin düşüncəsi formalaşır. Məsələn, elə bir mövzu ola bilər ki, şəxs həmin filmi izlədikdən sonra fizikaya, astronomiyaya marağı ola bilər. Bizdə də belə detallara diqqət edilməlidir. Bu nüanslara diqqət etsək, cəmiyyətdə aqressiya azalar. İnsanlar isə elmə və təfəkkürə yönələr. Uşaq toyda "oğru" dünyasından bəhs edən mahnıya oynayırsa burda valideynin günahı var. Valideyn övladlarına nəzarət etməlidir. Onlar uşaqlarının hansı musiqiləri dinlədiyini, hansı kitablar oxuduğunu, kimlərlə oturub-durduğunu bilməlidir. Buna valideyn məsuliyyət daşıyır. Sosial şəbəkədə yayılan görüntülərdə uşağın əlində silahla rəqs etməsində əsas məsələ silahın uşağın əlinə necə keçməsi, valideyn və ətrafdakıların isə hər şey normal imiş kimi ona əl çalmasıdır".
Günel CƏLİLOVA
