Akif Nəsirli: "İşsizlik aradan qalxacaq, əkilib-becərilən məhsullar ölkə iqtisadiyyatına töhfə verəcək"
Prezident İlham Əliyev "Torpaq icarəsi haqqında" qanunda dəyişiklik edilməsi haqqında qanunu təsdiqləyib. Yenilənmiş qanuna əsasən, işğaldan azad edilmiş ərazilərdə kənd təsərrüfatı təyinatlı torpaqlar sahibkarlıq subyektlərinə müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada investisiya müsabiqələri vasitəsilə icarəyə veriləcək.
Həmin ərazilərdə əhalinin məskunlaşdığı kənd və qəsəbə ərazi vahidlərinin sərhədləri daxilində yaşayış məntəqələrinə yaxın kənd təsərrüfatı təyinatlı torpaqlar müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada kənd və qəsəbə sakinlərinə (birillik və çoxillik əkinlərin aparılması üçün) güzəştli şərtlərlə icarəyə veriləcək.
Maraqlıdır, "Torpaq icarəsi haqqında" qanunun dəyişməsi aqrar sektora necə təsir edəcək? Ümumiyyətlə, bu dəyişikliyin nə kimi əhəmiyyəti var?
"Torpaq icarəsi haqqında" qanunun dəyişməsinin bir çox əhəmiyyəti var, bu qanun sayəsində sakinlər həmin yerə daha çox bağlı olacaq"
Liberal İqtisadçılar Birliyinin sədri Akif Nəsirli "Bakı-Xəbər"ə şərhində bildirdi ki, Azərbaycan hökuməti artıq böyük qayıdışa start verib. Işğaldan azad edilən ərazilərə keçmiş məcburi köçkünlərin köçürülmə prosesi davam edir: "Əhalinin məşğulluğunun təmin olunması vacib məsələlərdən biridir. Hazırda əhali işğaldan azad edilən ərazilərə kütləvi şəkildə köçürülə bilmir. Keçmiş məcburi köçkünlər hissə-hissə o ərazilərə köçürülür. Hazırki mərhələdə torpaq islahatı aparıb keçmiş məcburi köçkünlərə pay torpağı vermək mümkün deyil. Bu proses əhalinin tam yerləşdikdən sonra aparılacaq".
Həmsöhbətimizin sözlərinə görə, işğaldan azad edilən ərazilərdə torpaq islahatı aparılana qədər ərazidəki kənd təsərrüfatı torpaqlardan istifadə baxımından "Torpaq icarəsi haqqında" qanun hüquqi baza sayılır: "Sakinlər arasında hərrac keçiriləcək və onlara pay torpağı veriləcək. Bu təqdirəlayiq qərardır. Çünki işğaldan azad edilən ərazilərə köçürülən sakinlərin ən böyük problemi məhz işsizlik idi. Ancaq indi bu problem olmayacaq. Sakinlərin torpaq icarəyə götürüb, orda kənd təsərrüfatı ilə məşğul olmaq imkanları olacaq. Onu da deyim ki, sakinlər torpağı münasib qiymətə icarəyə götürə biləcək. Beləliklə, o torpaqlarda əkin-biçin işi aparılacaq və sakinlər öz iqtisadi fəaliyyətini quracaq".
Ekspert onu da əlavə etdi ki, "Torpaq icarəsi haqqında" qanunun dəyişməsinin bir çox əhəmiyyəti var. Belə ki,bu qanun sayəsində sakinlər həmin yerə daha çox bağlı olacaq. İşsizlik aradan qalxacaq, əkilib-becərilən məhsullar ölkə iqtisadiyyatına töhfə verəcək.
Günel CƏLİLOVA
