Son illər Azərbaycanda boşanmaların sayında artım müşahidə olunur. Bu məsələnin ictimaiyyət tərəfindən sosial şəbəkələrdə geniş müzakirə obyektinə çevrilməsi də bunu təsdiq edir. Boşanmaların kökündə duran problem müxtəlif olsa da, nəticə dəyişmir. Bütün hallarda mövcud tendensiya ürəkaçan olmasa da, boşanan insanların daha çox hansı yaş civarında olması maraq doğurur.
Dövlət Statistika Komitəsinin məlumatına görə, 60 və daha yuxarı yaş qrupundan olan kişilərdə 693, 54-59 yaş qrupundan olan kişilərdə 723, 50-54 yaş qrupundan olan kişilərdə isə 1111 boşanma halı qeydə alınıb.
50-54 yaş aralağında olan qadınların boşanma sayı 699, 54-59 yaş qrupundan olan qadınlarda 418, 60 yaş və yuxarı yaşdakı qadınların 2023-cü ildə boşanma sayı 366-dır.
Maraqlıdır, yaşlı insanların boşanmasına nə səbəb olur?
Könül İsmayılova: "Yaşlıların boşanmaya meyl etmələri yaxşı tendensiya deyil, bu, klassik Azərbaycan ailə dəyərlərinin zəifləməsinə gətirib çıxara bilər"
Psixoloq Könül İsmayılova "Bakı-Xəbər"ə şərhində bildirdi ki, son zamanlar boşanmaların say artımının səbəbləri var: "Təqaüd yaşına çatdıqdan sonra yeganə gəlirin təqaüd olmağı ciddi mənfi təsir göstərən faktordur. Almaq istədiklərini ala bilməmək, getmək istədikləri yerə gedə bilməmək, pulu daha ehtiyatla xərcləmək insanlarda qəzəb oyadır. Həqiqətən də araşdırmalar göstərir ki, tez-tez pul mübahisələri boşanma üçün güclü bir proqnozdur".
Həmsöhbətimizin sözlərinə görə, yaşlıların boşanmaya meyl etmələri yaxşı tendensiya deyil: "Bu, klassik Azərbaycan ailə dəyərlərinin zəifləməsinə gətirib çıxara bilər. Əvvəlcə bu insanlar "camaat nə deyər?" fikrinə görə boşanmırdı. İndi boşanmalar çoxalaraq insanların gözündə adiləşib, deyə onlar daha rahat boşanırlar. İndi boşanmayan, mehriban cütlüklərə qəribə baxırlar. Boşanma o qədər adiləşib ki, insan niyə boşanırsan sözünü deməyə çəkinir".
Əhməd Qəşəmoğlu: "İndi əksər insanlar ictimai qınaqdan çəkinmir və rahat şəkildə qərarlar qəbul edirlər"
Sosioloq Əhməd Qəşəmoğlunun sözlərinə görə, indi əksər insanlar ictimai qınaqdan çəkinmir və rahat şəkildə qərarlar qəbul edirlər: "Əsas problem ondan ibarətdir ki, cəmiyyətdə çox sürətli dəyişikliklər baş verir. Dəyərlərə münasibət dəyişir. Əvvəllər ailəni birgə və möhkəm saxlayan ailə daxilində mənəvi dəyərlərin üstün olması idi. İndi daha çox maddi dəyərlər ailəyə daxil olmaqdadır. Maddi məsələlər ailəyə daxil olduqda gərginlik yaranır. Eyni zamanda əvvəllər ictimai qınaq var idi. İnsanlar ictimai qınaqdan ehtiyat edirdilər. İndi ictimai qınaq yoxdur. Vaxtilə hər kəs ailə qarşısında öz borcunu bilirdi. İndi isə xaotik vəziyyət yaranıb. O cümlədən, ailələrdə uşaqlar da çox olurdu. Uşaq sayı çox olan ailədə qayğılar elə xarakterdə olurdu ki, insanlar bir-birinə daha çox bağlı olurdu. İndi ailələrdə uşaqların sayı azalıb. Bütün bunların hamısı və ailə üzvlərinin aldığı informasiyalar, informasiyaların xarakteri, ətrafda bu cür hadisələrə qarşı biganə münasibət xoşagəlməz vəziyyətə gətirib çıxarır".
Günel CƏLİLOVA
