Bakıda ödənişsiz parklama yerləri nəhayət yada düşdü...
Aslan Əsədov: "Bakıda ödənişsiz parklanma yerlərinin təşkil edilməsinin…"
Azərbaycanda avtomobillərin sayı gündən-günə artır. Amma avtomobillər çoxaldıqca özü ilə problemləri də gətirir. Bu problemlərin ən böyüyündən biri də avtomobillərin parklanmasıdır. Avtomobillər artır, avtomobili park etmək üçün yerlərin sayında isə, hələ ki, artım müşahidə olunmur.
Qadağan olunmuş yerdə parklanma edən hər bir sürücü bilməlidir ki, digər yol hərəkət işitirakçılarının, o cümlədən ictimai nəqliyyatın da hərəkətinə mane olur ki, bu da gün ərzində yüz minlərlə insanın mənzil başına vaxtında çata bilməməsinə, tıxaclara gətirib çıxarır.
Ərazidə avtomobilin park edilməsi üçün yer yoxdursa, o zaman sürücü maşınını qanunsuz olaraq haradasa saxlamağa məcbur olur. Parklanma yeri olmadığından insanlar inzibati xətaya yol verirlər. Bu da nəticə etibarilə sonradan onlara problem yaradır. Yəni avtomobil sahibləri cərimələnir və bu, narazılıqlara yol açır. Ona görə də avtomobillərin park edilməsi üçün xüsusi yerlər olmalıdır. Burada söhbət təkcə ödənişli parklardan getmir. Söhbət həm də ödənişsiz parklanma yerlərinin yaradılmasından gedir.
Məlumat üçün bildirək ki, Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) Bakıda 9 məntəqə üzrə 94 ödənişsiz parklanma yeri təşkil edib. Məlumata görə, 4-cü zonaya daxil olan Səbail rayonunun Mikayıl Useynov və Aqil Quliyev küçələrində müvafiq infrastruktur qurularaq avtomobillərin pulsuz park edilməsi üçün şərait yaradılıb. Bu ərazilərdə qiymət tənzimlənməsi tətbiq olunmur. 3 məntəqə fiziki imkanları məhdud sürücülərin avtomobilləri üçün nəzərdə tutulub.
Danılmaz faktdır ki, parklanma şəhərdə əsas problemlərdən biridir. Maraqlıdır, parklanma məntəqələrinin yaradılması problemi həll edəcəkmi?
"Ödənişsiz parklanma yerləri düzgün ərazilərdə salınarsa, insanlar şəxsi nəqliyyat vasitəsini saxlamaqla bağlı problem yaşamaz"
Nəqliyyat eksperti Aslan Əsədov "Bakı-Xəbər"ə şərhində bildirdi ki, Bakıda ödənişsiz parklanma yerlərinin təşkil edilməsi çox əhəmiyyətlidir: "Məlumdur ki, Bakıda avtomobil saxlamaq üçün yer tapmaq çətin məsələdir. Üstəlik, parklanma xidməti də çox bahadır. Ona görə də sürücülər avtomobillərini səkilərdə, hətta blokların və həyətlərin girişlərində saxlayırlar. Bakı şəhərində parklama artıq bir neçə aydır ödənişli olub. Hərəkət nə qədər əlaqəli, universal təşkil olunarsa, insanlar da bir o qədər rahat gediş-gəlişi təmin edəcəklər. Bir neçə dəqiqəlik avtomobili saxlamaqla sürücü cərimə olunurdu və bu da insanlar tərəfindən narazılıqla qarşılanırdı. Artıq bu problem qismən həll olunacaq. Ümumiyətlə, ödənişsiz parklanma yerləri düzgün ərazilərdə salınarsa, insanlar şəxsi nəqliyyat vasitəsini saxlamaqla bağlı problem yaşamaz".
Günel CƏLİLOVA
