Yatağım daş,
dostum silahım,
sevgilim Vətən,
Kəfənim formam....
imza Fərid İbad oğlu İlyasov. (20.07.1999—28.10.2020)
Artıq dördüncü ildir ki, sentyabrın 27-dən noyabr ayının sonuna qədər Vətən müharibəsində şəhidlik zirvəsinə ucalan igid oğullarımızın anım mərasimləri bütün bölgələrimizdə coşquyla, qürurla qeyd edilir. Bu gün də 2-ci Fəxri Xiyabanda uyuyan Fərid Qubad oğlu İlyasovun əzizlərinin,ictimaiyyətin iştirakı ilə təşkil olunmuş anım mərasimində yaşananlar diqqət şəkdi. Narın yağan yağışın altında öncə müqəddəs kitabımız Qurani-Kərimdən Şəhidlərimizin ruhuna dualar və ardından Dövlət himnimiz oxundu.
Fəridin keçdiyi qısa, eyni zamanda ləyaqətli ömür salnaməsindən danışıldı.
Abşeron rayon İH-nin Vətən müharibəsi iştirakçıları və Şəhid ailələrilə işinn təşkili şöbəsinin müdiri Kərim Kərimov, Fərid İlyasovun komandiri polkovnik leytenant Əlimirzə Sadıxov, Fərid İbad oğlunun qan qohumları babası Əlövsət İbrahimov, dayısı Faqət İbrahimovun çıxışları hər kəsin içini göynətdiyi qədər eyni zamanda qürurverici idi. 1-ci sinif şagirdi Rahim Məmmədzadənin çıxışı və Fərid İlyasova həsr olunmuş şeiri coşquyla ifası, tam əminliklə deyirəm ki hər kəsin yaddaşında əbədi həkk olundu.
Mərasimdən öncə şəhidimizin anası Bəsirə xanıma yaxınlaşdım.
- Bəsirə xanım, artıq 4-cü ildir ki Fəridin şirin, həm də nisgil dolu xatirələrilə yol gedirsiniz. Dörd yüz il keçə də bala itkisinin acısı keçən deyil, həm də Fərid kimi igid balanın. Bu illər ərzində az da olsa təsəlli tapa bildinizmi Laçın torpağı düşmən tapdağından azaddır və bildiyim qədəriylə həsrətində olduğunuz o mübarək torpağı ziyarət etmisiniz. Həm də Laçını bircə dəfə də görməyən, ancaq Laçın sevgisini Qarabağ sevgisini hələ hərbi xidmətdən öncə" Yatağım daş,
Kəfənim formam, Əvvəlcə Vətən, sonra Ana deyən Fərdsiz. Hansı hissləri keçirtdiniz?
- Jalə xanım, mənə elə gəlir ki, hələ də 2020-ci ildəyəm. Bir ömür boyu bundan sonra alacağım nəfəs də ancaq onlarla bağlıdır. Nə dilim, nə də ürəyimin güçü çatmaz o ağrını, o həsrəti ifadə etməyə. Bu il Laçına getdim. Azad olmuş torpaqlarımızı ziyarət edərkən içimdə ağrı-acılarım məni bir an tərk etməsə də qürur hissi də keçirtdim. Yəni Qarabağımızın azad olmasında mənim balamın da payı olduğu hissini də yaşadım və qürur duydum. Həm də təkcə Fəridi deyil bütün oğullarımızı, onların vətənə olan böyük sevgisini hər atdığım addımda düşündüm və belə oğullarımızla qürur duydum. Onlar heç düşünmədilər ki bizim üçün onlarsız həyat çox çətin olacaq, yalnız bircə istəkləri var idi o da torpaqları azad etmək. Söz verdilər və qanları, canları bahasına vədlərinə əməl etdilər. Mən bütün şəhid, qazı balalarımızla qürur duyuram, onlara olan ana məhəbbətimi ifadə etməkdə çətinlik çəkirəm.
Jalə CƏFƏROVA
Milli Mədəniyyətin Təbliği İB -nin rəhbəri, filologiya üzrə fəlsəfə doktoru
P.S. Biz də sizin kimi valideynlərlə qürur duyuruq, Bəsirə xanım. Ömründə bircə dəfə ayağı Qarabağ torpağına dəyməyən ,o büllur kimi şəfalı bulaqlarını dadmayan, cənnət qoxulu havasını bircə dəfə içinə çəkməyən ,Laçını görmək eşqiylə yaşayan Fəridimizi ən çətin şəraitdə böyüdüb, tərbiyə edib, vətənə ölçüyəgəlməz sevgiylə bağlanan Fəridimizi bizlərə qürur yerimiz kimi sevdirən anamızın və analarımızın haqqı ödənməz, əsla ödənməz !!!
