Pərvanə Mustafayeva: "Tibb bacısı olmaq istəyən şəxslər qanuni yolla imtahan verərək istəklərini reallaşdıra bilərlər"
Son illər Azərbaycanda tibbi kurslar geniş yayılmaqdadır. Elə bu kurslara getməyə maraq göstərənlər də az deyil. Nədənsə, ali təhsil almayanlar peşə məktəblərini deyil, bu cür kursları seçirlər. Onların bəziləri sertifikat, bəziləri isə hətta diplom verəcəklərini bildirirlər.
Elanlarda isə ən çox tibb bacısı, diş texniki, əczaçılıq, mama-ginekoloq ixtisasları üzrə kurslara dəvət edirlər. Sertifikat və diplomun tanınmasına zəmanət verilmir.
Maraqlıdır, bu kursları bitirən şəxslərə verilən sənədlər nə qədər etibarlı sayılır?
"Təşkilatın nəzdində, yaxud müstəqil şəkildə fəaliyyət göstərən özəl tibb kurslarında peşəkar mütəxəssis hazırlanmasından söhbət gedə bilməz"
Tibbi ekspert Pərvanə Mustafayeva "Bakı-Xəbər"ə şərhində bildirdi ki, Sovet dövründə ali və orta tibb məktəbi deyilən bir anlayış olub, buna uyğun da kolleclər, texnikumlar və sair yaradılıb. "Bundan sonra da iki kateqoriya ali məktəblər tipi olmalıdır. Biri tibb bacıları, tibb qardaşları, orta tibb mütəxəssisləri, digəri isə həkim hazırlamaq üçündür. Həkim hazırlamaq, əvvəla, baza tibb təhsili - rezidentura sistemindən keçir. Bu mürəkkəb bir sistemdir, Qərb sistemidir. Yəni biri nəzəri fənlərin öyrənililməsi, digəri isə praktik fəaliyyətdir. Tibb bacılarının hazırlanmasında da qayda belədir. Ona görə də, məsələn, Türkiyədə tibb bacılarının təhsili 4 ilə yaxındır. Yəni bu, Tibb Universitetinin nəzdində də baş verə bilər. Ona görə də, necə adlandırılmasından asılı olmayaraq, onlar öz təhsil standartlarını həyata keçirirlər. Hansısa təşkilatın nəzdində, yaxud müstəqil şəkildə fəaliyyət göstərən özəl tibb kurslarında peşəkar mütəxəssis hazırlanmasından söhbət gedə bilməz. Bu kursların diplomları tamamilə qanunsuzdur. O kursların verdikləri diplomlar heç bir yerdə qeydiyyatdan keçməyib. O diplomların heç biri tibb bacısı olmaq üçün əsas sayıla bilməz. Yəni rəsmi qeydiyyatdan keçmiş, reyestrə düşmüş şəxslərin diplomları qanunidir".
Ekspertin sözlərinə görə, dövlət və özəl tibb məktəbləri yalnız texniki standartlarla təhsil şərtlərini yerinə yetirdikləri halda müvafiq strukturlarda - Elm və Təhsil Nazirliyində və Səhiyyə Nazirliyində qeydiyyatdan keçirlər: "Ondan sonra onların diplomları ölkə ərazisində tanına bilər. Dünya standartlarına uyğun fəaliyyət göstərməliyik. Tibb bacısı olmaq istəyən şəxslər qanuni yolla imtahan verərək istəklərini reallaşdıra bilərlər. Qardaş Türkiyə, Avropada tibb bacıları yüksək vəzifəli şəxslər arasından seçilir. Onlar təxminən iki, hətta 4 il müddətində təhsil alırlar. Hesab edirəm ki, Azərbaycanda da bu metoddan istifadə edilməlidir".
Günel CƏLİLOVA
