Tural İrfan: "Orta məktəblərdə normal dini maarifləndirmə sahəsində proqram hazırlanmalıdır, bu yoxdur deyə…"
Təhsil müəssisələrində dini təhsil adı altında şagird və tələbələrə dini mesajlar verilməsi yolverilməzdir. Bunu elm və təhsil naziri Emin Əmrullayev "Müasir dini təhsil modelləri ənənələr və qlobal çağırışlar kontekstində" mövzusuna həsr olunan respublika elmi-praktik konfransında deyib.
Nazir bildirib ki, valideynlər daim övladlarına dini təhsil səviyyəsi barədə nəzarət etməlidir: "Çünki sinif otağında qapı bağlıdır və müəllim öz fənnini tədris edir. Amma biz bilmirik din adı altında uşaqlara nə aşılanır".
Maraqlıdır, təhsil müəssisələrində dini təhsil adı altında şagird və tələbələrə dini mesajlar verilməsi problemi necə həll olunmalıdır?
"Orta məktəblərdə, digər dünyəvi təmayüllü ali təhsil ocaqlarında proqrama daxil edilməyibsə dini tədris qanuna ziddir"
Ilahiyyatçı Tural İrfan "Bakı-Xəbər"ə açıqlamasında qeyd etdi ki, orta məktəblərdə, digər dünyəvi təmayüllü ali təhsil ocaqlarında proqrama daxil edilməyibsə dini tədris qanuna ziddir: "Dini təhsil üçün ölkəmizdə İlahiyyat İnstitutu və İlahiyyat Kolleci fəaliyyət göstərir. Mənəvi Dəyərlərin Təbliği Fondu var ki, maarifləndirmə sahəsində işlər görür. Orta məktəblərdə də dinlər haqda obyektiv məlumatlar verilməsi üçün dəfələrlə təklif vermişik. Amma hələ ki, kadr çatışmazlığı və başqa həssas nüanslara görə bu təklifə müsbət yanaşılmır. Müəllim öz inancına uyğun olaraq, yaxud başqa inancları şagirdlərə sirayət etdirib özünün istifadə etdiyi dini atributlara pərəstiş cəlb etməməlidir. Orta təhsil dünyəvi xarakter daşıyır və proqram var. Bundan kənara çıxmaq olmaz. Müəllimlərin arasında inanclı olanlar da var. Amma məlumdur ki, İslam aləmi məzhəblərə bölünüb. Şübhəsiz ki, müəllimin özü də hansısa məzhəbə tabedir. Demək tədris zamanı dini anlatsa, özünün etiqad etdiyi cərəyanı anladacaq. Və ziddiyyət yaranacaq. Hər bir halda gizli dini təbliğat mümkün deyil. Orta məktəblərdə yığılan pullar gizli deyil. Dərs keçilmir, uşaqlar repititor yanına gedir, bu da gizli deyil. Elə bilirəm ki, gizli dini təbliğat aparan müəllimlər də gizli qalmaz. Ancaq tərbiyə xarakteri, pis vərdişlərdən çəkindirmək üçün müəllim ənənəmizə uyğun olaraq şagirdə Allahdan, Peyğəmbərdən, Qurandan ibrət gətirib nümunə göstərə, onu doğru yola təşviq edə bilər. Daha bunu da qadağan etsək onda din nə üçündür? Yalnız ölü basdırmaq üçün? Xeyr, belə deyil. Mənəvi dəyərlərimizin tərkibi olaraq dini dəyərləri gənclərə, şagirdlərə aşılamaq lazımdır. Din fitri ehtiyacdan doğur. Bu ehtiyacı vaxtında ödəməsən o gənc ya radikal. ya da xurafatçı təbliğatın qurbanı olacaq. Odur ki, orta məktəblərdə normal dini maarifləndirmə sahəsində proqram hazırlanmalıdır. Bu yoxdur deyə şagird soruşur, müəllim də məcbur olur danışmağa. Yaxud hansısa şagird kənarda dini təbliğatın təsirinə düşüb gəlib məktəbdə özünü ifadə edir. Bu zaman müəllim də məcbur olacaq ona nəyisə izah etməyə. Bax bu kimi hallar onu göstərir ki, orta məktəblərdə dinlər tarixi, fəlsəfəsi haqqında yuxarı siniflərdə proqrama fənn salınmalıdır".
Günel CƏLİLOVA
