İndiyədək verilmiş "Halal" sertifikatlar ləğv olunur(?)
Eyyub Hüseynov: "Əvvəllər pul qarşılığında verilən "halal" sertifikatların hamısı ləğv olunmalıdır"
Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Standartlaşdırma İnstitutunun "AZSTANDART Halal" Sertifikatlaşdırma Orqanı beynəlxalq akkreditasiya tələblərinə cavab verən "Halal" sertifikatını təqdim etmək hüququnu əldə edib.
Bundan sonra halal sertifikatının verilməsi yeni qaydalar əsasında həyata keçiriləcək. Bu, indiyədək halal sertifikatı alan müəssisələrin fəaliyyətini də sual altına qoyur.
Maraqlıdır, bu vaxta qədər verilən "Halal" sertifikatı necə olacaq?
"Yenidən müəssisələrdə monitorinqlər keçirilməlidir və inancı olan insanların aldadılmasının qarşısı alınmalıdır"
Azad İstehlakçılar Birliyinin (AİB) sədri Eyyub Hüseynov "Bakı-Xəbər"ə açıqlamasında bildirdi ki, bu vaxta kimi verilmiş saxta "halal" standartları ləğv edilməli, yenidən müəssisələrdə monitorinqlər keçirilməlidir və inancı olan insanların aldadılmasının qarşısı alınmalıdır: "Məlumdur ki, bir çox malların istehsalında qida əlavələri istifadə olunur. Onların çeşidləri 3 mindən artıqdır. Bunların əldə olunma mənbələrinin izlənməsi məsələsi sual altında qaldı. İllər boyu Azərbaycanda "halal" sertifikatı vermək adı ilə müxtəlif xarici və yerli MMC-lər fəaliyyət göstərib. Qafqaz Müsəlmanları İdarəsi də illər boyu bu işlərin içində yer alıb. 8 il bundan öncə Azad İstehlakçılar Birliyi məsələ qaldıraraq bu sahədə şəffaflıq yaradılması məsələsini ortaya qoydu. Kollegial olaraq, KİV-in iştirakı ilə şəffaf heç bir müqavilə olmadan ictimai əsaslarla 5 müəssisəyə "halal" sertifikatının müəyyən monitorinqlərdən sonra verilməsinə nail olduq. Onun laborotoriyaları, müəyyən mütəxəssisləri də var. Lakin ondan sonra məsələ yenə də dayandırıldı və son il yarımda İqtisadiyyat Nazirliyi yanında Standartlaşdırma İnstitutunda yenidən "halal" standartın yaradılması məsələsinə toxunuldu. Bu standart Standartlaşdırma, Metrologiya və Patent üzrə Dövlət Komitəsi olan zaman qəbul edilmişdi. Bu məsələdə mən də iştirak edərək, təkliflərimi vermişəm. Biz təkliflər vermişdik ki, bu standartlarda onurğasızların, zürafə qoşadırnaqlı gövşəyəndir, onun əti halaldırmı, ya deyilmi məsələsi qoyuldu. Daha sonra təklif edildi ki, "halal" standartlarla mal istehsal edilən müəssisədə onlayn izləmə sistemi olsun və müxtəlif inanca sahib olan insanlar oranı izləyə bilsin. Halal mal istehsal edən müəssisənin bank kredit borcu olmamalıdır. Çünki İslam qaydalarında kredit məsələsi halal hesab olunmur. Lakin bunlar, çox təəssüf ki, nəzərə alınmadı".
Birlik sədri hesab edir ki, əvvəllər pul qarşılığında verilən "halal" sertifikatların hamısı ləğv olunmalıdır: "Ümumiyyətlə, dövlətin qanunları çərçivəsində şəffaf halal standartın verilməsi təmin olunmalıdır. Hərçənd, bundan sonra verilən sertifikatların halallığına da tam əmin olmaq mümkün deyil. Bu, aidiyyəti dövlət qurumlarının sözügedən işi necə təşkil edəcəklərindən asılıdır. Üstəlik, yeni halal standartın qəbulunda bizim müəyyən təkliflərimiz olub. Məsələn, halal standartlarda onurğasızlar nəzərə alınmayıb. Halal sertifikat o müəssisəyə verilməlidir ki, həmin şirkətin onlayn izləmə sistemi olsun. Yəni dünyanın istənilən yerindən insanlar məhsulun necə hazırlandığına əmin olmalıdırlar".
Günel CƏLİLOVA
%22%2C%22image%22%3A%22https%3A%2F%2Fwww.baki-xeber.com%2Fmedia%2Fuploads%2Fposts%2F2024-10%2Fhalal.webp%3Fv%3D1733900919%22%2C%22iframe_v2%22%3Afalse%2C%22iframe_v3%22%3Afalse%2C%22t%22%3A0%2C%22cg%22%3A%7B%22isPrivate%22%3Atrue%2C%22browserName%22%3A%22Chromium%22%7D%7D%2C%22config%22%3A%7B%22page_url%22%3A%22https%3A%2F%2Fwww.baki-xeber.com%2Fsosial%2F218906.html%22%2C%22referrer%22%3A%22%22%2C%22user_id%22%3A%22fba666fa-4a05-46ae-beef-884161e003f6%22%2C%22iframe_user_id%22%3Atrue%7D%7D&cb=0.3757347748225801){kind=spacer}