"Mən yer üzündə müəllimdən yüksək ad tanımıram". Heydər Əliyev
Həyatda hər kəsin ustadı, müəllimi, düzgün yol göstərəni, istiqamət verəni olur. Keçib gəldiyimiz yola dönüb baxanda o yolun başlanğıcında bizə doğma, əziz və mehriban, müqəddəs, xeyirxah olan müəllimlərimizi görürük. Belə gözəl müəllimlərdən biri də Yeganə Cabbar qızı Məmmədovadır.
Müəllim, ilk növbədə, tərbiyə edəndir, böyüməkdə olan gənc nəsli öz xalqının yolunda sabahlara hazırlayan memardır.
İşlədiyi təhsil sahəsində sözün əsl mənasında iz qoymuş bu bənzərsiz insan dərs dediyi hər bir şagirdin yaxın dostu, sirdaşı yol göstərəni olmuşdur.
Ölkəmizin ictimai-siyasi həyatında önəmli rol oynayan, dövlət quruculuğunda əzmlə çalışan neçə-neçə tanınmış insanlar Yeganə müəllimənin yetirmələridir. Onların əksəriyyəti öz müəllimlərini unutmur, tez-tez onunla əlaqə saxlayır, əlamətdar günlərdə Yeganə xanıma baş çəkir, onu təbrik edirlər.
Ümumiyyətlə, müəllim haqqında, müəllimlik barədə gözəl sözlər deyilib, müxtəlif ifadələr səslənib. "Müəllim sözünü müqəddəs sayanlar həmişə çox olub. Müqəddəs olan müəllim adını uca tutan, onu şərəfləndirən insanlardır. Vaxtilə Peyğəmbər əfəndimiz də deyirdi ki, kim mənə bir hərf öyrətsə, mən ona qul, kölə olaram".
Bu yazdığım fikirləri Yeganə xanıma aid edirəm.
O, 1981-ci ildə Bakı şəhərində anadan olub. N.Nərimanov rayonundakı 82 saylı tam orta məktəbi başa vurub. 1998-ci ildə Azərbaycan Dövlət Pedaqoji Universitetinin ibtidai təhsilin pedaqogikası və metodikası fakültəsinə daxil olmuşdur. Ali məktəbi bitirdikdən sonra Abşeron rayon Xırdalan şəhəri 2 saylı tam orta məktəbdə fəaliyyətə başlamışdır.
Paralel olaraq 2013 – 2018-ci illərdə Xırdalan şəhərində yerləşən "Zirvə" liseyində ibtidai sinif müəllimi kimi işləmişdir. Həmin liseydə, həmçinin ibtidai siniflər üzrə metodbirləşmə vəzifəsini də icra etmişdir.
2015-ci ildə müəllimlərin diaqnostik qiymətləndirilməsi imtahanından yüksək bal toplamışdır. Hazırda Xırdalan şəhəri 11 saylı tam orta məktəbdə fəaliyyətini uğurla davam etdirir. Yeganə xanım gözəl müəllimə, daim təhsildə yenilik axtaran, onu tətbiq edən səriştəli, bacarıqlı, intellektual biliyə malik olan və sadəliyi ilə fərqlənən bir insandır.
Xüsusən, onun müəllimlərə və şagirdlərə yanaşma tərzi, münasibəti və qayğıkeşliyi diqqəti cəlb edir. O, öz sənətinin vurğunu olmuş, müəllimlərin daima şərəf və ləyaqətini qoruyan, təhsil sahəsində yeniliyə dəyər verən şəxs kimi tanınır. Hazırda çalışdığı Abşeron rayonu, Xırdalan şəhəri 11 saylı tam orta məktəbinin ibtidai sinif müəllimi kimi böyük nüfuza malikdir.
Bir məsələni də qeyd etmək istəyirəm ki, Yeganə müəllimə gənclərlə işləməyə çox önəm verir. Daima onlara nəzarət edir, gələcəkləri ilə bağlı dəyərli məsləhətlərini də verir. "Gənclər bizim gələcəyimizdir" devizi altında davamlı olaraq gənclərin hərtərəfli inkişaf etməsinə, millətinin layiqli övladı olmasına, savadlı vətəndaş kimi formalaşmasına çalışır.
Yeganə müəllimin islamı əxlaqi, nümunəvi davranışı, səxavətli olmağı bir ölçü meyarıdır. Bu şərəf hər adama qismət olmur.
Təhsilimiz yeni-yeni nailiyyətlər qazanır. Bütün bunlar öz şüurlu həyatını gənc nəslin təlim-tərbiyəsinə verən təcrübəli təhsil işçisi Yeganə müəllimi də sevindirir.
O, böyük arzularla dolu ürəyi ilə təhsilimizin gələcəyinə inanır və onun dünya təhsil səviyyəsinə qaldırılması yolunda çalışanların səyinə qoşulur və bunun uğurunda fədakarlıqla çalışır.
Çox hörmətli Yeganə xanım.
Sizi müəllimlərin peşə bayramı münasibətilə ürəkdən təbrik edir, uzun ömür, cansağlığı, təhsilimizin inkişafında uğurlar diləyirəm.
Elşad DAĞLI
Azərbaycan Yazıçılar və Jurnalistlər Birliklərinin üzvü, "Cabir Novruz" Mədəniyyət Fondu mətbuat xidmətinin rəhbəri.
