Azər Allahverənov: "Rusiya höküməti miqrasiya sahəsində nizam-intizam yaratmaq fikrindədir"
Rusiyada ikili vətəndaşlıq qadağan edilə bilər. Belə ki, ictimai fəallar "Rusiya Federasiyasının vətəndaşlığı haqqında" Federal Qanunun 10-cu maddəsinin ikinci hissəsinə dəyişiklik etməyi təklif ediblər.
Qanun qəbul olunacağı təqdirdə dövlət bir neçə ölkənin vətəndaşlığını daşıyanların pasportunu əlindən ala biləcək. Qeyd edək ki, Dövlət Dumasının tezliklə məsələyə baxacağı bildirilib.
Maraqlıdır, belə bir qanunun qəbulu Rusiyada yaşayan soydaşlarımız üçün hansı problemləri yarada bilər?
"Ölkə ərazisində yaşayan şəxslər başqa dövlətin vətəndaşlığı ilə yanaşı Rusiya vətəndaşlığını daşıyırsa, sui-istifadə hallarına yol verilməməsi üçün belə addım atılır"
Milli Məclisin deputatı, "Avrasiya Miqrasiya Təşəbbüsləri Platforması" ictimai birliyinin sədri və Miqrasiya Əməkdaşlıq Platformasının rəhbəri Azər Allahverənov "Bakı-Xəbər"ə şərhində bildirdi ki, Rusiya mediasında məlum məsələ ilə bağlı ziddiyətli fikirlər var: "Dövlət Dumasında yüksək vəzifə tutan deputatlar bundan bixəbər olduqlarını deyir. Ancaq bəlli məsələdir ki, bu məlumat yayılıbsa, çox ehtimal, belə bir qanun layihəsi həqiqətən mövcuddur, yaxın müddətdə müzakirəyə çıxarılacaq. Rusiya höküməti miqrasiya sahəsində nizam-intizam yaratmaq fikrindədir. Ölkə ərazisində yaşayan şəxslər başqa dövlətin vətəndaşlığı ilə yanaşıRusiya vətəndaşlığını daşıyırsa, sui-istifadə hallarına yol verilməməsi üçün belə addım atılır. Vətəndaşlıq haqda Rusiyanın hüquq-mühafizə orqanları və digər aidiyyəti strukturlar tərəfindən fərqli məlumatlar tirajlanır. Bu da onu göstərir ki, Rusiyanın iclaslarında ikili vətəndaşlıq barədə mövqe birmənalı deyil. Xüsusilə bu nüans Rusiya-Ukrayna müharibəsindən sonra daha gözəçarpacaq dərəcədə baş verdi. Ən azından, Rusiyanın biznes sturukturlarında mədəniyyət, şou-biznes və digər sahələrdə çalışan şəxslər başqa ölkənin vətəndaşlığından istifadə edərək xarici dövlətdə məskunlaşırdılar. Bu da əlavə suallar yaradır. Çünki həmin adamların Rusiya qarşısında hansısa öhdəlikləri var. Lakin xarici vətəndaş olaraq öhdəliklərini yerinə yetirməkdən rahatlıqla boyun qaçırırlar".
Həmsöhbətimiz onu da əlavə etdi ki, şəxs Rusiya vətəndaşı olmaqla yanaşı, başqa ölkənin də vətəndaşıdır. Bu fakt aşkar olunduqda şəxsin Rusiya Federasiyası vətəndaşlığı dayandırılır: "Belə olan halda Rusiya vətəndaşlığını itirmə təhlükəsi yaranır. Şəxsə seçim imkanı veriləcək ki, ya Rusiya vətəndaşı ol, ya da digər ölkənin. Belə olan halda miqrasiya qaydaları tətbiq edilməyə başlayacaq. Şəxs Rusiya vətəndaşlığını itirmiş olacaqsa onun ölkə ərazisində qalması hüquqi statusu əcnəbilərə bağlı olan mövcud prosedurlara uyğun şəkildə icra ediləcək".
Günel CƏLİLOVA
