Onlar bir qış gecəsində, amansız düşmənin güllə yağışı altında soyqırımına məruz qalıb, çoxsaylı şəhidlər verərək doğma yurdu tərk etməyə məcbur oldular. 32 il sonra bir yaz günündə qalib dövlətin vətəndaşı kimi geri qayıdır, şəhid qanı ilə müqəddəsləşmiş Xocalıda yeni həyata başlamaq üçün.
Bu gün Xocalıda yeni nəfəs, yeni həyat müşahidə olunur. Uzun illər ölkənin müxtəlif bölgələrində müvəqqəti məskunlaşmış xocalılılar artıq bir neçə aydır ki, doğma yurdda daimi yaşamağa başlayıblar.
Məlumat üçün bildirək ki, Qaçqınların və Məcburi Köçkünlərin İşləri üzrə Dövlət Komitəsi Böyük Qayıdışa dair I Dövlət Proqramı çərçivəsində hazırlanmış, Xocalı şəhərinin gecə və gündüz görüntülərinin əks olunduğu videoçarx yayıb. Həmin görüntülərdə Xocalının gecə və gündüz mənzərəsi insanları valeh edir. Yolların salınması, yaşıllığın bərpa edilməsi, infrastrukturun yenilənməsi görənləri heyran edir.
Məlumat üçün bildirək ki, Xocalı şəhəri dövlət başçısının tapşırığı əsasında yenidən tikilib və zəruri infrastrukturla təchiz olunub. Bugünədək Xocalı şəhərində 44 ailənin (169 nəfər) daimi məskunlaşması təmin edilib. Görəsən, indiki Xocalının görüntülərini görən ermənilər nə düşünür?
Aydın Mirzəzadə: "Xocalının yeni mənzərəsi bizi ürəkdən sevindirir, ermənilər isə həmin görüntüləri qısqanclıqla izləyir"
Millət vəkili Aydın Mirzəzadə "Bakı-Xəbər"ə açıqlamasında bildirdi ki, erməni milləti dağıdıcı mahiyyətə malikdir. Onlarda yaradıcılıq yoxdur: "30 il işğal altında saxladıqları torpaqları bərbad günə saldılar. Tarixi abidələri dağıdıb, məbədləri pis günə qoydular, kommunikasiyaları sökdülər, salamat bina qoymadılar. Hətta yaşadıqları məntəqələr, ərazilər belə bərbad gündə idi. Məlumdur ki, Xocalıda kənardan gətirilən ailələr məskunlaşmışdı. Buna baxmayaraq, Xocalı pis gündə idi. Ancaq ölkəmiz işğaldan azad edilən torpaqlara yeni nəfəs verdi. Azərbaycan qısa zamanda həmin torpaqları abadlaşdırdı. Bu gün o ərazilər dünyanı heyrətə gətirir. İşğaldan azad edilən bütün torpaqlar gözəl, nümunəvi və heyranedici olacaq. Xocalının gecə-gündüz mənzərəsi hər bir azərbaycanlıda qürur hissi yaradır. Cənab Prezident İlham Əliyevin düşünülmüş daxili və xarici siyasəti, ordu quruculuğu göz önündədir. Onu da deyim ki, işğaldan azad edilən ərazilərin bərpası milli maraqlara xidmət edir. Xocalının yeni mənzərəsi bizi ürəkdən sevindirir, ermənilər isə həmin görüntüləri qısqanclıqla izləyir".
Fatimə Hacıbəyli: "Xocalının bu gününü görən ermənilər paxıllıqdan dəli olur"
"Vəfa" Sosial İctimai Birliyinin sədri Fatimə Hacıbəyli "Bakı-Xəbər"ə şərhində dedi ki, Xocalının başı üzərində illərdir dolaşan 613 nəfərin ruhu indi sakitdir: "Bu gün Xocalı o Xocalı deyil. Bu gün Xocalının səmasında yeni Günəş doğub. Xocalının gecələrində ayın parlaqlığı bərq vuran ulduzların kəhkəşanlığına qarışaraq xüsusi ahəng yaradıb. Xocalının havası təmiz, bulaqları duru, küləyi zümzüməlidir bu gün. İllər əvvəl qan çilənmiş, bərəkəti qaçmış torpağı da canlanıb. Xocalının bu gününü görən ermənilər qısqanclıqdan partlayır. 30 il o torpaqlarda bir ot belə becərilmədi. Bunun səbəbi həmin torpaqların yiyəsiz qalması idi. Ermənilər görür ki, insan öz evində xoşbəxt olur, onlar o evin sakinləri olmadıqlarını başa düşürlər".
Günel CƏLİLOVA
