Azərbaycanda son vaxtlar dəbə düşən estetik əməliyyatlardan biri də göz rənginin dəyişdirilməsidir. Bu əməliyyatı edənlər arasında məşhur şəxslər də var. Məlumat üçün bildirək ki, göz rənginin dəyişdirilməsi əməliyyatının qiyməti 8-9 min manat arasında dəyişir.
Göz rənginin dəyişdirilməsi əməliyyatı son vaxtlar ictimaiyyət arasında narazılığa, müzakirəyə səbəb olub. Ekspertlər iddia edir ki, belə bir əməliyyat qəbuledilməzdir. Çünki göz rənginin cərrahi müdaxilə ilə dəyişdirilməsi gələcəkdə korluğa səbəb ola bilər. Müzakirəyə səbəb olan məqamlardan biri də şəxsiyyət vəsiqəsinin dəyişdirilib-dəyişdirilməməsidir. Məlumdur ki, şəxsiyyət vəsiqəsi və xarici passportda insanın göz rəngi qeyd edilir. O da bəllidir ki, vətəndaş şəxsiyyət vəsiqəsi alanda onun gözündəki eynək və ya linzanın çıxarılması tələb olunur. Maraqlıdır, göz rəngini dəyişmək şəxsiyyət vəsiqəsi almağa problem yarada bilərmi və ya göz rəngi dəyişəndən sonra mövcud vəsiqə dəyişməlidirmi?
DİN: "Biometrik şəxsiyyət vəsiqəsinin göstəricilərinə əsasən, şəxsin göz rənginin dəyişdirilməsi onun kimliyini müəyyən etməkdə maneə yaratmır"
Daxili İşlər Nazirliyindən (DİN) "Bakı-Xəbər"ə bildirildi ki, göz rəngi dəyişilirsə vəsiqəni dəyişməyə ehtiyac olmur: "Biometrik şəxsiyyət vəsiqəsinin göstəricilərinə əsasən, şəxsin üz quruluşunun və yaxud göz rənginin dəyişdirilməsi onun kimliyini müəyyən etməkdə maneə yaratmır".
Vəsilə Məmmədova: "Göz rənginə müdaxilə etmək olduqca risqlidir, hətta korluqla nəticələnə bilir"
Oftalmoloq Vəsilə Məmmədova "Bakı-Xəbər"ə şərhində bildirdi ki, ölkədə göz rənginin dəyişdirilməsi əməliyyatlarına girənlərin sayı artmaqdadır. Amma gözəllik naminə bunu etmək düzgün deyil: "Nəzərə almaq lazımdır ki, göz rənginə müdaxilə etmək olduqca risqlidir. Bu prosedurun fəsadları az deyil, hətta korluqla nəticələnə bilir. Boya düzgün boyanmaya bilər. Məlumat üçün deyim ki, boya maddəsi buynuz qişaya yeridilir, buynuz qişa gözün qarasının, bəbəyinin üzərini örtən şəffaf saat siferblatı kimi strukturdur, bu, gözün ön hissəsini təşkil edir. Sağlam şəkildə belə addımı atmaq ağılsızlıqdır. Onu da deyim ki, əksər inkişaf etmiş ölkələrdə göz rənginin cərrahi yolla dəyişdirilməsi qadağan olunmalıdır".
Günel CƏLİLOVA
