Məzahir Məmmədli: "Mən həmin məktəb direktorlarının kimliyini təxmin edirəm"
"Elə məktəb direktorları var ki, onların qəbuluna düşmək mənim, nazirin qəbuluna düşməkdən daha çətindir". Elm və təhsil naziri Emin Əmrullayev Bakı şəhəri təhsil işçilərinin sentyabr konfransında çıxışı zamanı deyib.
Nazir qeyd edib ki, belə hallar var.
"Məktəb direktorları, valideynlərlə siz görüşürsürüz, siz onlara lazım olan mesajı çatdırırsınız. Bu halda siz həmin mesajı necə çatdırırsınız?
Mən istəyərdim ki, biz bu cür halları müzakirə edək. Necə edə bilərik ki, bu prosesi yaxşılaşdıraq",- deyə nazir əlavə edib.
Bəyəm məktəblər nazirliyə tabe deyil ki, direktorlar özlərini belə aparırlar? Ümumiyyətlə, niyə bəzi direktorlar özlərini nazir kimi aparır? Səbəb nədir? Buna hansı amillər şərait yaradır?
Siz özünüz belə məktəb direktorları tanıyırsız?
"...25-30 il eyni məktəbə rəhbərlik edən direktorlar var"
Təhsil üzrə ekspert Məzahir Məmmədli "Bakı-Xəbər"ə bildirdi ki, elm və təhsil nazirinin səsləndirdiyi fikirdə həqiqət var: "Əksəriyyətimiz bunu yaxşı bilirik. Elə məktəblər var, orada məktəb direktorları 30 ildən artıqdır fəaliyyət göstərir. Direktorların işə qəbul imtahanları başlayandan sonra demək olar ki, ümumtəhsil məktəblərində direktorların əlçatanlığı təmin olunub. Yəni onlar müasir standartlara uyğun seçiliblər deyə, artıq yeni seçilmiş məktəb direktorları ilə bağlı hər hansı bir problem yoxdur. Yaxşı olardı ki, nazir konkret ad çəkərdi, amma çəkmədi. Mən həmin məktəb direktorlarının kimliyini təxmin edirəm. Çünki biz də ara-sıra mediada və valideynlərlə söhbətimizdə bilirik ki, 25-30 il eyni məktəbə rəhbərlik edən direktorlar var. Əlbəttə, artıq məktəblərdə kök salmış belə direktorların qəbuluna düşmək çətindir".
M.Məmmədlinin sözlərinə görə, qəbuluna düşməyin mümkün olmadığı direktorlarla valideynlər də, jurnalistlər də qarşılaşırlar, mütəxəssislər də belələri barədə məlumatlıdır.
Müsahibimizin fikrincə, müəllimlərin sertifikasiyası kimi, direktorlar üçün də sertifikasiya keçirilməlidir ki, onlar da müasir dövrün tələblərinə uyğun seçilə bilsinlər. "Artıq bu faktlar qaçılmazdır ki, bəzi məktəblərdə valideynlər direktorun qəbuluna düşə bilmir. Bu barədə deyilir, danışılır, narazılıq var, nazir özü də bu faktı qeyd etdi. Görün vəziyyət necədir ki, o direktorların qəbuluna düşmək nazirin qəbuluna düşməkdən çətindir"-deyə M.Məmmədli vurğuladı.
İradə SARIYEVA
