İnanılmaz - Azərbaycanda "dirijorluq" ən bahalı ixtisaslardan imiş - izah verildi...
Elçin Əfəndi: "Ölkədə universitetlərin verdikləri təhsil, universitet infrastrukturu, komfort eyni deyil"
Nazirlər Kabineti ali təhsil müəssisələrində yeni maliyyələşmə mexanizminin tətbiqi ilə bağlı qərara dəyişiklik edib. Bunu elm və təhsil nazirinin müavini İdris İsayev jurnalistlərə açıqlaması zamanı deyib.
O bildirib ki, bakalavr təhsil səviyyəsi üzrə hər təhsilalana düşən təhsil haqqı xərcləri 22 faiz, magistratura üzrə 26 faiz artırılıb: doktorantura səviyyəsi üzrə bu artım 60 faizdir. Bununla da ölkənin bakalavr pilləsi üzrə ən bahalı ixtisasları da müəyyənləşib. Bunlar bəstəkarlıq, dirijorluq (sahələr üzrə), İnstrumental ifaçılıq (sahələr üzrə) və vokal sənətidir. Bu ixtisasların illik təhsil xərci 9000 AZN-dir.
Magistratura pilləsi üzrə ən bahalı ixtisaslar isə bəstəkarlıq, dirijorluq və instrumental ifaçılıqdır. Bunların hər birinin illik təhsil xərci 10 min manat təşkil edir.
Maraqıdır, təhsil haqlarının bu qədər baha olmasına səbəb nədir?
"İllik təhsil haqqı artırıldığı zaman yaxşı olar ki, ali təhsil müəssisələrinin rəhbərləri, pedoqoji şura ailələrin, valideynlərin büdcələrini nəzərə alsın"
Təhsil eksperti Elçin Əfəndi "Bakı-Xəbər"ə şərhində bildirdi ki, tələbələrin böyük əksəriyyətinin ali təhsillərini yarımçıq qoymalarına səbəb məhz təhsil haqqını ödəyə bilməmələridir. Buna görə də durmadan təhsil haqqını artırmaq əhəmiyyətsizdir: "İllik təhsil haqlarında artımı bu il biz müşahidə etdik. İstər Bakı Dövlət Universitetində, istər Azərbaycan Dövlət Pedaqoji Universitetində, istərsə də digər dövlət universitetlərində və bir neçə özəl universitetdə. Qalanlarında isə təhsil haqları olduğu kimi qalıb. Ölkədə universitetlərin verdikləri təhsil, universitet infrastrukturu, komfort eyni deyil".
Ekspertin sözlərinə görə, illik təhsil haqqı artırıldığı zaman yaxşı olar ki, ali təhsil müəssisələrinin rəhbərləri, pedoqoji şura ailələrin, valideynlərin büdcələrini nəzərə alsın: "Bu hallar nəzərə alınmadan təhsil haqqının artırılması düzgün deyil. Ötənilki statistikalara nəzər yetirəndə görə bilərik ki, təxminən 8000-ə yaxın tələbə məhz təhsil haqqını ödəyə bilmədiyinə görə ali təhsil müəssisələrindən xaric edilib. Yenə də bu qədər tələbə təhsil haqqını ödəyə bilməyəcəksə, bu artımı etməyin mənası yoxdur".
Bəstəkarlıq, dirijorluq ixtisasları üzrə təhsil haqqının yüksək olmasına gəlincə, ekspert bildirdi ki, təhsil xərcinə tələbələrə qrossmeysterin təyin olunması, onlara musiqi alətləri və digər avadanlıqların alınması, dərs deyən müəllimin təhsil haqqının ödənilməsi və s. daxildir.
Günel CƏLİLOVA
