Ilham Əhmədov: "4-5 min namizədin vakansiya seçimi"ndə iştirak etməməsinin səbəbi onların az bal toplamasıdır"
"Təəssüf ki, 2 mindən artıq vakant müəllim yeri 3 ildir heç bir namizəd tərəfindən seçilmir". Bunu Məktəbəqədər və Ümumi Təhsil üzrə Dövlət Agentliyinin (MÜTDA) Ümumi təhsilin təşkili şöbəsinin müdir müavini Nurlan İsmayılbəyli MİQ-lə bağlı keçirilən brifinqdə deyib.
O bildirib ki, həmin yerlər şəhər və ya ucqar ərazilərə aiddir. N.İsmayılbəyli əlavə edib ki, builki MİQ üzrə keçid balını toplayan 22 min namizəddən təxminən 4-5 mini vakansiya seçimində iştirak etməyib.
Maraqlıdır, 4-5 min namizəd niyə vakansiya seçimində iştirak etməyib? Həmçinin o da qeyd edilib ki, 2 mindən artlq vakant müəllim yeri heç bir namizəd tərəfindən seçilmir. Qeyd edilən yerlər niyə boş qalır, bu ixtisasa maraq yoxdursa niyə ləğv olunmur?
"Real iş əvəzinə reklam xarakterli tədbirlər keçirmək, selfi çəkib paylaşmaqla ölkənin elm və təhsilini irəli aparmaq çətindir"
Təhsil eksperti İlham Əhmədov "Bakı-Xəbər"ə şərhində bildirdi ki, 4-5 min namizədin vakansiya seçimində iştirak etməməsinin səbəbi onların az bal toplamasıdır. Həmin iştirakçılar başa düşürlər ki, topladıqları az balla istədikləri məktəbə düşə bilməyəcəklər, buna şansları yoxdur. Bu səbəbdən də vakansiya seçimində iştirak etmirlər.
2 mindən artıq vakant yerin boş qalmasının səbəbinə gəlincə, həmsöhbətimiz vurğuladı ki, səbəb ucqar ərazilərdə sosial şəraitin pis olmasıdır: "Ucqar ərazilərdə olan məktəblərin bir qisminin şəraiti yaxşı deyil. Yadınızdadırsa, 2 il əvvəl bir kənd məktəbində uşaqlar üçün normal sanitar qovşağının olmaması səbəbi ilə ciddi narazılıqlar yaranmışdı. Kənd məktəbini seçməli olan müəllim düşünür ki, mən harda yaşayacam, bu kəndin yol-izi necədir, İnternet varmı, qışda orda işıq, qaz olacaqmı v.s. Bura maaşın azlığını da əlavə etsək, bu seçim çox da maraqlı olmur. Əvvəllər ucqar və sərhədyanı ərazilərdə işləyən müəllimlərə əlavə ödənişlər olurdu, torpaq sahəsi verilirdi, kommunal xərclərdə güzəştlər olurdu və s. İndi bunların heç biri yoxdur.
Digər tərəfdən, ucqar kəndlərdəki məktəblərin perspektivi azdır, gələcəkdə o kəndin özünün hansı perspektivi var? Bildiyiniz kimi, ucqar kəndlər sürətlə boşalır. Bu kəndin məktəbində təhsil alacaq şagirdlərin sayı da getdikcə azalacaq və həmin məktəb perspektivdə bağlanacaq. Belə olan halda bu müəllim yenidən özünə iş axtarmalı olacaq. Bu səbəbdən də ucqar kənd yerində çalışmaq istəyənlərin sayı olduqca azdır".
Ekspert hesab edir ki, bu kimi hadisələrin yaşanmasına səbəb təhsildə uzunmüddətli strategiyanın, planlaşmanın olmaması ilə bağlıdır. Azərbaycanda tələbatdan artıq pedaqoji təhsil müəssisələri var. Regionlarda kolleclər, filiallar yetərincədir: "Ölkədə bu qədər müəllimə ehtiyac yoxdur. Xüsusən də şagird-müəllim nisbəti get-gedə mənfiyə doğru dəyişir. Bir çox hallarda müəllimlər şagird sayı çox olan siniflərdə dərs deyir. Hətta təhsil naziri bildirir ki, bir sinifdə 40 şagirdin olması təhsilin keyifiyyətinə təsir etmir. Yəqin nəzərdə tuturlar ki, gələcəkdə bir sinifdə şagird sayı normativlərdə 20-25 yox, 40 nəfər olacaq. Bu halda təhsilin zəif keyfiyyəti daha da aşağı düşəcək, dərsi mənimsətmək çətin olacaq, deməli, repetitor yanına axın daha da artacaq.
Düşünürəm ki, hökumət müəllimlərin sosial -iqtisadi vəziyyəti, peşəkarlığının artırılması v.s. məsələlərlə əlaqəli ciddi işlər görməli, bu peşəni və müəllimləri sevən, onları aşağılayan yox, əksinə, onlara hörmət və qayğı göstərən, onların problemlərindən xəbərdar olan, zəngin pedaqoji və həyat təcrübəsi olan peşəkar insanları təhsil sisteminin idarəedilməsinə cəlb etməlidir. Dünyanın indiki sürətli inkişafı dövründə real iş əvəzinə reklam xarakterli tədbirlər keçirmək, selfi çəkib paylaşmaqla ölkənin elm və təhsilini irəli aparmaq çətindir. Onsuz da bu sahədə 20 il geridəyik".
Günel CƏLİLOVA
