Mübariz Göyüşlü: "Bu həm də o legionerləri Azərbaycan idmanını, Azərbaycan dövlətini xaricdə təmsil etmək üçün cəlb edən federasiyalara bir dərs olmalıdır"
İdman mənzərəmizə baxanda, yerli idmançılarla yanaşı legionerləri də görürük. Əlbəttə, bu, dünya idmanında qəbul olunmuş qaydalardan biridir ki, istənilən ölkə legioner idmançını cəlb edə bilər. Bir sıra mütəxəssislərə görə, legioner idmançılar hansısa ölkənin idmanını təmsil edərkən burada onun həmin ölkənin təəssübünü çəkməsi gözlənilən deyil. Yəni onlar bunu etmirlər. Biz bunun dəfələrlə şahidi olmuşuq.
Paris Olimpiadasında Azərbaycanı təmsil edən legioner idmançıların bəzilərinin bizim xalqa aşağılayıcı nəzərlərlə yanaşmasını gördük. Alfonso Dominqesdən sonra indi də legioner sərbəst güləşçisi Maqomedxan Maqomedov bu yolu tutub.
M.Maqomedov Rusiya mətbuatına verdiyi müsahibədə deyib ki, "mənə verilən ordenlə ancaq metroya minmək olur".
Qeyd edək ki, Azərbaycan Prezidenti İlham Əliyev Paris Olimpiadasında bürünc medal qazandığı üçün M.Maqomedovu 3-cü dərəcəli "Vətənə xidmətə görə" medalı ilə təltif edib. Bu adam bu cür sərsəm açıqlaması ilə həm Prezidentin verdiyi medalın dəyərini aşağı salmağa cəhd edib, həm də ölkəmizi təhqir edib.
Yayılan məlumata görə, sonradan Maqomedov üzr istəyib: "Rusiya mətbuatına verdiyim müsahibədə səsləndirdiyim fikirlər yanlış anlaşılmanın nəticəsidir. Prezidentin mənə verdiyi orden mənim üçün çox dəyərlidir və heç bir hörmətsizlikdən söhbət gedə bilməz. Baş verənlərlə əlaqədar mən Azərbaycan Prezidentindən və bütün Azərbaycan xalqından üzr istəmək istəyirəm".
Onun dedikləri Azərbaycanda narazılıq yaradıb. Xüsusən də sosial şəbəkə istifadəçiləri qeyd edirlər ki, Maqomedovla müqaviləyə xitam verilməli və o, millimizdən uzaqlaşdırılmalıdır. Azərbaycan xalqını təhqir edən idmançının ölkəmiz tərəfindən verilən bütün medallarının, mükafatlarının geri alınmasını tələb edənlər çoxdur. Bu adam elə üzr istəyib ki, necə deyərlər, üzrü günahından betər olub.
Belə legionerləri ölkəyə kim gətirir ki, Prezidentin verdiyi medalı bunlar bəyənmir?
Ekpertlər deyir ki, legionerlərin ölkə idmanına cəlb edilməsi işi ilə məşğul olan yüksək vəzifəli şəxslərdir və onlar da idman sahəsinə rəhbərlikdə təmsil olunurlar. Ölkə idmanını legionerlərlə dolduranların milli idmançıların yetişməsinə əngəl olduğunu, onların yollarını bağladığını deyən ekspertlər hesab edir ki, Gənclər və İdman Nazirliyi, idman federasiyaları bu məsələdə diqqətli olmalıdır və legonerləri gətirməkdən əl çəkməlidir. Azərbaycanda çox ümidverici idmançıların olduğunu deyən ekspertlərə görə, idman məmurları, federasiya rəhbərləri yerli idmançıların üzünə bütün qapıları açmalıdır. Bəzi ekspertlərin iddiasına görə, legioner məsələsi bəzi məmurlar üçün gəlir mənbəyidir.
"Ölkə Prezidentinin, Azərbaycan dövlətinin, Azərbaycan xalqının ona təqdim etdiyi medala bu şəkildə münasibətinə təəssüflə yanaşıram"
Müasir İnkişaf Birliyinin sədri Mübariz Göyüşlü "Bakı-Xəbər"ə bildirdi ki, idman mütəxəssisi olmasa da, ölkənin idman nüfuzundan söhbət gedirsə, ona biganə qala bilmir. "Olimpiya Oyunlarını, futbol komandalarımızın iştirak etdikləri çempionatları bütün ölkə ictimaiyyəti yaxından izləyir. Olimpiadada iştirak edən legioner idmançının ona verilən medalla bağlı səsləndirdiyi fikirlər qəbuledilməzdir. Ondan əvvəl də Dominqosun açıqlamasını ictimaiyyət müsbət qarşılamadı, ona etirazlar oldu. Bu cür yanaşmalar, bu cür davranışlar qəbuledilən deyil. Haqlı narazılıqlar doğurur. Ölkə Prezidentinin, Azərbaycan dövlətinin, Azərbaycan xalqının ona təqdim etdiyi medala bu şəkildə münasibətinə təəssüflə yanaşıram. Hətta sosial şəbəkələrdə yazılan rəylərdə legioner idmançının bu açıqlamasında təhqiramiz notların olduğu da vurğulanır. Hardasa bu rəylərlə də razılaşmaq olar ki, bu hardasa təhqiramiz münasibətdir. Düşünürəm ki, bu həm də o legionerləri Azərbaycan idmanını, Azərbaycan dövlətini xaricdə təmsil etmək üçün cəlb edən federasiyalara bir dərs olmalıdır. Əvvəla, legionerləri cəlb etməkdən çəkinmək lazımdır. Daha çox çalışmaq lazımdır ki, yerli idmançılar inkişaf etsin, onlar ölkə idmanına töhfə versinlər"-deyə qeyd edən M.Göyüşlü bildirdi ki, yerli idmançılar uşaq və yeniyetmə, gənc yaşlarından bu cür idman yarışları üçün yetişdirilsin, onlar Azərbaycanı təmsil etmək üçün beynəlxalq yarışlara, Olimpiya Oyunlarına göndərilsinlər. "Birincisi, Azərbaycan idmançıları bu sahədə irəli çəkilməlidir. İkincisi də, əgər legionerlər cəlb olunursa, bu məsələyə çox diqqətlə yanaşılmalı, onlar xüsusi seçilməlidir. Mən legioner sərbəst güləşçinin açıqlamasını mənfi qiymətləndirirəm. Çox təəssüf edirəm ki, bu cür açıqlama ilə üzləşdik. Növbəti yarışlarda inanıram ki, bizim federasiyalar daha diqqətli davranıb, bu cür legionerlərdənsə yerli idmançılara diqqət yetirəcəklər, onları bu işə cəlb edəcəklər, legionerlər də olacaqsa, onların bu cür çıxışlar etməsinin qarşısını alacaqlar"-deyə M.Göyüşlü bildirdi.
İradə SARIYEVA
