Şəmsəddin Əliyev: "Əgər vaxtında maliyyə hesabatlarını və sənədləri yoxlayanlar olubsa…"
Müdafiə Nazirliyinin mənimsəməyə görə tutulmuş Maliyyə və Büdcə İdarəsinin sabiq rəisi, general-mayor Nizami Məmmədov, Hərbi Hava Qüvvələrinin Maliyyə Xidmətinin sabiq rəisi, polkovnik Cəlal Kazımov, Quru Qoşunlarının Maliyyə İdarəsinin sabiq rəisi Bayram Bayramov və Hərbi Dəniz Qüvvələrinin Maliyyə Xidmətinin sabiq rəisi Vüsal Əlizadənin cinayət işi üzrə məhkəmə prosesi keçirilib.
Bakı Hərbi Məhkəməsində hakim Fikrət Əliyevin sədrliyi ilə keçirilən prosesdə sənədlərin tədqiqi davam etdirilib. Cinayət işi üzrə sübutların qiymətləndirilməsi ilə bağlı qərarlar açıqlanıb. Həmin qərarlardan birində göstərilib ki, Müdafiə Nazirliyinin sabiq Baş Qərargah rəisi Nəcməddin Sadıkov və digər şəxslərin barəsində araşdırma davam etdirilib.
Bundan başqa, Müdafiə Nazirliyinin Maliyyə və Büdcə İdarəsinin təftiş şöbəsinin rəisi, polkovnik Rəfael Xələfov, Azərbaycan Ordusunun Təlim və Tədris Mərkəzinin Maliyyə Xidmətinin sabiq rəisi polkovnik-leytenant Rəşad Məlikzadə, maliyyə xidməti rəisi olmuş, hazırda həbsdə olan Sadıq Hacıyev və digər şəxslərin barəsində cinayət işinin ayrıca icraata götürülməsi barədə qərar elan edilib.
Bu faktlar göstərir ki, korrupsiya halları Müdafiə Nazirliyinin bütün strukturlarını əhatə edib. Çox maraqlıdır ki, bütün proseslərdə sabiq Baş Qərargah rəisi Nəcməddin Sadıkovun adı hallansa da, o, hələ də prosesə cəlb olunmayıb.
Cəlal Kazımovun vəkili bildirib ki, Hərbi Hava Qüvvələrinin sabiq komandiri Ramiz Tahirov Cəlal Kazımova qarşı şəxsi qərəz göstərərək, onun işlədiyi dövrdə heç bir tənbeh və ya töhməti olmaya-olmaya istintaq orqanına mənfi xasiyyətnamə təqdim edib: "Biz yenidən həmin komandanlığa müraciət edərək yeni xasiyyətnamə verilməsini istəmişik. Yeni komandanın imzası ilə Cəlal Kazımova xidməti ilə bağlı xasiyyətnamə təqdim edilib. Həmin xasiyyətnamədə Cəlal Kazımov müsbət xarakterizə olunub".
Çox maraqlıdır, görün Müdafiə Nazirliyinin rəhbər heyətində təmsil olunan şəxslər insan taleləri ilə necə "oynayıblar".
Xatırladaq ki, cinayət işi üzrə ümumilikdə dövlətə dəymiş ziyan 143 milyon manatdır. Cinayət işləri ayrı-ayrı icraatlarda baxılması üçün məhkəməyə göndərilib. İstintaq dövründə dövlətə vurulmuş ümumi ziyanın 40 milyon manatı ödənilib. Cinayət işi üzrə Maliyyə Nazirliyi zərərçəkmiş qismində tanınıb.
Çox maraqlıdır, Maliyyə Nazirliyi cavabdeh olduğu sahədə bu qədər dövlət vəsaitinin mənimsəməsinin zamanında qarşısını niyə almayıb?
Hüquqşunas Şəmsəddin Əliyev "Bakı-Xəbər"ə açıqlamasında bildirdi ki,
Müdafiə Nazirliyi kimi bir dövlət qurumunda belə bir hadisənin baş verməsi təəssüf doğurur: "Qanundan kənara çıxanlar, kimliyindən asılı olmayaraq, buna cavab verməlidir. Belə şəxslər ən sərt şəkildə cəzalandırılmalıdır. Bu, ordunun, silahlı qüvvələrin adına xələl gətirən bir hadisədir. Quru Qoşunları bu yaxınlarda yaradılıb. Onun maliyyə idarəsinin rəisinin belə hadisədə adının hallanması və həbsi xüsusilə diqqət çəkir. Yəqin ki, bir çox vəzifəli şəxslərin hərəkətinə hüquqi qiymət veriləcək. İstər zabit, istər general olmağından asılı olmayaraq hər kəs öz məsuliyyətini dərk etməlidir. Bu məsuliyyət o səviyyədə olmalıdır ki, gələcəkdə kimsə bir daha belə əməllərə baş vurmasın. Digər məsələlər də var. Yəqin ki, yaxın zamanda müvafiq qurumlar o məsələlərə aydınlıq gətirəcək. Hesab edirəm ki, onları yoxlayanlar, fəaliyyəti ilə maraqlananlar da olub. Yəqin ki, üç- dörd nəfərlə bu məsələ yekunlaşmayacaq. Əgər vaxtında maliyyə hesabatlarını və sənədləri yoxlayanlar olubsa, onlar bu yeyinti və təyinatı üzrə istifadə olunmayan halları görməyibsə, onlar da məsuliyyətə cəlb olunmalıdır. Nəzarətedici qurumlar var. Onların funksiyaları nədən ibarətdir? Maliyyəçi özbaşına sənəd imzalaya bilməz. Onun başının üstündə rəhbər şəxslər var, rəis var. O şəxslər müvafiq sənədlərə imza atır və möhür vurur. Maliyyəçidə möhür olmur. İdarənin birinci şəxsinin imzası olmayanadək bank heç bir halda maliyyə əməliyyatı icra edə bilməz. Həbs olunan şəxslərə sual veriləcək ki, sən bu milyonları necə çıxarmısan? Səndən yuxarıda dayanan şəxsləri necə inandırıb əsaslandırmısan? Burada çox xırda detallar var və istintaq bunu araşdıracaq. Ona görə də, yəqin ki, bu həbslərin davamı da olacaq".
Məhəmmədəli QƏRİBLİ
