Şəmsəddin Əliyev: "Son zamanlar insanlar nə etdiyinin fərqində olmur, sadəcə macəra olsun deyə davranışlar nümayiş etdirirlər"
Bəzən polisə yalan məlumat verən şəxslər də olur. Avqustun 25-də vətəndaş Mərhəmət Mehdiyev "102" Xidməti-Zəng mərkəzi və Nəsimi RPİ-nin 19-cu Polis Şöbəsinə müraciət edərək "Əbdül", "Tofiq" və "Taleh" adlı şəxslər tərəfindən avtomaşına əyləşdirilib başına beşbarmaqla vurularaq 164 manatının və mobil telefonunun əlindən zorla alınması barədə məlumat verib. Bu barədə DİN-in Mətbuat Xidmətindən məlumat verilib.
Bildirilib ki, M.Mehdiyev iş üzrə zərərçəkmiş şəxs qismində dindirilib. Həyata keçirilən əməliyyat tədbirləri nəticəsində Tofiq Tağıyev və Əbdül Məmmədov müəyyən edilərək şübhəli şəxs qismində saxlanılıblar. Onlar ifadələrində qeyd olunanları inkar edərək, M.Mehdiyevə qarşı heç bir cinayət əməli törətmədiklərini, onun pulunu və telefonunu əlindən almadıqlarını bildiriblər. Həyata keçirilən əlavə istintaq hərəkətləri zamanı M.Mehdiyev ilkin ifadəsində qeyd etdiklərinin tam əksinə olaraq həmin şəxslər tərəfindən ona qarşı heç bir zorakılığın olmadığını, pulunun və mobil telefonunun əlindən alınmadığını bildirib.
Özünü zərərçəkən kimi təqdim edən şəxs yalan məlumatla ədavətdə olduğu şəxsləri doğru olmayan ittihamla həbs etdirmək istəyib. Qeyd edək ki, bu cür hadisələr zamanla yaşanır. Maraqlıdır, bu hadisələrin yaşanmasına səbəb nədir? İnsanlar arasında hüquqi maarifçilik aşağı səviyyədədir?
"Polisə yalan məlumat verən, yalandan özünü zərərçəkən kimi təqdim edən şəxslər məsuliyyətə cəlb olunmalıdır ki, gələcəkdə bu kimi hallar yaşanmasın"
"Polisə Dəstək" İctimai Birliyinin sədri Şəmsəddin Əliyev "Bakı-Xəbər"ə şərhində bildirdi ki, bu kimi hadisələrin baş verməsi vətəndaşların öz hüquqlarından xəbərsiz olmasından irəli gəlir: "Təəssüf ki, zamanla bu kimi hadisələrin şahidi oluruq. Bəzi insanlar nə etdiyinin fərqində olmur, onlar öz hərəkəti ilə cinayətkarlıqla mübarizə aparan qurumların fəaliyyətini yayındırır. Bu, cəmiyyət üçün arzuolunan hal deyil. Yalandan özünü zərərçəkən kimi təqdim edən şəxs etdiyi əmələ görə peşman olub. Ancaq qarşı tərəf – ittiham edilən tərəf ona atılan böhtan, şərlə bağlı qanunvericiliyin tələbinə uyğun olaraq xüsusi ittiham qaydasında şikayət edə bilər. Həmin şəxs nüfuzuna zərər gəlməsi ilə bağlı məhkəməyə müraciət edə bilər. Özünü zərərçəkən kimi təqdim edən şəxs bunu yalandan etdiyimi etiraf etsə də, o əməlin dərəcəsinə uyğun olaraq məsuliyyətə cəlb olunmalıdır. Polisə yalan məlumat verən, yalandan özünü zərərçəkən kimi təqdim edən şəxslər məsuliyyətə cəlb olunmalıdır ki, gələcəkdə bu kimi hallar yaşanmasın".
Həmsöhbətimiz hesab edir ki, son zamanlar insanlar nə etdiyinin fərqində olmur. Sadəcə macəra olsun deyə davranışlar nümayiş etdirirlər. Bu şəkildə özlərini təsdiqləməyə çalışırlar. Etdikləri hərəkətin tam olaraq nə məna verdiyini dərk etmirlər.
Günel CƏLİLOVA
