Məlum olduğu kimi, Prezident İlham Əliyev Antiinhisar və istehlak bazarına nəzarət sahələrində idarəetmənin təkmilləşdirilməsi ilə bağlı əlavə tədbirlər haqqında fərman imzalayıb. Sənədə əsasən, Dövlət Agentliyi İqtisadiyyat Nazirliyi yanında Antiinhisar və istehlak bazarına nəzarət üzrə Dövlət Xidmətinin bazasında yaradılacaq.
Danılmaz faktdır ki, ölkədə inhisarçılıqla bağlı çoxlu sayda problem yaşanır. Antiinhisar və istehlak bazarına nəzarət sahələrində idarəetmənin təkmilləşdirilməsi Agentliyin fəaliyyətinə necə təsir edəcək? Sadəcə ad dəyişilikliyi olacaq, yoxsa bu sahədə yaşanan problemlər həllini tapacaq?
Akif Nəsirli: "Azərbaycan iqtisadiyyatı yaxın illərdə inhisarçılıqdan azad olacaq, bu, mərhələli şəkildə baş verəcək"
Liberal İqtisadçılar Birliyinin sədri Akif Nəsirli "Bakı-Xəbər"ə açıqlamasında bildirdi ki, analoji qurum dünyanın aparıcı ölkələrində heç bir nazirliyə tabe deyil. Ancaq nazirlik statusundadır: "Məlumat üçün deyim ki, Avropa ölkələrində fəaliyyət göstərən bu kimi qurumlar nazirliklərə deyil, yalnız dövlət başçısına tabe olur. Antiinhisar və İstehlak Bazarına Nəzarət Dövlət Xidməti əvvəllər İqtisadiyyat Nazirliyinə tabe idi. İndi müstəqil olacaq. Adıçəkilən qurumun müstəqilləşməsinin böyük əhəmiyyəti var. Agentliyin inhisarçılıqla bağlı problemləri aradan qaldırması əslində gözlənilmir. Bu istiqamətdə hər hansı bir işin görülməsi, müsbət nəticə olacağı ehtimal edilmir. İnhisarçılıqla bağlı yaşanan problemlər nə nazirlik, nə də Agentlik səviyyəsində həll olunasıdır. Ölkə iqtisadiyyatının inhisarçılıqdan azad edilməsi üçün mütləq müəyyən işlər görülməlidir".
Həmsöhbətimizin sözlərinə görə, agentliyin yaranması göstərir ki, dövlət başçısının inhisarçılıqla münarizə üçün planları var: "Ümid edək ki, inhisarçılıqla mübarizədə siyasi iradə ortada olacaq. Azərbaycan iqtisadiyyatı yaxın illərdə inhisarçılıqdan azad olacaq. Bu, mərhələli şəkildə baş verəcək".
Vüqar Bayramov: "Yeni qurumun yaranmasında məqsəd iqtisadiyyatda rəqabətin müdafiə edilməsi və daha da gücləndirilməsidir"
Iqtisadçı alim Vüqar Bayramov hesab edir ki, əksər inkişaf etmiş ölkələrdə, o cümlədən qonşu Gürcüstanda rəqabətin müdafiəsinə xüsusi qurum nəzarət edir. Bu baxımdan, xidmətin mərkəzi icra qurumuna çevrilməsi həm beynəlxalq institusional praktikaya uyğundur, həm də yeni qanunverici aktların qəbulundan sonra vacib qərardır: "Agentlik antiinhisar, haqsız rəqabət, dövlət satınalmaları, standartlaşdırma, keyfiyyətin idarə edilməsi, istehlakçıların hüquqlarının müdafiəsi və istehlak bazarına nəzarət sahələrində dövlət nəzarətini və tənzimləməsini həyata keçirən mərkəzi icra hakimiyyəti orqanı kimi fəaliyyət göstərəcək. Yeni qurumun fəaliyyət istiqamətləri həm rəqabətin daha yaxından müdafiəsi, həm də antiinhisar fəaliyyəti baxımından vacib sahələrdir. Yeni qurumun yaranmasında məqsəd iqtisadiyyatda rəqabətin müdafiə edilməsi və daha da gücləndirilməsidir. Bu, azad sahibkarlığın inkişafı, iqtisadiyyatda monopoliyanın tamamilə aradan qaldırılması və baryerlərin götürülməsi baxımından vacib bir addımdır".
Günel CƏLİLOVA
