Cavanşir Əliyev: "630 və 658 bal toplayan gənclərin kənarda qalması təəssüf doğurur"
Cari ildə abituriyentlərin ixtisas qrupları üzrə ali təhsil müəssisələrinə qəbulolma faizi açıqlanıb. Dövlət İmtahan Mərkəzinin Direktorlar Şurasının sədri Məleykə Abbaszadə jurnalistlərə açıqlamasında deyib ki, bu il 600-dən yuxarı bal toplayıb ali təhsil müəssisələrinə qəbul olunmayanlara xüsusi bir təklif edilməyəcək:
"Yüksək bal toplayıb və sadəcə bir yeri yazıb qəbul olunmayanlar bunu özləri seçir. Onların əksəriyyəti xarici universitetlərə qəbul olur, burada sadəcə dövlət sifarişli yerlər yazırlar. Əgər bir yer yazmasa idilər, digər yerə düşə bilərdilər. Buna görə biz qəbul qaydalarından kənara çıxa bilmərik".
Sosial şəbəkə paylaşımlarından məlum olub ki, 600-dan yuxari bal toplayan abitutiyentlərdən biri I qrup üzrə 658 bal, digəri isə 630 bal toplayıb. Aşağı bal toplayıb universitetə daxil olan abituriyentlərin uğuru nə qədər sevindiricidirsə, yüksək bal toplamasına rəğmən tələbə adı qazana bilməmək də bir o qədər təəssüfləndirici haldır.
Maraqlıdır, 600-dan yuxarı bal toplayan abituriyentlər niyə kənarda qalır? Onlara hər hansı bir güzəşt olunacaqmı?
"Kəsilən abituriyentlər keçid balı topladıqları baldan yuxarı olan ixtisasları yazıblar, yüksək bal topladıları üçün arxayın olub başqa ixtisasları qeyd etməyiblər"
Təhsil eksperti Cavanşir Əliyev "Bakı-Xəbər"ə şərhində bildirdi ki, yüksək bal toplayanların kənarda qalmasının səbəbi onların düzgün ixtisas seçə bilməməsi ilə bağlıdır: "Ali məktəbə qəbul olmaq üçün yetərincə bal yığmaq kifayət etmir, düzgün ixtisas seçimi mütləqdir. Bu zaman isə Dövlət İmtahan Mərkəzinin nəşr etdiyi statistik məlumatlara və abituriyent jurnalına istinad etmək, ciddi şəkildə baxmaq lazımdır. Yoxsa yüksək bal toplayan abituriyentlər belə tələbə adını qazanmaqdan mərhum ola bilər. Xüsusilə də abituriyentlər plan yerlərini və imtahan iştirakçılarının topladığı balı əvvəlki illərlə müqayisə etməlidirlər. Kəsilən abituriyentlər keçid balı topladıqları baldan yuxarı olan ixtisasları yazıblar, yüksək bal topladıları üçün arxayın olub başqa ixtisasları qeyd etməyiblər. İxtisas seçimi ilə bağlı DİM maarifləndirmə işləri aparmalıdır. Bəzən maddi problemlər səbəbilə abituriyentlər ixtisas seçimlərini özləri həyata keçirirlər, düzgün seçim etmədiklərinə görə də kənarda qalırlar, kiməsə əlavə ödəniş edib dəstək ala bilmirlər. Ona görə də DİM-in nəzdindəki abituriyent məsləhət mərkəzləri aktiv fəaliyyət göstərməlidir. Bu mərkəzlərin köməyindən hər kəs istifadə etməlidir".
Ekspert onu da əlavə etdi ki, 630 və 658 bal toplayan gənclərin kənarda qalması təəssüf doğurur: "Bu abituriyentlərin tələbə olmamasının səbəbi ixtisas seçimi zamanı yalnız bir ixtisas seçməsidir. Əslində onları da başa düşmək lazımdır. O abituriyentlər qarşılarına məqsəd qoyub yaxşı oxuyublar ki, istədikləri sahə üzrə təhsil alsınlar. Bu abituriyenlər ali məktəbdə oxumaq xatirinə 600-dan yuxarı bal toplamayıb. Onlar istədiyi peşəyə yiyələnsin deyə qarşılarına məqsəd qoymuşdular ki, yaxşı oxusunlar. Əslində həmin gənclərə dəstək olmaq lazımdır. Ümid edirəm ki, həmin gənclər 2-ci turda iştirak edə bilərlər".
Günel CƏLİLOVA
