Azərbaycanda "D" kateqoriyalı sürücülük vəsiqəsi olan sürücü qıtlığı var. Xüsusilə sərnişin daşınması üçün nəzərdə tutulan və oturacaq yerlərinin sayı sürücü oturacağından əlavə 8-dən artıq olan avtomobilləri idarə etməyə icazə verən bu kateqoriya üzrə sürücü azlığı yaşanır.
Qeyd edək ki, sürücü qıtlığı son 2 ildə müşahidə edilməyə başlayıb. Bu problemin yaranmasının səbəbi qeyd edilən kateqoriya üzrə tələb olunan biliklərin çətin olmasıdır. Həmçinin, peşəkar avtobus sürücüləri daha yüksək əmək haqqı qarşılığında xaricə axın edir. Bu səbəbdən də "D" kateqoriyalı sürücülük vəsiqəsi olan sürücü qıtlığı müşahidə olunur.
AYNA: "D" kateqoriyalı sürücülərin sayının artırılması üçün avtobus parkı genişləndirilir"
Məsələ ilə bağlı Azərbaycan Yerüstü Nəqliyyat Agentliyindən "Bakı-Xəbər"ə bildirildi ki, "D" kateqoriyalı sürücülərin sayının artırılması üçün avtobus parkı genişləndirilir: "Sürücülər AYNA-nın təlim-tədris mərkəzində sərnişinlərin təhlükəsizliyinə, yol hərəkəti qaydalarına və nəqliyyat vasitəsinin təhlükəsizliyinə dair bütün biliklərə yiyələnə bilərlər".
Aslan Əsədov: "D" kateqoriyasını əldə etmək heç də asan deyil"
Nəqliyyat eksperti Aslan Əsədov "Bakı-Xəbər"ə açıqlamasında qeyd etdi ki, "D" kateqoriyasını əldə etmək heç də asan deyil. Bu kateqoriya fiziki ağırlıq, bacarıq və bilik tələb edir: "Ona görə də qeyd edilən kateqoriyanın əldə edilməsi asan deyil. Məlumat üçün deyim ki, kateqoriyaların alınması üçün müəyyən bilik və bacarıq lazımdır. Həmçinin, "D" kateqoriyası ümümi və ya kütləvi istifadə olunmur. Yəni ehtiyacı olan şəxs adıçəkilən kateqoriyanı almağa çalışır. Avtobus sürücüsü olmaq istəyən, daha ağır nəqliyyat vasitəsini idarə etmək istəyən şəxs "D" kateqoriyası üçün müraciət edir".
Fərid Həşimov: "Sürücülərin xeyli hissəsi Polşaya üz tutur, yüksək maaş onları cəlb edir və ölkədən kütləvi şəkildə gedirlər"
Nəqliyyat eksperti Fərid Həşimov "Bakı-Xəbər"ə şərhində bildirdi ki, "D" kateqoriyasını əldə etmək çətindir. Bunun üçün xüsusi bilik və bacarıq lazımdır: "Bəli, bu gün ölkədə peşəkar avtobus sürücülərinin sayı azdır. Bu danılmaz faktdır. Son iki ildə ölkəni tərk edib xaricdə işləməyə gedən sürücülərin sayı artıb. Avropa ölkələrində "D" kateqoriyasına malik sürücülərə yüksək əmək haqqı verilir. Məlumata görə, sürücülərin xeyli hissəsi Polşaya üz tutur. Yüksək maaş onları cəlb edir və ölkədən kütləvi şəkildə gedirlər. Azərbaycanda aldıqları maaşın təxminən 4 qat artığını alırlar. 800 manat hara, 3500 manat hara? Bu səbəbdən də hazırda ölkəmizdə avtobus sürücüsü tapmaq çox çətindir. Onu da deyim ki, əvvəllər avtobus sürücüləri planla işlədiklərindən, bu işdə çalışmaq onlara sərf edirdi. Sürücülər qoyulan planı ödədikdən sonra əldə etdikləri gəlir özlərinə qalırdı. Kart sisteminə keçdikdən sonra plan ləğv edildi. Kart sistemində isə maaş 800-1000 manat olduğundan, bu, sürücüləri qane etmir. Ona görə də, avtobus sürücülərinin kütləvi xaricə axını müşahidə edilir. Xaricdə isə əmək haqqı burdan qat-qat çoxdur".
Günel CƏLİLOVA
