İlqar Hüseynli: "Monitorinqin obyektiv, şəffaf keçirilməsi üçün medianın, QHT-lərin, müstəqil ekspertlərin iştirakı təmin edilməlidir"
Bakı Şəhər İcra Hakimiyyətində (BŞİH) paytaxt rayonları icra hakimiyyətləri başçıları və şəhərin təsərrüfat xidmətləri rəhbərlərinin iştirakı ilə keçirilən növbəti müşavirədə bir sıra məsələlər, o cümlədən də paytaxtda aparılan əsaslı təmir, abadlıq-quruculuq, yaşıllaşdırma işlərinin vəziyyəti və digər məsələlər müzakirə edilib.
Şəhər ərazisində həyata keçirilən işlərin monitorinqlərinin nəticələrindən danışılıb, bildirilib ki, son vaxtlar Binəqədi və Yasamal rayonlarında bu istiqamətdə müsbət dəyişikliklər müşahidə edilib.
Müşavirədə qanunsuz tikililərlə bağlı məsələ ciddi müzakirə olunub və rayonlarda aparılan monitorinqlərin nəticələrinə dair görüntülər nümayiş etdirilib. Tədbirdə çıxış edən Baki Şəhər İcra Hakimiyyətinin başçısı Eldar Əzizov bildirib ki, Prezident İlham Əliyev məmurlar qarşısında ciddi tələblər qoyub, onların təmiz işləmələrini və təvazökar olmalarını bir vəzifə kimi tapşırıb. Lakin hələ də bəzi mənfi hallar müşahidə edilməkdədir. Bununla əlaqədar rayon icra hakimiyyətlərinin başçılarına ciddi xəbərdarlıq edilərək təcili tədbirlərin görülməsi tələb olunub. Bildirilib ki, BŞİH-nin monitorinq qrupu tərəfindən işlərə nəzarət ediləcək və nəticələr bir aydan sonra yenidən müzakirəyə çıxarılacaq.
Bakı Şəhər İcra Hakimiyyətinin başçısı Bakı rayonlarının icra başçılarına tapşırıq verib. Həm də bildirilib ki, BŞİH-nin monitorinq qrupu tərəfindən işlərə nəzarət ediləcək və nəticələr bir aydan sonra yenidən müzakirəyə çıxarılacaq. Yəni bu istiqamətdə monitorinq davam etdiriləcək. Bu qruplar Bakı rayonlarının icra başçıları ilə bu monitorinqi necə aparacaq? Həmin monitorinq qrupunun mətbuatla əlaqələrinin qurulması mümkündürmü? Onlar bu işə mətbuatı cəlb etsələr necə olar? Bu monitorinq qrupu Bakı rayonlarının icra hakimiyyətlərində hansı məsələlərə diqqət yetirməlidir? Onun obyektiv monitorinq aparması Bakıda ümumi proseslərə necə təsir edəcək?
Ekspertlərin bildirdiyinə görə, monitorinqin nəticələrinin daha şəffaf olması üçün prosesə mətbuatın da, QHT-lərin də cəlb edilməsi çox vacibdir. İctimaiyyəti təmsil edən nümayəndələrin monitorinq qrupunun işinə böyük faydası dəyəcəyini deyən ekspertlər hesab edirlər ki, BŞİH bu nüansı nəzərə almalıdır. Ekspertlərin fikrincə, mətbuat və QHT nümayəndələri Bakı rayonlarında baş verənləri çox yaxşı bilirlər və zaman-zaman bir sıra problemlər, o cümlədən də qanunsuz tikililərlə bağlı məsələləri ictimailəşdiriblər. Ekspertlər deyir ki, əsas problemlərdən biri qanunsuz tikililərdir ki, bir çox Bakı rayonlarında buna rəvac verilir. Bu baxımdan, monitorinq qrupunun bu məsələni xüsusi diqqətdə saxlamamalı olduğunu deyən ekspertlər bir daha vurğuladılar ki, monitorinq qrupuna media və QHT nümayəndələrinin salınması prosesin daha obyektiv şəkildə aparılmasına yardımçı olar.
"Müstəqil ekspertlər mətbuat vasitəsilə problemləri üzə çıxarıb nəticəni dövlət qurumlarına təqdim etməlidir"
Sosial-iqtisadi sahə üzrə ekspert İlqar Hüseynli "Bakı-Xəbər"ə bildirdi ki, dünyada icraedici qurumun özünün özündə monitorinq aparması təcrübəsi yoxdur. "Dünyada belə bir təcrübə yoxdur ki, icraedici orqan özü özü üçün monitorinq qrupu yaradıb hansısa müşahidələr, monitorinqlər aparsın. Belə bir təcrübəyə başqa yerdə rast gəlməmişəm. Nəyi yoxlayacaqlar, nəyin monitorinqini aparacaqlar? Əgər söhbət dövlətin büdcəsinə nəzarətdən gedirsə, burada monitorinq qrupunun hər hansı bir səlahiyyəti olmayacaq ki, gedib büdcə vəsaitlərinin xərclənməsi ilə tanış olsunlar. Mənə elə gəlir ki, müstəqil ekspertlərin, jurnalistlərin, QHT-lərin bu prosesdə iştirakı daha faydalı olar. Müstəqil ekspertlər, mətbuat vasitəsilə probelmləri üzə çıxarıb nəticəni dövlət qurumlarına təqdim etməliyik. Eyni zamanda Bakıda baş verən bu tikinti-quruculuq işlərinin birdən-birə bu qədər vüsət alması bizim COP29-a ev sahibliyi etməyimizlə bağlıdır. Hesab edirəm ki, bu tikinti-quruculuq işləri yalnız COP29 və digər beynəlxalq səviyyəli tədbirlər öncəsi aparmamalıydı, biz mütəmadi bu işləri görməliyik"-deyə İ.Hüseynli bildirdi.
İ.Hüseynlinin sözlərinə görə, şəhər təsərrüfatı ilə bağlı bir sıra problemlər var ki, onlara xüsusi diqqət yetirilməsi vacibdir. O qeyd etdi ki, qarşıdan qış mövsümü gəlir və Bakı rayonlarında qışa hansı şəkildə hazırlanması məsələsinə diqqət yetirilməlidir. "Qarşıdan qış gəlir və qışa hazırlıq çox vacib məsələlərdən biridir. Dünyanın əksər ölkəsində qış mövsümünə hazırlıq prosesinə sentyabr ayında başlanır. Çox yaxşı olar ki, qışa hazırlıqla bağlı ciddi tədbirlər görülsün. Fikrincə, BŞİH-nin öz strukturlarından yaratdığı monitorinq qrupu hər hansı obyektiv gerçəyi əks etdirən işlərlə məşğul olmayacaq. Bu səbəbdən də hesab edirəm ki, monitorinqin obyektiv, şəffaf keçirilməsi üçün medianın, QHT-lərin, müstəqil ekspertlərin iştirakı təmin edilməlidir. Ümumiyyətlə, bu işlə müstəqil ekspertlər məşğul olmalıdır"-deyə İ.Hüseynli bildirdi.
İradə SARIYEVA
