Yeni tədris ilinin başlamasına, demək olar ki, bir ay vaxt qalıb. Tədris zamanı yaxınlaşsıqca, valideynlər məktəbli forması almağa çalışırlar. Məlumdur ki, valideynlər bu formaları paytaxt üzrə 11 məntəqədən əldə edə bilərlər. Lakin bu məntəqələrdən əlavə, bir sıra ticarət mərkəzlərində də məktəbli formaları satılır.
Bundan əlavə, internet üzərindən də məktəbli geyimləri satılır. Belə ki, sosial şəbəkələrdə yeni məktəbli köynəkləri 2 və 2 manat 50 qəpiyə təqdim edilir. Daha çox İnstagram və TikTok səhfələrindən ucuz məktəbli geyimlərinin satışı ilə bağlı məlumatlar yayılır. Qiymətin bu qədər ucuz olması ciddi müzakirələrə yol açıb. Çünki bu qiymətə satılan köynəyin keyfiyyəti ciddi şübhə doğurur. Bakı Tikiş Evi tərəfindən hazırlanan məktəbli köynəklərinin satış qiyməti 20 manatdan başlayır. Ölçüyə uyğun olaraq qiymət arta bilər.
Maraqlıdır, satış qiyməti 20 manat müəyyən edildiyi halda, onun 2 manata təklif olunması nə dərəcə düzgündür? Ümumiyyətlə, 2 manata satılan məktəbli formalarını almaq təhlükəlidirmi?
Etibar Əzimov: "Bazarda böyük miqdarda saxta paltarlar var, buna görə də insanlar qiymətlərdə fərq görən kimi özləri də bilmədən uşaqlarını təhlükə ilə üzbəüz qoyurlar"
Bakı Tikiş Evi" (BTE) ASC-nin satış üzrə müdiri Etibar Əzimov "Bakı-Xəbər"ə bildirdi ki, bazarda böyük miqdarda saxta paltarlar var, buna görə də insanlar qiymətlərdə fərq görən kimi özləri də bilmədən uşaqlarını təhlükə ilə üzbəüz qoyurlar: "Mənşəyi bilinməyən, standartlara uyğun olmayan məktəbli formaları bir dəfə yuyulduqdan sonra pis formaya düşür, həmçinin, uşaqlarda allergiya kimi fəsadlar verə bilər. 11 satış nöqtəmiz var və hamısında satılan formalarımıza 1 il zəmanət veririk. 1 il ərzində mütləq keyfiyyətini yaxşı saxlayır. Onu da deyim ki, formalarımız keçənilki qiymətlərlə müqayisədə 20 faiz ucuzlaşıb. Avqust ayının 15-dən sonra satış mərkəzlərimiz həftənin 7 günü, fasiləsiz olaraq çalışır".
Eyyub Hüseynov: "2 manata məktəbli köynəyinin satılması narahatedici bir durumdur"
Azad İstehlakçılar Birliyinin (AİB) sədri Eyyub Hüseynov "Bakı-Xəbər"ə açıqlamasında qeyd etdi ki, 2 manata məktəbli köynəyinin satılması narahatedici bir durumdur: "Belə hallar ona görə baş verir ki, 10 ildən artıqdır məktəbli forması ətrafında müzakirələr gedir, lakin konkret nəticəyə nail olunmur. Ölkəmizdə 1.5 milyondan artıq şagird var. Bu qədər şagirdin geyimi üçün ən azı 4-5 iri fabrik açmaq olar ki, bu ehtiyacı ödəsin. Bu da həm iş yeri, həm yerli istehsalın artımı, həm də valyutanın ölkəmizdə qalması deməkdir. Di gəl ki, hər il bu məsələ ətrafında müzakirə aparılsa da real iş yoxdur. Ona görə də işbazlar dövriyyəyə girir. Məktəb direktorları ilə sövdələşən işbazlar valideynləri formanı istədikləri qiymətə almağa məcbur edirlər. Bu da ancaq təəssüf doğurur".
Günel CƏLİLOVA
