Tural İrfan: "Ola bilsin təxribatçılardır, hələ ki, bu cür ayələr yazırlar, bir azdan başqa fikirlər də əlavə edəcəklər"
Küçələrə, avtobus dayanacaqlarına, metro keçidlərinə müxtəlif ideologiyaları, ayrı-ayrı məsələləri təbliğ edən kağız parçalarının yapışdırıldığının zaman-zaman şahidi olmuşuq. Bir müddət idi ki, belə hallara təsadüf edilmirdi.
Son günlər bəzi avtobus dayacaqlarına üstünə dini mətnlər yazılan kağız parçalarının vurulduğunu görürük. İndi bu cür mətnlər yazıb dayanacaqlara yapışdırırlar ki, avtobus gözləyənlər həmin mətnləri oxusunlar. İlk baxışdan bu mətnlər Quranın müəyyən ayələrini xatırladır. Amma bu heç də islami maarifləndirməyə yönəlik təbliğat forması kimi görsənmir.
Bu yazılanlar nədir? Hansı məqsədə xidmət edə bilər?
"...Aidiyyəti qurumlar araşdırmalıdır"
Tanınmış ilahiyyatçı Tural İrfan "Bakı-Xəbər"ə şərhində bildirdi ki, bunlar ayələrdir, onları primitiv şəkildə, əlyazma formasında yazıb yapşdırıblar. "Belə primitiv üsullarla din təbliğ edilməz. Bu kimi şeylər adətən zəif psixoloji durumda olan xəstə adamlar tərəfindən, yaxud da idarə olunan təxribatçılar tərəfindən icra edilir. Dini dəyərləri, Quranı küçələrə ayələr yazmaqla təbliğ etmək doğru deyil. Hər kəsin əlində telefon var, internet var, istənilən dəqiqə Quranın elektron variantına daxil olub oxumaq, dinləmək mümkündür. Divara kağız yapışdırmaq 50-70 il əvvələ aiddir. Ola bilsin təxribatçılardır, hələ ki, bu cür ayələr yazırlar, bir azdan başqa fikirlər də əlavə edəcəklər. Siyasi çağırışlar, təxribat cəhdləri də ola bilər. Quranı yollara yazıb təhqir etmək lazım deyil"-deyə bildirən T.İrfan qeyd etdi ki, onu yazan ağılda olan biri də cırıb yetə ata, yanında duran başqa ağılda biri də cırıb atana qarşı Quran ayəsini cırdı deyə xoşagəlməz hadisə törədə bilər və s. "Bir sözlə, təxribata daha çox bənzəyir.
Məncə, tam dəqiqini öyrənmək üçün araşdırılmalıdır. Ola bilsin, tam səmimi şəxs tərəfindən də edilə bilər. Ola bilər adam sadəcə dayaz düşünüb, dini dəyərləri öz başa düşüb qavradığı səviyyədə təbliğ etmək istəyib və belə bir addım atıb. Hər bir halda aidiyyəti qurumlar araşdırmalıdır" - deyə T.İrfan bildirdi.
İradə SARIYEVA
