Son günlər Bakının su təchizatında problem yarandığı məlumdur. Bu günlərdə rəsmən bildirilmişdi ki, avqustun 21-nə qədər Bakının bir sıra rayonlarında su verilişi dayandırılacaq. Dayandırıldı da. Maraqlıdır, yayın cırhacırında nə baş verir ki, son günlər tez-tez suyun verlişində fasilə yaranır?
Camaat narazılıq edir ki, günlərlə su gəlmir, məcbur olub pulla su gətizdirirlər. Camaat arasında söz-söhbət dolaşır ki, içməli su təchizatı sistemlərində problemlər var və vaxtında tədbirlər görülmədiyindən vəziyyət kritik hala gəlib. Hazırda su sarıdan Bakı sakinləri doğrudan da ciddi problemlərlə üzləşiblər.
Bu nə dərəcədə doğrudur? Yoxsa şayiədir? Əgər heç nə yoxdursa bu şayiə hardan yayılır?
İri Şəhərlərin Birləşmiş Su Təchizatı Xidməti: "Oğuz-Qəbələ-Bakı su kəmərində baş verən qəza ilə əlaqədar…"
Sualımızı İri Şəhərlərin Birləşmiş Su Təchizatı Xidmətinin mətbuat xidmətinə ünvanladıq. Mətbuat Xidmətindən "Bakı-Xəbər"ə verilən məlumatda qeyd olunur: "Oğuz-Qəbələ-Bakı su kəmərində baş verən qəza ilə əlaqədar hazırda hadisə yerində təmir-bərpa işləri davam edir. İntensiv, sürətli, fasiləsiz təmir işləri aparılır. Suyun tezliklə əvvəlki rejimlə bərpası üçün səfərbər rejimdə fəaliyyət göstərilir".
Elçin Bayramlı: "Avqustun ortasında paytaxtın əksər ərazilərində suyun verilişinin dayandırılması …"
Ekspert Elçin Bayramlının fikrincə, bu, qeyri-effektiv idarəetmənin nəticəsidir. O hesab edir ki, dünyanın heç bir ölkəsində bu cür yanaşma, belə planlaşdırma, belə iş yoxdur, ola da bilməz. "Əvvəldən strateji hesablamalar aparılır, sistemli şəkildə yanaşılır, hər şey ölçülür-biçilir və buna uyğun mövsümi vaxtlar seçilir. Bu, Cənub ölkələrində yayda ola bilməz. Birincisi, açıq şəkildə görünür ki, əvvəlcədən həmin ərazilərdə ötürücülük, qəza ehtimalı və sair düzgün qiymətləndirilməyib. Artıq problem son həddə çatanda hiss ediblər ki, orda qəza, partlayış baş verəcək, boru dağılacaq, bunun qarşısını almaq üçün son anda müdaxilə olunub. Amma bu əvvəldən nəzarətdə olmalı idi. Bu o deməkdir ki, effektiv idarəetmə yoxdur. Görünür, mütəxəssislər əvvəlcədən planlaşdırıb sistemi qura bilmirlər. Əvvəllər belə problemlər çox idi, su sistemində pərakəndəlik vardı. Biz əvvəllər təklif edirdik ki, mərkəzləşdirilmiş bir su sistemi yaradılsın. "Azərsu" və sair neçə-neçə qurum vardı. Yaxşı ki, Su Ehtiyatları Agentliyi yaradıldı. Amma o yaradıldıqdan sonra bu işin sistemləşdirilməsində, komplektləşdirilməsində və idarə edilməsində qeyri-adi bir dəyişiklik görmədik. Hər hansı bir dəyişiklik görmədik, əksinə, Bakıda qrafiklə su verilən ərazilərin sayı artdı. Başa düşürəm, Azərbaycanın su ehtiyatları azdır, təxminən 25 min kub kilometr qiymətləndirilir, bu da qonşu ölkələrlə müqayisədə dəfələrlə azdır".
Su ehtiyatlarının səmərəli və effektiv istifadə olunmalı olduğunu deyən E.Bayramlı qeyd etdi ki, amma biz bunu görmürük.
"Ümumiyyətlə, su təsəffüratında ciddi problemlərin olduğu heç kimə sirr deyil. Əvvəlki illərdə bu sahədə çox kritik vəziyyətlər yaranmışdı. Bu il isə yağıntılar yüksək həcmdə olduğundan, ciddi su problemi yaranmadı. Lakin avqustun ortasında paytaxın əksər ərazilərində suyun verilişinin dayandırılması əsaslandırıla biləcək hadisə deyil.
Bəli, paytaxtın su ehtiyacı ilbəil artır, kəmərlər və su şəbəkəsində gərginlik artır. Su təsərrüfatı rəsmiləri hər dəfə günahı əhalinin üstünə atmağa çalışsa da, problem təkcə su israfı ilə bağlı deyil. Daha doğrusu, əhalinin israfı ilə bağlı deyil. İçməli suyu, əsasən, müəssisələr və yaşıllıq təsərrüfatları daha çox istifadə edir. Əhali lazım olan qədər istifadə edir, çünki heç kim artıq su pulu ödəməyi xoşlamır…"-deyə E.Bayramlı qeyd etdi.
İradə SARIYEVA
