Elyar İslamoğlu: "Özəl məktəblərin bu addımı ölkədə məktəblər və şagirdlər arasında ayrıseçkilik yaradır"
Bakıda bir sıra özəl təhsil müəssisələrində dərslər sentyabrın 2-də başlayacaq. Bu barədə iqtisadiyyat.az saytı məlumat verib. Qeyd olunur ki, bununla bağlı müvafiq qərarlar qəbul olunub.
Məlumata görə, ölkədə fəaliyyət göstərən bir sıra özəl liseylər yeni tədris ilinin 2-3-9 sentyabr tarixlərində başlayacağı barədə valideynləri məlumatlandırıb.
"Bakı Atatürk Liseyi"ndə yeni tədris ilinə 1, 9, 10 və 11-ci siniflər üzrə sentyabrın 2-dən, digər siniflər üzrə sentyabrın 9-dan, "İdrak liseyi"ndə yeni tədris ilinə 9, 10 və 11-ci siniflər üzrə sentyabrın 2-dən, digər siniflər üzrə sentyabrın 16-dan, "Kaspi liseyi"ndə yeni tədris ilinə 9, 10 və 11-ci siniflər üzrə sentyabrın 2-dən, digər siniflər üzrə sentyabrın 16-dan, "Baku-Oxford School"da yeni tədris ilinə bütün siniflər üzrə sentyabrın 2-dən, məktəbəqədər hazırlıq qrupları üzrə isə sentyabrın 3-dən başlanılacaq.
"LANDAU School"da ingilis dili sektoru üzrə ibtidai siniflər sentyabrın 2-dən, yuxarı siniflər isə sentyabrın 3-dən dərslərə cəlb olunacaq.
Eyni zamanda, Bakıda bir sıra özəl təhsil müəssisələrində dərslər sentyabrın 2-də başlayacaq.
Nə üçün özəl məktəblərdə də dərslər 15 sentyabrda başlamır? Bəyəm onlar Azərbaycanda fəaliyyət göstərmirlər ki, fərqli vaxtlarda tədrisə başlayırlar? Ölkədə ali və orta məktəblərdə tədris sentyabrın 15-də (bu il sentyabrın 15-i bazar gününə təsadüf etdiyi üçün dərslər 16 sentyabrda başlayacaq) başlayacaq.
Özəl təhsil müəssisələrində dərslərin sentyabrın 2-də başlaması nə ayrı-seçkilikdir, bu nə üstünlük iddiasıdır? Özəl sektor dövlət sektorundan üstün olub? Bu cür ayrıseçkilik qəti şəkildə yolverilməzdir, yararsız bir nəsnədir.
Ekspertlər qeyd edir ki, bu, ölkədə təhsil müəsisələri arasında ayrıseçkilik yaradır. Ekspertlərin fikrincə, görsənir ki, bu, özəl məktəbləri dövlət elitasında himayə edən hansısa lobbiçilərin fəaliyyətinin nəticəsidr, burda özəl məktəblər saxlayan dövlət məmurlarının təsiri hiss olunur.
"Belə anlaşılır ki, həmin məmurlar dövlətin qayda-qanunlarını saymaq istəmir, qanunlara zidd gedirlər"
Filologiya üzrə fəlsəfə doktoru, təhsil mütəxəssisi Elyar İslamoğlu "Bakı-Xəbər"ə bildirdi ki, Azərbaycan 2004-cü ildə Avropa təhsil sisteminə inteqrasiya etdikdən sonra ölkədə dərslərin sentyabrın 15-də başlamasına və iyinun 15-də bitməsinə qərar verilib. "Arıq uzun illərdir ki, bütün ölkə üzrə dərslər sentyabrın 15-də başlayır. Amma biz bəzi mənfi hallar müşahidə edirik ki, özəl məktəblər dərsləri sentyabrın 15-də yox, sentyabrın 2-dən, yaxud 1-dən başlayırlar. Özəl məktəblərin bu addımı ölkədə məktəblər və şagirdlər arasında ayrı-seçkilik yaradır. Bunun nəticəsində də özəl məktəblərdə şagirdlər sentyabrın 2-də, dövlət məktəblərində isə sentyabrın 15-də təhsilə başlayırlar. Bu necə olur ki, özəl məktəblərdə dərslər sentyabrın 2-də, dövlət məktəblərində isə sentyabrın 15-də başlayır? Belə çıxır ki, bəzi özəl məktəb sahibləri, bu məktəbləri maliyyələşdirən şəxslər dövlətin qoyduğu qayda-qanuna qarşı çıxır. Əgər tədrisin sentyabrın 15-də başlanılması ilə bağlı dövlətin qərarı varsa, bu məsələ təhsil haqqında qanunda da öz əksini tapıbsa özəl və dövlət məktəblərində dərslər mütləq şəkildə eyni vaxtda başlamalı, eyni vaxtda da yekunlaşdırılmalıdır. Fikrimcə, bununla bağlı artıq aidiyyəti qurumlar da ölçü götürməlidir".
E.İslamoğlunun sözlərinə görə, ölkənin bütün orta təhsil məktəblərində dərslərin eyni vaxta başlaması və eyni vaxtda bitməsi reallaşdırılmalıdır. "Özəl məktəblərin etdikləri qanunsuzluqdur, saymazlıqdır. Yaxşı olardı ki, həmin özəl məktəblərin rəhbərləri haqda ölçü götürülsün. Əgər hansısa bir şəxs özəl məktəb açıbsa bu o demək deyil ki, ölkənin ümumi qanununa zidd gedə, istədiyi tarixdə dərsləri başladıb, istədiyi tarixdə yekunlaşdıra bilər. Xeyr. Onsuz da özəl məktəblərdə təhsil haqqı həddindən artıq yüksəkdir. Hər kəs aparıb orada öz övladını oxuda bilmir. Demək olar ki, həmin özəl məktəblərin illik ödənişi 10 min manatdan yuxarı olur. Valideynlərdən yüksək məbləğdə təhsil haqqı alan özəl məktəblər "Təhsil Haqqında" Qanunu da pozurlar, ölkə üzrə tədrisin vahid başlanma tarixinə, qaydasına əməl etmirlər. Hesab edirəm ki, bununla bağlı ölçü götürülməlidir.
Üstəlik də, nəzərə alsaq ki, özəl məktəblərin əksəriyyəti hansısa məmurlara aiddir. Belə anlaşılır ki, həmin məmurlar dövlətin qayda-qanunlarını saymaq istəmir, qanunlara zidd gedirlər. Bir çox hallarda özəl məktəblər təhsilə ziyan vurur. Hansısa məmurların sahib olduğu, yaxud himayə etdiyi özəl məktəblər onlar vəzifədən çıxandan sonra bəzən bağlanır, bəzən başqa bir məmurun əlinə keçir. Belə olan halda da, yəni məktəblər əl dəyişdikləri üçün bu, təhsilin keyfiyyətinə də təsir edir. Yaxşı olardı ki, özəl məktəblərlə, özəl tədris müəssisələri ilə bağlı ciddi araşdırmalar aparılsın və həmin məktəblərdə də dövlət məktəbləri ilə eyni tarixdə dərslərin başlanmasına dair bütün addımlar atılsın"-deyə E.İslamoğlu bildirdi.
İradə SARIYEVA
