Elyar İslamoğlu: "Müəllim, yaxud müəllimliyə namizəd hansısa nazirin adını, onun hansı sahəyə rəhbərlik etdiyini bilmirsə, bu, müəllimin yox, həmin məmurların öz günahıdır"
Müəllimlərin işə qəbulu üzrə müsahibə mərhələsi başlayıb. MİQ imtahanları ilə əlaqədar keçirilən müsahibədən çıxan müəllimlər arasında jurnalistlər sorğu aparıblar. Onlara sual veriblər ki, filan nazir kimdir, filankəs hansı sahədə nazirdir?
Müəllimlərin çoxu nazirlərin adlarını bilməyib. Belə rəy yaranır ki, müəllimlər savadsızdır. Düzdür, müəllimlərin nazirlərin adlarını bilməməsi, hansı nazirin hansı sahəyə rəhbərlik etməsi barədə məlumatlı olmaması yaxşı hal deyil. Amma bu təkcə müəllimin günahı deyil, burada o sahələrə rəhbərlik edən nazirlərin, dövlət məmurlarının böyük günahı var. Çünki onlar cəmiyyət üçün görünməz adama çevriliblər, elə fəaliyyət göstərirlər ki, cəmiyyət onları tanımır. Bu, müəllimlərin yox, özlərini cəmiyyətə tanıda bilməyən nazirin, yaxud nazirlərin günahıdır. Məsələn, daxili işlər nazirinin adını hamı bilir, ifadə edir, çünki fəaliyyəti göz qabağındadır, polis gecə-gündüz işləyir. Amma o biri sahələrə rəhbərlik edən nazirlərin adını çəkən yoxdur. Ona görə də, hansı nazirin hansı sahəyə rəhbərliyik etdiyini, adlarını bilmirlər. Bu səbəbdən də nazirləri tanımırlar. Bu da müəllimlərin yox, nazirlərin öz günahıdır ki, onlar özlərini cəmiyyətə təqdim edə bilmir.
"Hansısa bir nazir, məmur öz qınına çəkilib, özünü görünməz edibsə..."
Filologiya üzrə fəlsəfə doktoru, ictimai fəal Elyar İslamoğlu "Bakı-Xəbər"ə bildirdi ki, MİQ imtahanının müshaibə mərhələsindən çıxan müəllimlərə verilən suallar və onların cavabları sosial şəbəkələrdə onun da qarşısına çıxıb. "Müəllimliyə namizdələrdən bəzi nazirlərin, məmurların adlarını soruşurdular, onların çoxu bu suala doğru cavab verə bilmədi. Müəllimlərin, müəllimliyə namizəd olan şəxslərin ölkənin bütün məmurlarını tanımaq kimi bir öhdəliyi yoxdur. Müəllimin vəzifəsi məktəbdə şagirdə yüksək səviyyədə dərs keçməkdir, məktəbdə ona verilən tapşırıqları icra etməkdir, vəzifə öhtəliklərini layiqincə yerinə yetirməkdir. Yəni hər hansı müəllim, yaxud müəllimliyə namizəd hansısa bir naziri tanımırsa bu qəbahət deyil, heç qüsur da sayılmır. Əksinə, istər müəllim, istərsə də istənilən sahədə çalışan şəxslər olsun, məmurları tanımırsa o həmin nazirin fəaliyyətinin qənaətbəxş olmamasından irəli gəlir. Demək, o nazirlərin yaddaqalan bir işi, fəaliyyəti yoxdur ki, xatırlanmırlar. Amma hansı nazir yaxşı işlər görürsə, mətbuatda onun barəsində müsbət fikirlər əks olunursa, ümumiyyətlə onun yaxşı fəaliyyəti işıqlandırılırsa, o naziri, o məmuru hər bir kəs tanıyır. Amma hansısa bir nazir, məmur öz qınına çəkilib, özünü görünməz edibsə, öz işi ilə məşğuldursa, yaşanan problemlərlə bağlı onun səsi çıxmırsa, rəhbərlik etdiyi sahədə kifayət qədər problemlər varsa və həll olunmursa həmin məmurları heç kim tanımır. Nazir özü özünü əməlləri, fəaliyyəti ilə tanıtmalıdır.
Yaxşı olar ki, bizim nazirlərimiz, müəllimlərimiz müsbət işlərlə gündəmə gəlsinlər, öz vəzifə öhdəliklərini layiqincə yerinə yetirsinlər, həmin vaxt təkcə müəllimliyə namizdələr yox, bütün ölkə əhalisi onları tanıyacaq. Şəxsən, bu gün mən özüm də elə nazir var ki, adını xatırlamıram, xatırlamaq da istəmirəm. Çünki həmin nazirlər o qədər passiv fəaliyyət göstərirlər ki, biz onları tanımırıq" deyə E.İslamoğlu bildirdi.
E.İslamoğlu onu da bildirdi ki, hansısa nazirləri tanımadığı üçün müəllimliyə namizdələrin "savadsız" kimi qələmə verilməsi yolverilməzdir. "Müəllinin vəzifəsi nazirlərin ad-soyadlarını əzbərləmək deyil ki, kimlərsə bunu onlara irad tutur. Müəllim, yaxud müəllimliyə namizəd hansısa nazirin adını, onun hansı sahəyə rəhbərlik etdiyini bilmirsə, bu, müəllimin yox, həmin məmurların öz günahıdır. Müəllim nazirləri tanımamalıdır, nazir müəllimi tanımalıdır. Çünki nazirə dərsi müəllim keçib. Müəllimləri gözdən salmayın. Məmur müəllimə qul olmalıdır, müəllim məmura yox" - deyə E.İslamoğlu qeyd etdi.
İradə SARIYEVA
