Paris Yay Olimpiya Oyunlarında ölkəmizə gümüş medal qazandıran boksçumuz Alfonso Domingesin sosial media hesabındakı paylaşımı birmənalı qarşılanmayıb. İdmançı ona edilən tənqidlərə sərt şəkildə cavab verib:
"Bəli, bilirəm ki, əcnəbiyəm, amma mən Azərbaycanı sizdən qat-qat çox təmsil edirəm. Azərbaycan bayrağını yüksəklərə qaldırmışam. Sizin ölkəniz üçün etmədiyinizi edirəm. İndi özünüzdən soruşun ki, ölkəniz üçün nə etmisiniz? Heç nə".
Onun bu postu sosial şəbəkə istifadəçiləri tərəfindən tənqid edilib.
Qeyd edək ki, Parisdə keçirilən yarışa 1/8 final mərhələsindən başlayan və ilk döyüşündə 2 qat olimpiya çempionu kubalı Xulio Sezar la Kruzu məğlub edən Alfonso Dominges 1/4 finalda qazaxıstanlı Aybek Oralbaydan güclü olub. Yarımfinalda isə ispaniyalı Emmanuel Reyesə qalib gələn Alfonso final mərhələsinə vəsiqə əldə edib. Lakin təmsilçimiz yarışın final mərhələsində özbəkistanlı Lazizbek Mullojonova məğlub olub və Olimpiadanın gümüş medalına yiyələnib.
Qeyd edək ki, Paris Yay Olimpiya oyunlarında sərbəst güləş üzrə milli komandamızın üzvü Giorgi Meşvildişvili finala gedən yolda Gürcüstan təmsilçisi Geno Petriaşviliyə 0:7 hesabı ilə məğlub oldu. Bundan başqa, boksçumuz Alfonso Dominqes final görüşündə özbəkistanlı Lazizbek Mullojonova 5:0 uduzdu. Sosial şəbəkələrdə bu iki idmançının real performansından tamamilə uzaq döyüşdüyünü, qəsdən məğlub olduğunu iddia edənlər var.
Bildiyiniz kimi, Alfonso Domingesin mesajı ciddi narazılıq və qıcıq yaradıb. Onun sözündən belə çıxıb ki, guya bizim ölkəmizi dünyada boks sahəsində tanıdan odur. Təbii ki, Alfonsonun bu mesajı Azərbaycanda birməanlı qarşılanmayıəb və kəskin qıcığa səbəb olub. O, sanki bu mesajla Azərbaycana, bizə meydan oxuyur.
Mübariz Göyüşlü: "Mən Alfonso Domingesi bu paylaşımı silməyə çağırıram"
Müasir İnkişaf Birliyinin sədri Mübariz Göyüşlü "Bakı-Xəbər"ə bildirdi ki, Alfonso kimi bir boksçunun bu şəkildə mesaj verməsini təəssüflə qarşılayıb. "Mən Alfonso Domingesi bu paylaşımı silməyə çağırıram. Onun bu paylaşımı qətiyyən xoş deyil. Bizim elə Azərbaycan vətəndaşı olmağımız Azərbaycan üçün nəsə etməyimiz deməkdir. Hər kəs olduğu yerdə üzərinə düşən işi görürsə, deyək ki, şagird dərsə gedib yaxşı oxuyursa, tələbə yaxşı çalışırsa, media təmsilçisi, həkim, məmur öz üzərinə düşən işi görürsə bu elə Azərbaycan üçün nəsə etmək deməkdir. Hamımızın elə bir öhdəliyimiz yoxdur ki, gedib olimpiyadada iştirak etməliyik, qızıl medal alıb gətirməliyik. Bizim ödədiyimiz vergilərlə, bizim pullarımızla gəlir əldə edən bu legioner boksçunun bu cür açıqlamasını heç xoş qarşılamadım. Azərbaycan ictimaiyyəti onun bu mesajından qıcıqlanıb. Onu bu mesajı silməyə dəvət edirəm və demək istəyirəm ki, belə aqressivlik lazım deyil. Qızıl medal qazansaydı və ictimaiyyət onu tənqid etsəydi hardasa onun yazdığını başa düşmək olardı. Azərbaycan xalqının gözlədiyi nəticəni verə bilmirsənsə, tənqidlər də olacaq, sən də bunu anlayışla qarşılamaq zorunda qalacaqsan. Onun bu mesajını təəssüflə qarşılayıram"-deyə M.Göyüşlü qeyd etdi..
Tarxan Paşazadə: "O, gümüş medal qazananda mən onu tənqid etməmişəm"
İctimai fəal Tarxan Paşazadə "Bakı-Xəbər"ə bildirdi ki, Alfonso Domingesin gümüş medal almasını tənqid edib, amma onun indiki mesajına hər hansı bir tənqidi yanaşması yoxdur: "O, gümüş medal qazananda mən onu tənqid etməmişəm. Onun cavabı onu tənqid edənlərədir. Ona görə də onu tənqid edənlərin münasibət bildirməyi daha yaxşı olardı. Mən isə ona ölkəmiz adına medal qazandığı üçün təşəkkür edirəm. Onun həyat yoldaşı azərbaycanlıdır. İnanıram ki, övladları da ölkəmizin bayrağını uca tutacaqlar. Azərbaycan-Kuba münasibətlərində də əhəmiyyətli paya sahib olacaqlar".
Çingiz Özgür: "Alfonso Dominges Azərbaycan üçün yox, pul üçün orda olub"
Tanınmış jurnalist, ictimai fəal Çingiz Özgür "Bakı-Xəbər"ə açıqlamasında bildirdi ki, legioner boksçunun paylaşımı çox iddialı bir paylaşımdır. "Səmimi daşışaq, Alfonso Dominges Azərbaycan üçün yox, pul üçün orda olub. Bunu hamı bilir. İndi bizə barmaq silkələməyi ki, mən Azərbaycanı sizdən qat-qat çox təmsil edirəm, xeyr, sən Azərbaycanı təmsil etmirsən, sənə pulu hansı ölkə versəydi, o ölkəni də təmsil edəcəkdin. Digər tərəfdən, Azərbaycan igidləri, xalqımızın dəyərli oğulları Azərbaycan üçün kifayət qədər iş görüb, hər birimiz də Azərbaycanımız üçün iş görürük. Bu da çox aydın məsələdir ki, heç kəs öz ölkəsindən ötrü etdiyini, düşündüyünü başqa ölkə üçün edə bilməz. Çünki bizim öz vətənimiz üçün etdiyimiz ən kiçik bir şey belə, təmənnasızdır. Amma nəinki Alfonso, eləcə də digər əcnəbi idmançılar gəlib Azərbaycanı təmsil edirlərsə, bunu pul üçün edirlər. Hələ gedib üzümüzü qara edəndən sonra gəlib belə yekə-yekə danışmaqların yeri yoxdur. Düzdür, azərbaycanlı idmançılar da var ki, başqa ölkələri təmsil edirlər, onlar orada doğulublar, orada böyüyüblər və orada yetişiblər doğulduqları ölkəni də təmsil edirlər.
Azərbaycan üçün biz nə etmişik, o nə edir? Görürsüz ki, "təmsil edirəm" deyir. Hətta sözdə də olsun demir ki, mən Azərbaycanı sevirəm, bunu Azərbaycan üçün edirəm. Bəli, pul qarşılığında bizim ölkəni təmsil edirsən, sənin qələbəndən sonra qalxan Azərbaycan Bayrağı Azərbaycan dövlətinin qüdrətidir.
İdman siyasətinin nəticəsidir ki, kimsə gəlib bizi təmsil edir, yer tutur, Azərbaycan bayrağı dalğalanır. Budur. Yoxsa, hansısa bir əcnəbi gəlib gedib pul qarşılığında hansısa yeri tutandan sonra deməsin ki, mən bunu Azərbaycan üçün etdim. Xeyr, Azərbaycan üçün azərbaycanlılar, Azərbaycan vətəndaşları, Azərbaycanın oğulları edir nə lazımdırsa edir, öz igidlərimiz edir"-deyə Ç.Özgür bildirdi.
İradə SARIYEVA
