Etibar Əzimov: "Bütün istehsalat müəssisələri kimi biz də bankdan götürdüyümüz kreditlə işimizi görürük"
"Bakı Tikiş Evinin hazırda 4 milyon manat kredit borcu var, aylıq 30 min manat ödəniş edir". Bunu mətbuata Bakı Tikiş Evinin (BTE) rəsmisi Etibar Əzimov deyib.
Maraqlıdır ki, ölkədə fəaliyyət göstərən orta ümumtəhsil məktəblərinin əksəriyyəti validyenlərdən BTE-nin istehsal etdiyi məktəbli formalarını almağı tələb edir. Hətta dərslər başlayanda şagirdlərin geyimini də xüsusi nəzərdən keçirirlər ki, görsünlər geyimlərdə BTE-nin nişanı var, yoxsa yoxdur. BTE-nin nişanı olmayanda məktəblər narazılıq da yaradırlar. Yəni məktəblərdən valideynlərə deyilir ki, ən keyfiyyətli və münasib qiymətə məktəbli formalarını BTE istehsal edir, siz də formaları bu tikiş evindən alın.
Bilirik ki, yeni tədris ili başlayan ərəfədə validyenlər BTE-nin müvafiq mağalarına üz tuturlar və ordan forma alırlar.
BTE rəsmisinin açıqlamasında ifadə olunan 4 milyon manat borc məsələsi diqqətimizi çəkdi və bəzi sualların yaranmasına səbəb oldu.
Bəs satışdan gələn gəlir hara gedir? Bəlkə BTE-nin nişanından istifadə edib saxta formalar istehsal edənlər var? BTE-nin adından sui-istifadəçilik halları yaranıb?
"Saxta məktəbli formaları tikib satanlar həddən artıq çoxdur"
BTE rəsmisi Etibar Əzimov "Bakı-Xəbər"ə açıqlamasında bildirdi ki, hansısa bir istehsal-satış müəssisəsinin banklara borcu olmasında qeyri-adi heç nə yoxdur, bu adi haldır. "Biz qış aylarında materialların hamısını alıb gətiririk, bu məhsulları banklardan götürdüyümüz kredit hesabına alırıq. Banklarla işləyirik. Digər tərəfdən də, BTE dövlət qurumu deyil, o səbəbdən də biz dövlətdən maddi təminat almırıq. Gəlirimiz satışdandır.
Bizim müəssisənin borcunun olmasında təəccüblü heç nə yoxdur, bütün istehsalat müəssisələri kimi biz də bankdan götürdüyümüz kreditlə işimizi görürük. Yeni formaları satacağıq və bankın kreditini ödəyəcəyik. Yəni həmişə belə olur".
Saxta geyim istehsalçılarının yaratdığı problemlərə gəlincə, E.Əzimov qeyd etdi ki, saxta məktəbli forması istehsalçıları hər yeri tutub, "Binə", "Sədərək" kimi ticarət mərkəzlərində onlara sıx-sıx rast gəlinir. "Saxta məktəbli formaları tikib satanlar həddən artıq çoxdur, onlarla mübarizə aparmaq çətindir. Validyenlərin saxta məktəbli forması almaması üçün biz məcbur olub qiymətləri bir qədər aşağı salmışıq. Qiymətləri ucuzlaşdırmışıq ki, bazarda satılan formalarla bizim qiymət arasında böyük fərq olmasın, valideyn daha ucuz və keyfiyyətsiz məhsul almasın, keyfiyyətli məhsul alsın. Şalvarların və ətəklərin qiymətində endirim etdik, camaatın da vəziyyətini də nəzərə almışıq. Tutalım, bazarda saxta məktəbli şalvarə 16-17 manatdırsa, biz öz istehsal etdiyimiz şalvarın qiymətini 25 manatdan 20 manata endirdik. İstehsal etdiyimiz formalar yaxşı satılır, camaat da razıdır. Bu validyenlərə uyğundur, biz satışdan minimum gəlir götürürük. Gedib 17 manata saxta məktəbli şalvarı alınca, gedib 20 manata orjinalını alaram. Biz formalarımıza tam zəmanət verərdik. Bizim satış mərkəzlərimizin ünvanları məlumdur, bu ictimaiyyətə təqdim olunub. Valideynlər həmin satış mərkəzlərinə yaxınlaşıb forma ala bilərlər. Valideynlərinə tövsiyyə edərdim ki, bazardan, hansısa təsdüfi yerlərdən mənşəyi məlum olmayan məktəbli formalar almasınlar, bu onların övladları üçün zərərlidir.
Şagirdlərin saxta məktəbli forması geyməsi böyük bir fəlakətdir, onlarda alergiya, dəri səpkiləri, cürbəcür fəsadlar yarada bilər. Mən demirəm ki, təkcə bizdən alsınlar, başqa fabriklər də var. "Gilan", "Bakı Toxuculuq Fabriki" və başqa fabriklər də var ki, onlar da məktəbli formaları istesal edirlər. Valideynlər formaları normal yerlərdən alsınlar, zirzəmilərdə, orda-burda tikilən saxta məktəbli formaları almasınlar. 10-11 manata məktəbli göynəyi satılırsa, bu necə orjinal mal olar?" - deyə E.Əzimov bildirdi.
İradə SARIYEVA
